Today is a holiday .Today is a day jus fuh fly kite.. We gon fly kite and drink and eat and laytuh wen we come home we gon call dem in de Nart fuh ah raise.Hope allyuh ansah de fone. Ppl in de Nart,wha yuhall seh to dis? Man we had a long weekend.It aint done yet,Good Friday....hope allyuh went to wuk.We guh and pray dat yuhall send duh small piece yuhall pramise we since Chrissmuss. Den we sport up Saturday and went back to chuch Sunday....we pray hardah dat yuhall get strength fuh guh to wuk and send we de money yuhall seh yuhall gon send we fuh buy up one one ting fuh Easter. Of course we drink up and eat up.Nuff crass buns. We guh by Jerries- all nite long and buy dem brand name cross buns nat dem tennis roll dat dem put ah lil crass pon tap fuh fool dem stupid ppl. Well today is de big day.Hope yuhall ketching yuhall tail and guh to de ppl wuk.We gon trow back and jus sport like fuss time.No worries ,no wuk,nuff food,nuf nuff drinks and we gon fly kite. We aint buying no Chinee plastik kite.We mek we own caddy ole punch and going by de seawall.Deh gat action. Jerry seh he going and watch dem gyall in dem tite close.Dont talk dem does gat nuff antiman outdoing dem gyall dees days. We juss writing dis lettah suh juss in case we get sweet,nah we dont evah get drunk.Yes,we writing fuh remind yuh bout de raise yuh pramise we.We gon still call from de internet cafe laytuh. But recently yuhall aint been answering de fone at all.Hope is wuk yuhall busy wukking. Dont worry Carlton going up nexx week.Yuhall still want de awara and de cheese rolls and pine tarts dat yuh de ask fuh? Janice seh she gat some mittai fuh sen up tuh. Tek care, Yuh loving bruddah, Stay home Charlie.
Posted on: Mon, 21 Apr 2014 11:13:41 +0000
Trending Topics
Recently Viewed Topics
© 2015