Tripartite Meeting at MPC (Thum Kawmh tonnak) ----------------------------------------------------------- by Victor Biak Lian August 18, 2014: President Tein Sein nih tlangcung hriamtlai vialte kahdaihnak a sawm hna a kum 3 nak a si. Hi ni thengte ah hin Myanmar Peace Centre ah Minister U Aung Min nih NCCT le Political Parties 36 (Tlangcung Party 30 le Kawl Party 6 NLD tel in) an sawm hna i, an mah cozah lei in Cabinet Minister 4 le Myanmar Peace Centre tuanvo ngei hna he thumkawmh tonnak cu an tuah. Cu cu Kawlram kong a ngiatontu nih cun zei sullam dah a ngeih nan theih ko lai. Hi ni ah hin UN Special Envoy Mr. Vijay Nambiar le a staffs pawl, cun cu hlan ah ramri hrawng ah a rak cawlcang mi hna, NCGUB UN Rep. Dr. Taung Htun, NCUB (National Council of Union of Burma) an GS, U Maung Maung, Metta NGO Director hlun Daw Seng Raw le ti in observer in an kan sawm ve ca ah, ka va kai ve. Can tha kaa ton tiah kaa ruah a ruang cu: 1992 lio hin UN General Assembly ti mi New York ah kum fatin an tuah mi ramkip cozah tonnak nih hin, Kawlram kong an ceih fa te, Kawlram ah an buainak hi, a tlangpi cun, aa naa sin (Dictatorship) lawng si lo in, kum saupi tlangcung mi le Kawl cozah kar ah miphun thleidannak ruang ah ral a tho mi hna nih an duhmi an hal mi kong pin ah democracy ram ser an duh mi a si kong bik a si ca ah, hi kong ah cu lio cozah a si mi SPDC (Than Shwe), cun, democracy cawlcanghnak a hruaitu Daw Aung San Suu Kyi le a hrihhruai, le tlangcung mi hna tonnak (Tripartite Dialogue) in daihnak te he khuakhang hna seh law, an duh mi chuahpikhawhnak lam a um ko ti in, bia an khiah i, cu ti a si khawhnak ding ah, Malaysia diplomat Razali Ismail, a hnu ah Ibrahim Gambari etc.. hna kha tuanvo an rak pek hna. Khin Nyunt le Daw Suh siseh, daw Suh le Than Shwe zong a thli te in an rak i tong leng mang hna. Khin Nyunt nih hin KNU a rak chonh hna, cun cu lio ah ceasefire a rak tuahmi buu 17 KIO le NMSP le SSPP hna tu cu National Convention an rak kai ca ah, chonh ah a ruah hna na in, KNU tu hi 2004 ah Ygn ah a rak chonh hna. A tawinak cun, cu tum kawmh biaruahnak cu SPDC chan lio ah a rak um lo. UNGA zong nih cun kum fatin thum kawmh biaruah ti cun an ti leng mang. ENC zong hin cu ko cu kan i tlaih i, ramkip ah cu thum kawmh biaruah a chuah khawhnak ding ah, tan kan rak la. Keimah hmanh hi UN voi 2 ka phan ve hi kong ah. India, China, Australia, EU, UK, Germany, USA, Canada, Norway, Denmark, Finland, Sweden, Japan, Korea, thazang a ngei deuh mi ram poh ah hi kong hi rak chim cio a si. UNGA cu New York ah tuah a si ca ah kum fatin Burmese opposition palai hi kal leng mang a si vbantuk in, Human Rights Commission, Human Rights Council, sub-commission etc., zong ah kum fatin kan rak au pi ko. A rak cang lo. Thum kawmh biaruah a cang lo na in, zeidah hi nih hin kan politics a thlen mi tampi lak ah, kan nih Laimi zong nih kan i miak pi ngai ngai mi cu: Cu hlan ah hriamtlai vialte cu vawlei nih tupung, damiah (Terrorists) bantuk ah rak ruah mi kan si na in, hi UN au khuannak thawng te hin, kan hriamtlai vialte zong cu Tupung damiah sinak in, kan ram ca ah an mah tel lo in a si kho lo (stakeholders) or Dialogue partners dirhmun ah a vun kan thlen. Cu le cangka, ramkip refugee policy zong cu an thlen i, US hmanh nih chikkhat te cu Patroitic Acts in Malay siseh, India siseh refugee vialte dothleng pawl he hnamhhnuaihnak a ngei mi vialte rak kal ter lo a si. Note: Keimah zong hi 1995 ah US Embassy Delhi nih resettlement ca ah interview an rak ka tuah i, a si na in, adonghnak ah cun CNF ah hin nangmah volunteer te in a lut mi na si ca ah an ka ti i, an ka reject. Cun, 1996 ah US Scholarship ah an ka thim than i, kan kal lai hrawng visa lak kan i thawh ah, volunteerily in withdraw rak i tuah hriamtlai na si an rak ka ti. Sihmanhsehlaw, cu vialte cu an thlen than dih i, Bush chan lio Secretary of States Dr. Condoleeza Rice chan ah cu an cazin (Terrorist cazin) in an kan thlah dih i, cu a bawmchan tu refugee vialte zong cu an ram ah luhter than kan si. (Mah hi a tawinak in ka tial mi a si i, tam deuh ca kan ngeih ah cun kan tial than te lai). Hi UN resolution nih hin kan dirhmun cu a thlen bak. Conflict partner kan si na in, a tu ah cun dialogue partners (ral sinak in, biaruah hawi sinak) ah a kan ser. UN biachah cu ThanShwe le Khin Nyint chan ah a tling rih lo na in, Tein Sein chan a rak phak tik ah, August 18, 2011 ah sawmnak ca cu kuat cio kan si. Cun, President Tein Sein nih thil biapi pathum ah aa chiahmi hna lak ah, A thianmi cozah serding, a nuam mi le democracy ram ah ser ding le cun, tlangcung mi dothleng hna he daihnak ser ding a si ti hi, March 01, 2011 a nikhatnak President speech ah fiang te in a chim ca ah cu inka hmete (hmete) aa ong mi chung ah cun, kan rak luh cionak le, kan i paih ve cionak a si. Kutka an awn mi hi a bi te ko. A bi te tak tak khi a si. Asinain, kum 60 ah a voikhatnak zong a si i, adonghnak a si sual ah cun kum zeizatdah thisen le hnai a luan rih lai? Cu te cun opportunity a si ko tiah kan hruaitu hna nih an ruah ca ah a tu bantuk in cozah cu kum 3 chung an chawnh cang ko hi ta! Ziah! Kum 3 cu zeikarlo te pei a si ko cu ti awk in a si na in, hi kum 3 chung te zong hi thathnemnak tampi a um ko. Zei a va si te lai tu cu, Pathian nawl ah chia ko hna uh sih law, tlacam hna uh sih, cun, a tuan zong fakpi in tuan hna uh sih! Zeica ah dah hi thum Kawmh tonnak Tripartite Meeting (biaruah ka ti ti lo hih mu) an auh? A sullam cu simple te a si ko. Kan chim lengmang mi Nationwide Ceasefire a dih hin cun, ni 60 chung ah Framework for Political Dialogue cu NCCT, UPWC le Political Parties (Hi zawn ah hin Daw ASSK theng si ti lo in, 2010 election in a rak chuakmi Political Parties vialte NLD tel in) hna nih an suai lai i, ni 90 chung ah Political Dialogue thawk khawh ding tiah an hna a tla. 2012 February lio te hin hriamtlai chung ah cun, framework siseh, political dialogue ca ah siseh, Nationwide ceasefire ca ah siseh, kum 2 chung kan rak i buaipi cang na in, political parties pawl tu cu, parliament ah siseh, an mah le an i group nak cio le by election le, an buai phun kha aa dan ve ca ah, zeihmanh an i timtuah kho lo. Cun, party 67 kan ngei hna cu mu. Cu ca ah cun, 2013 thawkka hrawng khan Naypyidaw a si ah, Ygn siseh, parties an zapi tiawk ngawt hin the concept of National Dialogue hi workshop tamlak te kan tuah pi cang hna. Aza rih lo. Tam deuh tuah rih a hau. Cu tik ah, hi political party 67 hi zeitindah an i kawmh ve lai? (Party kawmh si lo in, peace process ca ah coordination an i tuah dan kha a si). Myanmar Peace Center nih 11 August ah anzapi 67 partues cu an sawm hna i, NCCT le cozah karlak an biaruahnak vialte an chimh hna. Cun, political parties pawl an biapitnak kong zong chimh an si tik ah an mah zong an lung a tho ngai. A tu cu peace process ah zeitindah kan i tel ve lai ti kha an i ceih cuahmah liopi a si ve i, a si na in, nan theih cio bang party 67 vun i thihruaiding cu a fawi lo. Cu ca ah cun, nizan ah Parties pawl an umtu ning ka vun tial ah khan nan fiang ko lai dah! NBF ah 20 an i fun hna i, FDA ah 11 an i fun hna. Cun, UNA ah buu 7 an i fun i, Rakhine an i fonh hnu cun bu 6 hrawng lawng an si. Cun, ngal khat pawl NLD, NUP ti pawl zong cu an si ve. Sihmanhsehlaw, September 13-14 ah hin an zapi tonnak le khuakhan ti nak kan ngei lai tiah thawng an zamh mi ka hmuh le a tha tuk ka ti. Cuticun, August 18 ah cun, parties an si ah, NCCT an si ah, UPWC an si ah, ton biaruahnak le thawng i halnak cu an thawk tik ah, ka lung ah a chuak mi cu: Than Shwe, Daw Suh le cu lio ENC a kan hruaitu Pado Ba Tin Sein, Cun, ramchung ah U Khun Tun Oo te pawl tlangcung kan hruaitu hna cu an thu ti lo na in, an rauthla cu a um ko rua! In chung ka luh bak in thudam an chiah ning nih ka thinlung a ka tongh ngai. Ka thutnak kha pakhat hnu pakhat ka vun kawl. Luhlai te ah, Gen Gun Maw, Pado Kwe Htoo, Dr. Lian, Nai Han Tha pakhat hnu pakhat bia ka va ruah hna. Tripartite dialogue cu a si rih lo na in, tripartie meeting cu a si ko cang hih! ka ti hna. Ka thutdan cu ka va hmuh. UN Special Envoy Vijay Nambiar he thuti ding kan si. A rak lut colh ve. Meeting an thawk hlan ah siseh, break kan ngeih zong ah Tripartite Dialogue campaign kan rak tuahnak kong kha khu le phak in ka ruah i, UN an role kha ka vun chimh than tik ah aa lawm ngai. NY ah rak kan leng te tiah a ka sawm. Nambiar hi NCCT zong nih siseh, a bik in KIO zong nih hin an kawmh thiam ngai mi UN palai a si i, a tha ngai. Cuticun, tripartire meeting cu a dih in, UNFC delegation pawl nih Daw Suh zong cu a zanlei ah an va len colh tik ah, a mah cu a thu lo na in, message tu cu an kuat lai dah! U Ngan Win belte a kai. Hi party upa hna lak ah, mi tamdeuh cu ka theih dih ngawt pah hna. India ah siseh, Thailand ah 2010 hrawng ah hin cenference le meeting te te kan rak sawm hna i, kan rak i thei hna. NLD in a chuak mi NDF hruaitu U Khin Maung Shwe le NUP an u pa U an Shwe tbt bia an chim ah cun an za ve cio ko. A ra lai mi NCCT-UPWC cu, article 31 tluk a tang mi lim ding in Sept 22-24 tiang MPC ah an i sawm than. Cun, 25 Sept ah cun Political parties hna he a voi 2 nak Tripartite meeting cu peh ding in an timhtuah i a tlam a tling te hnga dik maw? Cuan rih ko hna uh sih! Victor Biak Lian Ottawa (Note: Victor Biak Lian nih a facebook ah a ttialmi a si i rel ttha le theihtha a si caah zapi nih rel kho dingin kan van tar chin. Hmanthlak: private. - Editor, TCP)
Posted on: Sun, 07 Sep 2014 14:48:13 +0000
Trending Topics
Recently Viewed Topics
© 2015