Tulaai Leitung Thuthang tuamtuam Updates July 29, 2013 Zomgam Thuthang te: • Zomi ten ideih hetloh ahi CNF pawlte phone tawh thuzasak ziau in Saaizaang khua leh Tedim khuapi ah July 21,2013 Sunday ni in pai uha, Kamhau Hall ah mipitung thugenna nei in thungaai apai kheempeuh Ks/2,000 pia uhhi. • Saaizaang khua ah Innpi te inn ah khuanu khuapa te sam uh a Saaizaangkhua a amithahte uh thuumna aneihban uh ah thutampi tak gen uhhi. Saaizang khuanu khuapa huasa te in bangmah dawnglo uhhi. Tuaban ah saang,tui cihte huhding in kamlap uhhi. • CNF lampan apai mite 1. Bomu Gyi Thang Ling Kee (Canada) 2.Duh Bomu Gyi Sang Lian Htlang@ Htlangte 3.Lang Hau Lian@Haukaang, leh gaalkap nautaang 10 kihel uhhi. • UN lam pan Kusahle(palaii) leh Kumpi lam tawh CNF te thu kimna kamciam en cik dingin,Ai Sian Pau in hong zui kawikawi hi. • Tedim gamsung ah CNF gaalkaap mimal taangvaal vive 27 gaalvan kicingtawh omlaaitak hi cih hih atunga thuteng Zomi thukante tungpan muanhuai tak in kiza hi. Akicing zaw in theinuam a naseemnuam takpiten personal email ah kithuza ni. Kawlgam Thuthangte: • Kawlgamsung Mon state leh Karen state mun tampitak ah guahtui tamluatna hang in tuikhang kawikawi a adiak in munniamna mun a teeng khuate tui in tum mang ahihman in kiheemkhia hi ci in Mon state NLD te in 7/29/13 ni in taangkokhia uhhi. • Kawlgam Yangon khuapi Panda Hotel ah Kawlgambup khangnoten Kawlgam kilemnatawh kisai thu kikupnawina July 27-29 sung nasiatak nei uha, khangno makaai 200 vaal kihel thei uhhi. • UNFC te makaihnatawh gamsung gampua aom Mualtungmi khawmpi July 29,2013 pan nilisung Thailand gam Chinmai khua ah kibawl a Adiak in Federal tawh kisai kikuppi in nei uhhi. Hih khawmpi ah Zomi makaai Pu Chin Sian Thang leh Pu Zam Mung te zong ZCD party aiawh in vakihel uhhi. • Piantit gam I Prime minister (Nicole Bricq) leh lawmte mi 14 7/30/13 ni (zingciang) kawlgam kumpite tawh adiak in Gas,Oil leh Automobile tawh kisai kikumkhawmding in Yangon khuapi ongtungding hi ci in Yangon Piantit palaaizumpi te in genkhia uhhi. Leitung gam tuamtuam thuthangte: • Guah naakzuk luatna hang in Thaigam a asaupeen a aminthang mahmah singtawh akibawl Sankhalaburi singlei 7/28/13 zanlam in kitan ahihman in sangnaupang te paisukpaitohna buai huai mahmah ci in Thailand thuneite in 7/29/13 ni in genkhia uhhi. • Kum 3 sungbang adaaicip dide Middle East kilemnading tawh kisai in 7/29/13 ni in USA gam Washington DC khuapi ah kipantading a 7/30/13 nidong kikumding uhhi. Hih thukikupna ah USA Secretary of State John Kerry, Israel vaai thusaipi Tzipi Livni leh Palestine vaai thusaipi Saeb Erekat te kahding uhhi. • Egypt gam a thuneihna kilaaksak a thongkikhum President luui Morsy adeihmipi te in 7/29/13 zanlam in mi Awn khat in nasiatak lungphona neiding in ahanciamna uh taangkokhia uhhi. • Pope Francis Italy gamlam zuan in atuanna vaanleeng tung ah 7/29/13 ni in thudotna pawlkhat kinei a thudotnate lak ah adawnkiknakhat ah Gay Pasalkeu te, Phungzi keu te leh Numei Pasal ut te tung ah thu kakhenkeiding a amau Pasian um a azon uhleh thupha ngah vevelelding hi ci hi. • Switzerland gam Moudon leh Payerne khuapi kikaal ah Taaihaat meileeng nih 7/29/13 nitaak 6:30 pawl in kiphukha a mi 44 liam in 4 gim mahmah hi ci in Swiss Federal Railways spokesman Reto Schaerli in genkhia hi. • Italy gam Avellino province sung ah 7/28/13 ni in Thungending a apai Pawlpi Bus khat in amaai a taailaai mawtaw 11 aphulkhitciang kilumlet in lei Bridge tungpan kia a mi 38 si in naupang zong kihel hi ci in Italy thuneite in 7,29,13 ni in genkhia uhhi. Thuumna: Tulaai leitung thuthang tuamtuam peen leitung bup thuthang kikaaikhawm ahihmahbang in ani anai kibanglo a hih man etdan nasiam unla laaimal kikihalkha aom leh ngaihdambawm ah nakhiatsak un cih kongthuum hi. Zomitv na hawh hamtang ve Zomipau
Posted on: Mon, 29 Jul 2013 19:13:28 +0000
Trending Topics
Recently Viewed Topics
© 2015