Tusite, Sanuali 13: Lau Folofola – 1 Samiuela 3:10-20. Ki’i Ama: 1 Samiuela 3:10b, “Pea toki pehe ʻe Samiuela, ‘Fai mai haʻo folofola he ‘oku fakaongo atu ʻe hoʻo tamaioʻeiki ko au.” Pou ‘Ao: `Oku kei hoko atu pē `etau fakalaulauloto `i he talanoa maheni mo `ofeina `o hono ui `o Samiuela `o tau fakamama`u ki he tali na`e fai `e Samiuelá. Ko `aneafí, na`a tau fakalau `a e ngaahi koloa `oku fa`o `i he talanoá, ka ko e `aho ni te tau tokanga ki hono fakasino `a e tali na`e fai he`e ki`i tamasi`i `Isileli ta`u 12 ko `eni `i he ta`u `e toluafe tupu kuo hilí, ke tau a`usia tonu ai `a e laumālie totonu`o e fie fanongo ki he le`o `o e `Otuá. ‘Oku fakamatala’i ‘e Faifekau Siupeli Taliai ‘a e puipuitu’a ‘o e Himi 598, `Amusia `a Samiuela, ko e liliu mei he Himi faka-Pilitania `oku `iloa ko e Master Speak, Thy Servant Heareth, na`e fa`u ‘e e fefine Pilitania ko Felenisisi Havekale (Frances Havergal), fakataha pea mo e himi 510, Sisu Keke Ma`u Ma`au, pea mo e Himi 482, Hili `a e La`ala`ā. Ko Felenisisi ko e fefine na`e `atamai`ia pea mohu taleniti, `o kau ai `a e hiva solo pea mo e tā pianó. Na`a ne tupu `i he famili poto mo lotu he ko `ene tamai ko e faifekau na`e faiako `i `Okisifooti (Oxford), pea ne iku `o li`aki `a e faiako koe`uhi ko hono lakanga faifekaú. Na`e malōlō `a `ene fa`ē `oku ne kei si`i, pea na`a ne fa`a mahamahaki, pea mahalo na`e kau ia `i he me`a na`a ne fakatupulaki `a `ene mo`ui fakalaumalié mo `ene ngāue faka-`evangelió. `I he himi faka-Pilitania `oku talanoa ai `a Felenisisi kia Sisu `o ngāue`aki `a e huafa “Eiki,” pe ko e Master `o fakamatala`i ‘a e fakaongoongo kakato mo talangofua ta`efehu`ia ki he le`o `o e `Eikí, pea mo `ene kole tōtōaki ke ne ongo`i `a e ui pe ko e fekau `oku fai mai ki ai. Ka e mālie `a e liliu na`e fai `e Molitoni, `o hangé ko e fakalea ko `eni `a Siupeli: Ko e sipinga mahino `eni `o e mālie mo fisifisimu`a `o e liliu fakatonulea `uhinga na`e fai `e Toketā Molitoni. `Oku `ikai ke hā `i he himi faka-Pilitania na`e fa`u `e Felenisisi `a e hingoa `o Samiuelá. Ka ko e laumalie `o e fie fakaongo ki he le`o `o e `Otua `e he toko taha kalisitiane, `o tatau ai pē pe ko Felenisisi, Molitoni, pe Samiuela, pe ko koe mo au, ko ia `a e laumalie `oku faka`amu `a e himi ni ke hoholi ma`u pe ki ai `a e kakai kalisitiane. `Oku fakakoloa `a e fakatonulea na`e fai `e Molitoni he `oku ne fakamaama mai ai `a e tokateline `o e UÍ pea mo e nāunau kakato `o e TALI `O E UÍ. `Oku masiva lea `a e ki`i Pou `Ao `o e `aho ni ke ne fakamatala`i, he ko e fakamatala lelei tahá pē `a ia `oku hā `i he ngaahi veesi `o e Himi 598. ‘E tokoni kia kitautolu, he’etau muimui’i ‘a e kaveinga ‘o e mahina ni: “Ko Kalaisi ‘a e Hala mo e Maama ki he’etau fononga,” ke tau ngaue’aki ‘a e ngaahi veesi ‘o e Himi na’e fakahingoa ‘e Molitoni, Ko e ui `o Samiuela, ‘o tau lotu lilo ‘aki mo fakalaulauloto, ke fai tokonia ai kitautolu ke tau lava ‘o fakato’onga mo’ui’i `a e talanoa mālie `o `Isileli motu`á, ka `oku kei tu’uholoaki ‘i he ngaahi kuongá ‘a ‘ene hoko ko e ama takiloa ki he fononga `a e Kalisitiane kotoa pē. ʻĀnau, Lotu mo e ‘Aukai: Faka’amu hoku loto ke pehe ho’o ui au. Lau hingoa pe ke u fanongo ‘oku fai mai ‘a e fekau: pea u tali, “’E Sihova fai mai ha’o folofola.” --------------------------------------------------------------------- Mei he Halanga Tapuaki maae Kainga Tonga i he UMC
Posted on: Mon, 12 Jan 2015 15:23:04 +0000
Trending Topics
Recently Viewed Topics
© 2015