USAM-in Sports thilah chauh Rajiv Gandhi Stadium hman phal! Mizorama State Level Sports Association hrang hrang 32 inhlawmkhawmna pawl United Sports Assaciation of Mizoram (USAM) chuan sawrkarin a siam mek Mizorama infiammite khelmual hrang hrangte chu sports lama hma kan sawn leh zual theih nan a nihna tur ang taka hman an duh thu an sawi a, a bikin Mizoramin infiamna hmun-hma kan neih that ber Rajiv Gandhi Stadium, Mualpuia mi chu sports thil atan chauh hman ni tawh se an ti. USAM chuan kum 7 zet CPWD-in a thawh tawh, Thenzawla Artificial Turf phah chu thawktu company inthlahdah vangin vawiin thlengin zawhfel a la ni lova, infiammiten kan nghahhlelh em em he khelmual hi football khelmual dang ang bawka tha taka zo thuai tura an duh thu an puang bawk. Zirtawpni (Dt.5 12.2014) tlai khan Sports Association 32 aiawh kalkhawmte chuan Heritage Lounge, Zemabawk, Falkland road-ah General Body Meeting 2014 neiin Resolution hetiang hian an siam- 1. Mizoramin infiamna hmunhma kan neih that ber Rajiv Gandhi Stadium sak meka khelmual - Artificial Grass leh Synthetic Track te chu infiamna (Sports Event) atan chauh hman ni tawh rawh se. 2. Rajiv Gandhi Stadium sak mek thawh zawh tawh chin Artificial Grass leh Synthetic Track te nitin kan hmang luih luih reng a, enkawltu mumal an awm loh avangin a lo hlui tan dawn ta der mai a. Hengte hi Mizoram State Sports Council-in a enkawl turin sawrkarah thlen ni rawh se.
Posted on: Mon, 08 Dec 2014 04:16:15 +0000
Trending Topics
Recently Viewed Topics
© 2015