UTHANDO OLUNJANI OLUNJE Chapter 17 and 18 UTHANDO OLUNJANI OLUNJE Chapter 17 Wabhodla uMcondo wathunqisa imithi yakhe ezama ukubiza uNozithelo owayesemsebenzini ethi uqinisa uthandolwakhe kodwa wamangaliswa yikuthi akasamboni uNozithelo.Ngalolo suku uNozithelo wayezincitshe ukudla ekhuleka esemsebenzini encedisana loXolani ngoba babezile bobabili.Wazama uMcondo kodwa wezwa etshaywa luvalo esesaba wangazi ukuthi wesabani.Wathatha umakhalekhukhwini wakhe watshayela uyise ekhaya. Mcondo kunjani mfana wami. Ngiphilile baba kodwa kukhona okungihluphayo. Hawu ndodana ingabe selisilwa yini lomakoti? Hatshi baba kuhamba kuhle into nje angisamboni lumuntu ugqagqelwe ngumlilo ngizwa ngisesaba. Utsho nje useginqile uMcondo.Ungakhathazeki Ngalonde awumbiwa godi linye ngeke ayendawo lowo ngowakho. Utsho ngethemba uSikhunyana eduduza umfana wakhe emqinisa idolo.Baxoxa balayelana ukuthi uMcondo enzeni kanjani.Langempela wenza kanjalo uMcondo walinda ezakwakhe ngengoma. Wayephakathi kokukhuleka uXolani kungemva kwemini enkulu ngesikhathi sokudla kwemini lapho owabona khona umbono.Wembulelwa uSikhunyana loMcondo bethumela uNozithelo ngezizwe bemfakela ukudinwa lesidina sikhathi sonye.Wasencenga kumdala wezinsuku ngokuthi Babawami,babawami kizozonke izindawo lapho ibizo lami noma elikaNozithelo abizwa khona ngobubi.Ngomlilo langamandla ezulu ngithi konke okubi akubuyele kumakuthumela ngegama likaJesu.Ngiyazikhulula mina ngikhulula loNozithelo.Amen.Wakhuleka umfana waze wezwa esemoyeni ilizwi lisithi sekwenzakele. Lafika ihola elingaliyo akhunyulwa amajogwe lamabhanti abebotshiwe akhululwa.Wabhekisa amabombo kwakhe uNozithelo.Mhlalokho wafika ethabe kakhulu wakubingelela okuMcondo ngokukuqabula.Wakufaka ezingalweni zakhe mamo! Kwajabula kwabamanzi te kuthi imithi isebenzile kanti kuzisubula ngamanzi aqandayo kuthiwa lala lulaza sizokwengula.Uyazi lawe indoda nxa isibanjwe kahle yintombi ijika uvuma zonke.Kwenzeka lakuMcondo esefudunyezwa zingalo zikaNozithelo wavuma ukuyathenga indlu ekhaya ayifake egameni likaNozithelo.Bathi uthando luyawavala amehlo abantu ngiyavuma.Watatazela uMcondo wangani ngumuntu ofuna ukuthena umangoye.Kwathi kuphela iviki isithengiwe indlu kwazise lobunyanga bakhe babundlisa phela usatane nxa uzinikela kuye ukwenzela konke okufunayo ukuze ungakhumbuli usimakade ulibale ngezinto zakhe ukukhohlwe ukuthi yena uzodiliza lokuhlanyela inzondo lobutha.Nxa ungangikholwa ngitshele isangoma esisodwa esingelalaka.Ngempela sonto behla baya ekhaya uMcondo loNozithelo kwafikwa kwahlikihlwa amaphepha indlu yaba ngekaNozithelo. Wabuyela emsebenzini okaNhliziyo inhliziyo imhlophe kwazise wayesukubambile okuMcondo lapho okuzace khona.Wasala uMcondo ekhaya wathi ukucacamisela kancane esadla ubukhosi bomuzi omutsha zalala kuye ukuthi ubukhosi ngamazolo.Ngempela kwakulele kunye ngakuMcondo ukuba kwakukubili kwakuyovusana abone ukuthi usethengele uNozithelo indlu yena engelayo.KuNozithelo kwathi cosololo enhliziyweni ngoba phela umsobho usuzithelile etswayini.Umfana uMcondo wayethi yimithi yakhe eyenze uNozithelo wathi bethenge indlu kanti hatshi uzipheka ngobhojwana umfana usezifake esilaheni.Ngempela umvundla noma ehlakaniphile uyangena engodeni. Xoe darling uze eTembisa sizojabula sonke sibungaze ukunqoba kwami. Kutsho uNozithelo etshayela uXolani ucingo.Ukhuluma ngani Noe? Wena woza ngizakuhlukanisela imbambo lomgogodla usufikile sthandwa sami. Kulungile ngibuyenini ntombi yombango? Hahahahaha wena yazi uze ngolwesihlanu ntambama ukuze sibe lempelasonto yonke kuyimi lawe lombheda. Kikikikikiki yeka ukungilinga satane ingaphi inyanga? Ngiyitshiye ekhaya sthandwa sami Ngizabuya sithandwa.. Kuphendula uXolani esala ehleka yedwa ekhangele umakhalekhukhwini wakhe... UTHANDO OLUNJANI OLUNJE. 18 Gegegegege gagaggagagaga bamba Mcondo.Thatha lapha mfanawami Kuhleka uSikhunyana ngapha ekhuluma yedwa.Eqala ukukhumula impahla egida egcekeni lomuzi egqoke isudu yakhe yokuzalwa.Wawungafunga uthi uyadlala kanti hatshi sezithancile.Ngempela abuhlanya abuqoqodi Sikhunyana nyanga eyesatshwayo nguwe lo osudobha amaphepha sezitshisa utshani ekhanda.Baqinisile ukuthi lilamandla igazi lemvana.Kanti enjalo nje akehlulwa lutho umdalawezinsuku nxa simkhonza simhlonipha ngoba akukho okuthabisa inkosi uma ingehlonitshwe.Ngitsho ngoba uXolani wakhuleka wathi ububi bonke lemimoya emibi ayibuyele kumayithumela yikho sesibona uSikhunyana sehlanya angithi ubelokhu ezama ukuphikisana losomandla ngezimpande zakhe wakhohlwa ukuthi yena uthembele emandleni angelamandla.Amandla aphelayo kwazise nxa sekufike ocwile egazini likaJesu okusatane kumela eceleni kukutshiye esikhaleni wena obekukusebenzisa. Wavuka ngolwesihlanu uMcondo elungiselela ukuthatha indlela eya eNingizimu Africa.Nangempela Konke kwahamba ngendlela ayefisa ngayo abaziyo bathi kwaya ngasifudlana.Kwathi kutshaya ihola lesibili emini yantambama laye ewufulathela umuzi wakoBulawayo.Ufulathela nje kumnyama ebusweni benkawu akakwazi ukuthi uyise usehlanya.Unina labanye batatazela besiya esibhedlela ukuyolaphisa uSikhunyana yena usisitheka esiya kuNozithelo.Elokufa alitsheli bandla abadala babekubonile. KuseTembisa lapha kumnandi kudelile kuzinyoni zothando uXolani loNozithelo.Ubunandi bokuthandana lobabantu abasethandweni kubuzwa kibo ngiyakutshela.Entathakusa selumnandi kakhulu uthandolwabo besenza konke ongakucabanga lapho mngane.UXolani ekhipha bonke ubuciko alabo bokuphulula isithandwa sakhe.KuNozithelo kumnandi kusweleka wona amaphiko kuphela ukuthi aphaphe kwazise uXolani wayelezandla ezibambisa okusibalwenkukhu zilithume igazi ekubileni kwalo umzimba wentombi ubemdambiyana ubuswe yiyo imizwa ibisithatha umuntu imbeke elizweni lababili lothando.Libaqansinse amaqaqa lamaqatshana bephokophele khona enjabulweni engelamkhawulo.Bayiqala inkonzo yababili engadingimfundisi lebandla.Ithe iphakathi isimnandi okwamagama sekuzwakala oaaaah oooooooh aaaaaaah eisssh ummmmmm.Watsho esefikile uMcondo.Wema emnyango walalelisisa wezwa ukuthi kuyasontwa wangabaphambanisi waqonda kuLubelihle.Wazama ukulala kodwa ubuthongo bangehli.Watshiselwa kuqanda umfana esecabanga ukuthi uqeda kuthenga indlu kanti uNozithelo uthi lala butshani uyovuswa ngamazolo.Uyazi ukuthi kukhona okudla amatshontsho emsamu.Waphuma wayakwakhe wafika wathatha izulu lesandla umtshina wokwenza izipoko wanikela koNozithelo. Kazange ebalaze iminwe okanye ebale amabala engwe wafika watshaya isivalo sathi gwabu.Bethuka abasenkozweni uMcondo wavele wavulela ngenhlamvu emakhanda.Wakhanyisa ukuthi ebabone kuhle mamo! Kwathi eqhinqe esikaNandi lapho ebona ukuthi usebulele umfowabo kodwa ayesechithekile engasabutheki kanti lokukhala kwakungasasizi.Wabona ukuthi ubhekwe yisambane ngoba igazi lomfowabo lelentombiyakhe selibizwa ezandleni zakhe.Uyazilawe intukuthelo ifana lendlala nxa uthukuthele wenza izinqumo eziyibuwula kukanjalo lanxa ulambile uyantshontsha uthi nxa ususuthi uzisole.Wabona ukuthi ukulandisa kuzobanzima ngoba kuvele kunzima kwazise kwabambelela lomfazi emuka.Kwehlula ipholisa lathi siyakhuluma phambili.Wathalathaza indlu yonke okwesela lidinga ukuthi litshontsheni qede wathatha iphepha lepenseli ngezandla eziqhuqhayo wabhala wathi Bengimthanda kakhulu uNozithelo ngingeke ngiphile ngaphandle kwakhe.Yona impilo yami ingaba njani ngisazi ukuthi umtakababomdala ubulewe yimi. Maqede wafaka umbhobho ekhanda wazichitha ubuchopho.Bathi bezofika abantu bathola ngezidumbu kuphela.Babala incwadi bathwala imikhono ekhanda bakhuza imihlolo bathi Yimihlolo batayi,yinsindabaphenduli uthenkwani ugiya lefefe.Yisisanasana umtshado wezinja kodwa luthando olunjani olunje abantu sebebulalene. THE END. Luphelela lapha uhambo lwethu bangane bami.Find me on Facebook Nxayezwe Wayne Khumalo.Noma ungilandele kutwitter @Nxastok ngizokulandela nami.Abanye sizohlanga on my page Poems and short stories-nxastok. With all my heart and love sobonana sengiza leyinye indatshana #Nxasto Pls like and share our page Sigiya Ngosiba - Ndebele Novels with Mathanzima, Nxayezwe & Bukhoc
Posted on: Tue, 01 Jul 2014 13:01:04 +0000
Trending Topics
Recently Viewed Topics
© 2015