Ulang siar Cardap@Cerpen Banjar: Halam Macal Wayahini Paasian (Siri 2) Patang ari Sanayan ngintu, Tulamak kada ka bandang bagawi. Wayahitu bandang hanyar imbah talah manajak. Inya taungut saikungan di ambin rumahnya. Babaju parak putih, batapih palikat hirang baturing habang. Di hadapannya sacangkir banyu kupi hangat awan ampat himpil wadai kalakatar hagan nginuman patang. Ruku tunggal batangan dibuat ka bibir muntung. Guris dijapai. Sambil baruku daun, inya taganang kisah 15 tahun halam. Wayahitu jaman kakanakan. Umanya, Makacil Amah rahat basisimpun manyapui ratik di barumahan takipik kabila maniring anak lalakinya ngintu takurihing saikungan di ambin. “Tulamak, kawo baulihi barapa ikung hudah?” Takun Usin Mitak. Tulamak kada bailun. Tatakan halui iwak sapat dicakuknya ka kawat, imbahnya diunjuni tataian muhara lubang walut. “Ganal lubangnya nih, tantu parak malima ratus gram baratnya,” ujar Tulamak di dalam hati sambil badangkak maunjun walut di atas paranggan bandang. Ari hangat, awak hudah limbui awan paluh. Baju wan salawar pulang bilang bacalumutan awan licak. Wayahitu walut RM4.00 amun dijual. Malaran hagan duit pakit sakulahan kakanakan. Saharian Tulamak, Usin Mitak wan Asid Guri tulak mahayau paranggan bandang urang hagan maunjun walut. Parak bajajal kampil baras sasaikungnya baisi ulihan walut nang diunjun. “Huh, banyak ulihan kita ari ngini, duitnya kina aku handak tulak kada Apek Kungkang hak main tikaman,” ujar Asid Guri kaaraian. Sabalum basisiap handak bulik ka rumah, Tulamak, Usin Mitak wan Asid Guri bahinip satumat di tampat nang naung, bawah sapukuk hampalam hintalu di buntut bandang. “Umai, maka sing labatan hampalam ngini, garingitan aku tiring sarungkoian ada nang masak hudah,” kuciak Tulamak badiri cagat di higa pukuk hampalam. “Hampalam sipa ngini?” Takun Usin Mitak. “Mun kada silap, bat Pakacil Hamdan,” padah Asid Guri. “Mun kaitu, panya di hadang lagi! Ayuha!” Kuciak Tulamak kaaraian. Sasaikungnya ancap mamanjati pukuk hampalam bat Pakacil Hamdan, karamian mambantas hampalam di atas pukuk. Aci gugut, biginya dikucupi bahimat, imbahnya ditimbai ka paritan. Kada karasaan, sakalinya Pakacil Hamdan nang palaluan bulik matan bandangnya tatiring pukuk hampalamnya dicuntan Tulamak, Usin Mitak wan Asid Guri. “Woi kanakan macal, umai sawat jua lih mamanjat pukuk hampalam batku manyuntan! Cilakui bapala ikam!” Kuciak Pakacil Hamdan kasasarikan. Muhanya nang karaiang wan sasingutnya nang labat maulah sasiapa gin nang maniring tantu takutan takamih di dalam salawar. Tulamak, Usin Mitak wan Asid Guri takipik. “Bukah!” Kuciak Tulamak ancap tajun matan atas ka dalam bandang. Usin Mitak wan Asid Guri gin umpat tajun. Dijuhutnya kampil baisi ulihan walut tarus maracat bukah ka paranggan bandang. “Cilakui, nasib baik aku manggah kada hingkat manyasah, mun kada rungkupku pang sasaikungnya saja timbaiku ka dalam talaga jamban lawas!” Mamai Pakacil Hamdan. 10 minit dudi, Tulamak, Usin Mitak wan Asid Guri gin bamandak satumat kauyuhan babukah. “Cilakui, katahuan jua urang tuha ngintu gawian kada karuan kita ngini!” Ujar Usin Mitak. “Ngini paranggan bandang Pakacil Hamdan lih, tarai kita kamihi pukuk jagung nang ditanam atas paranggan nih. Maraha inya sarik sunyaan pukuk jagung batnya matian!” Ujar Tulamak pulang sambil tatawa ganal. “Ayuha,” ujar si Asid Guri ancap mangamihi pukuk jagung. Usin Mitak wan Tulamak kada bailun tarus mangimihi aci badiri pukuk jagung bat Pakacil Hamdan. Rami batayuran ilah kucing marau batayur di atang paninian. Talah gawian ngintu, papasingnya gin ancap bulikan ka rumah kaaraian. Puas hati. Baisukannya, Tulamak, Usin Mitak wan Asid Guri takipik kabila tatiring ‘angry birds’ papasingnya sing ganalan ilah hantimun karayi tuha. Bilang gigir satabukan, awan muha kasupanan Tulamak, Usin Mitak wan Asid Guri gin dibawai kawitan tulak batatamba ka Bumuh Angah Ijam. “Bergh ley Toh, ganalnya ai mangalahi batku!” Huluti Bumuh Angah Ijam sambil takurihing. “Kawo si Tulamak, Usin Mitak wan Asid Guri sabujurnya takana nih! Sumalam adakah kawo batayur di paranggan bandang?” Takun Bumuh Angah Ijam. Tulamak, Usin Mitak wan Asid Guri ranai badiam asa barat muntung handak bapadah kisah sabujurnya. “Takamihi anak hantu kuyang nih!” Padah Bumuh Angah Ijam lagi. Bumuh Angah Ijam gin manambai. Baisukan, panyakitnya sasain baampih. Imbah ngintu Tulamak, Usin Mitak wan Asid Guri tulak bahaga Pakacil Hamdan mainta maap. “Kami jara hudah kada hakun maulah kaitu lagi Angahnya ai,” ujar Tulamak ka Pakacil Hamdan. Saminggu hudah kisah ngintu baakhir. Patang ngintu Tulamak babiskar handak tulak ka Pakan Arba malalui jalan tanah habang. Asa handak takamih banar, inya gin bamandak satumat handak bakamih. Tatiring sabatang rapun ganal hampalam kalipisan di higa bandang, inya gin bukah ampah ka situ. Ditiring kulilingnya tagak kadada urang, ancap inya bakamih. “Raauuu brusshhhhhh...” ilun banyu kamih mancurat. Inya kada sadar di balakang rapun ganal nangintu ada saikung babini nang barihat satumat imbah bagawi di bandang. Taparancing banyu kamihnya saikit lagi handak kana awak si bibini ngintu. “Umai lih, purunnya ikam bekamih parak aku, kada supankah?” Takun babini ngintu. Tulamak takipik kabila mandangar ilun suaran babini. Diitihinya badiam saikung babini di balakang rapun ganal ngintu. Marga takipik banar, Tulamak bakajutan takantut sing hangkuian. “Proottt... priit peet!” Baalun ilunnya. “Cilakui, hudah kada supan bakamih, imbah bakamih bakantut pulang lah!” Kuciak bibini ngintu asa garingitan. Kali ngini muha Tulamak liwar habang kasupanan. Kada hakun kalah, inya gin manyahuti. “Saja kaini diang ai, amun ‘hujan labat’ biasanya ada jua ai ‘patirnya’!” Ujarnya badadas bukah ka biskar. “Panya kawo Tuh ai takurihing haja panya diganang?” Takun Makacil Amah. Tulamak takipik tasadar matan ganangnya tadi. “Bah, macal jua lih aku bahari,” ujarnya di dalam hati. Banyu kupi panggung nang hangat hudah dingin dihirupnya gagamatan. Parak Maghrib. Tulamak turunan baair. Cardap: Mohd Akmal Mokhtar
Posted on: Fri, 08 Nov 2013 07:43:53 +0000
Trending Topics
Recently Viewed Topics
© 2015