Uviéu anicia’l trámite pa modificar el reglamentu que va garantizar l’usu del asturianu col Conceyu #ipasturianu El derechu a dirixise a les alministraciones na llingua del país ta establecíu pola Llei d’Usu y Promoción del Bable/Asturianu, aprobada nel 1998, norma que nun siempre ye respetada. Asina asocedió nel mes de mayu n’Uviéu, cuando Xurde García Cilleros, vocal de Voluntariáu d’Iniciativa pol Asturianu, nun pudo tramitar un documentu en llingua asturiana nel Rexistru pola negativa d’un funcionariu por tar nesi idioma. Les quexes interpuestes por esti coleutivu énte l’Ayuntamientu y la Procuradoría Xeneral y el treslláu de la situación a los grupos políticos llevó a Izquierda Xunida a mover ficha y a llevar l’asuntu al Plenu, onde PP, Foro y PSOE aprobaron la redaición d’un testu que regulara l’usu del asturianu nel Conceyu. “Ye dalgo mui positivo”, asegura Inaciu Galán, presidente d’Iniciativa pol Asturianu, qu’anima a tolos uviedinos a “exercer a esti derechu que yá recueye la Llei dUsu, d’obligáu cumplimientu”. Sicasí, el reglamentu nuevu tovía tien que pasar dellos trámites, yá que la oposición tien hasta’l llunes pa presentar enmiendes. Depués ha de sometese la modificación a dictamen en comisión y llevala a Plenu pa la so aprobación final.
Posted on: Wed, 11 Sep 2013 18:43:16 +0000
Trending Topics
Recently Viewed Topics
© 2015