VC INTHLANAH UNIT DUH DAN LAL TIR DAWN Aizawl:‘VC/LC inthlanah party unit te duhdan kan dah lal ber dawn” Dr. R. Lalthangliana, Vice President MNF Gen.Hqrs chuan a ti. Nimin MNF Sub. Headquarters, Lunglei, Mizo Hnam Run Office hawnnaah thu sawiin, Dr. R. Lalthangliana MNF Vice President chuan, “kan hma lawka Village Council/Local Council inthlan lo awm turah MNF chuan thawhpui tur emaw, thawhpui loh tur emaw a siam dawn lo va, party unit te’n a tha ber tur thlira an an duhdan apiang General Headquarters chuan a pawm dawn a ni,” a ti. Dr. Thangtea chuan MNF President, Pu Zoramthanga Myanmar sorkar leh underground te inkara remna palai hna thawka, a kal chu mipui ten tawngtaipui turin a sawm. “Mizorama chhiatna rapthlak tak tak thleng hmanga kumbul kan tan dan chu a ngaihna hriat a har a ni,” Dr. Thangtea chuan a ti a. “Zu zawrh hun a hnai ta hle a, nu leh pa tam tak chu an rum lâwk a ni,” a ti bawk. Congress sorkar chu chhiatna lo thlengah mawhphurhna an la ngam thin lo vanduaithlak a tih thu a sawi a. “Thla hmasa dec. ni 13-a Darzokai lei dawh chim chhanah, CM Pu Hawla’n, ‘mipui nawr chim’ tiin puh tur a zawng a. He Lei(Bridge) hi thla 12 chhunga thawk zo tura tih a ni a. A zawh hun vawi 4 zet sawn anih lai hian, mipui nawr chima puh daih hi ram khat hotupa ber thusawiah chuan a mak hle,” a ti. “Keini chuan Judicial Inquiry, High Court hnuaiah Judicial Officer rintlak chhui ngei kan duh a ni” a ti bawk. Sum chungchang sawiin MNF vice president chuan, “kum 2012 - 2014 chhung ringawtin Reserve Bank of India (RBI) atangin vawi 118 an puk a. Ways and means-in vawi 57 leh, Special ways and means advance-in vawi 61 zet an pûk tawh a. K. Deposit ah cheng nuai 53523.96 tehmeuh an dah a. Chuvangin congress sorkar sum enkawl kawnga an fail na te kan hre chho tulh tulh dawn. Hetiang hi kan dinhmun a nih laiin, kan bugdet bu han keu ila, inrenchem tura ruahmanna ‘fiscal measurement’ an a awm ngai chuang lo,” a ti. Sub. Hqrs. Lunglei President Pu Joseph Lalzawmliana paw’n thu sawiin, niminLunglei MNF Office hawnna inkhawm hi Pu F. Lalsawmkima Vice President, Sub. Hqrs.-in a kaihruai a Rev. JC. Vanlalluia’n hunserh a hmanga, office lenglo party mipui an kal khawm.
Posted on: Tue, 13 Jan 2015 01:23:01 +0000