VOTE CHHIAR TURIN DISTRICT KHAWPUI HRANG HRANG INBUATSAIH MEK (2/12/2013) Mizoram Assembly inthlanpuia vote tla te chhiar turin district khawpui hrang hrangah ngawrh taka inbuatsaih mek a ni. Vote chhiar lai hian Election Commission duh dan angin counting centre tinah micro observer an awm dawn a ni. Aizawl district-a bial 14-a vote tla te chu Pachhunga University College campus-a Counting Centre-ah chhiar a ni ang a, hetah hian counting hall pathum siam mek a ni a, pahnihah dawhkan 10 ve ve dah a ni ang a, pakhatah erawh chuan dawhkan 8 dah a ni ang. Vote chhiar turte chuan December 4 leh 6-ah training an nei ang dawn a ni. Bial 7 awmna, Lunglei district-ah chuan counting hall pahnih, Saikuti Hall-ah ve ve siam mek a ni a, hengah te hian counting table mamawh tawk dah ve ve a ni ang. Counting dupervisor leh assistant-ten December 6-ah training an nei ang. Saiha district-a Saiha leh Palak constituency-a vote tla chhiar nan DC office-ah counting centre siam mek a ni a, hetah hian counting table paruk dah a ni dawn a ni. Vote tla hi aSaiha bial atanga chhiar tan tura ruahman a ni. Vote chhiar tur hian counting supervisor leh couting assitant-te chu training pek an ni tawh. Champhai District-a Assembly bial 5-a vote tla chhiar nan DC office-ah Counting Centre 2 siam a ni a, pakhat chu Emergency Operation Centre ti-a hriatah siam a ni a, hetah hian Lengteng leh Tuichang biala vote tla te chhiar a ni ang a, Counting Hall pahnihna, DC Office General Branch-a siamah Champhai North, Champhai South leh East Tuipui biala vote tla te chhiar a ni ang. Heng Counting Hall-ah te hian Counting Table 8 ve ve dah a ni. Serchhip district-a Assembly constituency pathuma vote tla te chu DC compound-a counting hall pahnihah chhiar a ni ang. DC Conference Hall-Serchhip leh Hrangturzo constituency-a vote tla chhiar a ni ang a, establishment room-ah Tuikum constituency chhiar a ni thung ang. Heng Counting Hall-ah te hian counting table pariat ve ve dah an ni. Vote chhiar turten December ni 4 ah training an nei ang. Kolasib distirct-a constituency pathuma vote tla te chu Revenue office-ah chhiar a ni dawn a, he hall-ah hian vote chhiarna tur dawhkan 12 dah a ni a, vote tla te chu a intahtawlin chhiar a ni ang. Vote chhiar turte chu December 3-ah an training ang. Mamit district-a Assembly constituency pathuma vote tla te chu DC conference hall-ah chhiar a ni dawn a, counting centre tur siam mek a ni. Counting centre-ah hian counting table pariat dah a ni ang a, vote tla chu a bial number indawtin a tahtawla chhiar a ni ang. Vote chhiar tur te chu December ni 3 leh ni 5-ah training an nei ang. Lawngtlai-ah chuan DC conference hall-ah leh BNRGSK hall-ah chhiar a ni dawn a, heng hall pahnihah hian counting table 10 ve ve dah a ni ang. Counting dupervisor leh assistant-te training vawi khat an nei tawh a, vawi khat dang an nei leh dawn a ni.
Posted on: Mon, 02 Dec 2013 04:14:32 +0000
Trending Topics
Recently Viewed Topics
© 2015