Welcome and Keynote Address (Hmar Christian Fellowship Delhi Silver Jubili Lawmna, September 4, 2013) Upa (Dr.) Lalsiemlien Pulamte Chairman, Hmar Christian Fellowship Delhi Vawisuna Hmar Christian Fellowship Delhi Silver Jubili lawmna hun hmang dinga Fellowship memberhai, Delhi-a Fellowship le kohran danga inthawk ṭhuoitu le member hai le khaw danga inthawka mikhuol ditum tak tak hung hai po po ei Lalpa Isu Krista hmingin jubili chibai ka buk chêu a, Hmar Christian Fellowship Delhi aiin ka lawmlut chêu. Vawisun hin eini laia ei hmelhriet dinga ka dit hai inhmelhriettir cheu ka nuom a. Rev. Rothanglien Hmar, Silver Jubili huna ei Speaker hi Diphu, Assamah Lalpa rawngbawlin a nuhmei leh an um a. HCFD inṭan laia mi pawimaw le ṭangkai, Adhoc Committee members, Pu Laldatlien F. Tusing, Dr. Chawngrolien Chonzik le Pu C. Thant Khobung hai ka lawmlût bawk chêu. Chun, HCFD-in a pawimaw le a ṭul huna ser le sang le rongbawlnaah a hmang hlak, Rev. Kh. Thangdailo (tuhin Pune-ah a um tah), Pastor James Zara Joute, Rev. Neilaia Darlong le Rev. James R. Sanate hai khawm an hung thei a, lawm a um. Hieng hai bakah, ei missionaryhai Evan. Raman Lal le Mrs. Jyotsna Lal hai nupa, Evan. Pramod Kumar hai sungkuo, Evan. Rehana, Evan. Vanlaltlan Amaw hai sungkuo, Bethany Convent School-a ei Headmistress Pi Grace Khawbung hai nupa khawm ka lawmlût cheu. Chun, Uttar Pradesh-a ei mission field mi enkawl sawk dinga ei peksawngna hai, Evan. Peter Shiv Ram hai nupa (Nangla Mugaria) le Mr. Sankar hai nupa (Mainpuri) khawm an hung thei a, ka lawmlût nghal chêu a nih. Silver Jibili chuongkai thei dinga mi ṭhuoitu le a ringumna le a thilthawtheinaa min tlawnpuitu le mithlawptu ei Pathien hming chu inpâkin um raw seh. Kum 25 sûnga chieng êm èm a Pathien mizie ei hmu chu a ringumna a nih. Chuleiin, vawisun hin “I ringumna a ropui si” tiin Pathien hming mi’n pâkpui dingin ka fiel cheu a nih. Levitikas bung 25-a ei hmu angin Jubili huna hin leibathai ngaidamna le intânghai suokna thu puongin a um a, chun sin thawa inthawk châwl hadama Pathien thua innghat ngamna thu khawm a mi’n chûktir bawk. Pasiet leia Israelmiin a ram a zawr a, a mà le a mà chen khawm suokah a’n zawr chun Jubili kuma chun a ram chu pêk kîr ning a ta, chang nawk a tih. Chun amà le a sûnghai khawm suok bawk an tih. Isu Krista thina le a thonawkna khan Pathienin Jubili dar a mi hung vuok pek a, Isu Krista’n Pathiena ei leibat hai mi tlâk pekin a mi neitu hmasa, Pathien kuomah a mi tung ding nawk ta a nih. Pathien chatuon remruota chun inman thar nawk theiin ei um a nih. Ei Jubili huna hin Setan suoka intâng la suok theilo/nuomlo ei lo um pal chun sal tânghai suokna hun, lunginsietna hun le zangaina hun Pathienin a mi pêk sung hin Pathien hratna ringsanin suok tum ei tîu. Hratnaw lei le Pathien thuzawm naw leia maní taksa pênghai le maní lungril hai chen suol hmangruo dinga lo intângtir hai khawma ei taksa le lungril, intânga umhai kha insuò’ng ei tiu a, felna hmangruo dingin Pathien kuomah inhlan lem tâng ei tîu. Pathienin Israelhai Jubili huna an ram an enkol dân dingin, “In ramah ieng khawm chîng naw unla, ram chun rà insuopêk a ti cheu a, hnienghnar takin tlàn in ta, a kum ruknaah nasa takin malsâwmna hung tir ka ta, kum thum fâk khawp tharsuok in tih” tiin thupêk le malsâwmna a lo hril a. Kum 49-na chu Sabat kum a ni a, kum 50-na ruok chu Jubili kum a nih. Kum 51-naa chun bu an chîng man nawk ding chauh tina a nih. Chu umzie chu kum thum sûng bu tharsuok ding an nei naw ding tina a nih. Jubili kuma hin Israelha’n an thawsuoksaah innghat ding an nei naw a, Pathienin nasa taka malsâwmna pêk a tiema chun an innghat tawp lem a nih. Chuleiin, Jubili kum hmang ding chun Pathien thu ring le amaah innghat a phût tlat a nih. Vawisûna Fellowship-in kum 25 a tling tah tia jubili lawmna ei siem hin Pathien hratna le a thuah innghat loa kohran thahratna, kohran buhripna, kohran sum le pâi, kohran puitlingna, kohran ro inrèl thiemna, kohran ṭhuoitu ṭha le an thiemna le varna haiah ei lo innghat lem pal ding hi thil inlau um tak a nih. Fellowship ei indin man hlima inthawka mi ṭhuoitu le mi sukhrattu Pathien hring hi ei innghatna ni zing dingin ka’n fui nuom cheu a nih. Fellowship kalchawi pei dân dinga khawm hin Pathien thupêkah malsawmna a um ti hre zingin a ditdân zongsuokin a thu zâwmin Ama-ah ei ringna suknghet pei ei tiu. Mihriem varna, thahratna le remruot thiemnaah innghat nêkin Lalpa Pathien hratna le a thilthawtheina ring a innghat lem dingin ei inditsakpui a nih. Pathien hratna le a thilthawtheinaa innghat hin hàdamna a mi pêk a, hi hi Pathien Kohran hai thaw zongsak dingin ei inditsakpui khawp el. Lal ram rawngbawlnaa hin ngaituo ding, thaw ding, lung inhàngna ding le phurrik phur ding tam tak um sien khawm Lalpa thupêk le a thilthawtheinaa innghat inchûk ei tiu. Pathien ram le sin chu invoi ding ei ni hrim a, sienkhawm Pathien tha hratna ringsan loa invawi chun ei ta dingin sawlna a’n tlun mei mei lem ding a nih. Hma tienga kal ei chawi peinaa hin kum 25 sûnga ei Pathien mi umpuina, a thilthawtheina le a ropuina hre zingin Amaa inthawk thil ropui tak hai beiseiin Ama ta dingin thil ropui tak tak thâwng ei tiu. Ei ngaituona le thiltumhai suk inhrol ei tiu a, ringnaa ram la peia mêl lung pawimaw tak tak hlen pei dingin ka ditsakin ka fiel cheu a nih. A mi kotu Pathienin mi sukhrat a ta mi’n thawtir thei ngêi bawk a tih.
Posted on: Sun, 08 Sep 2013 19:51:53 +0000
Trending Topics
Recently Viewed Topics
© 2015