Willemstad, 24 sèptèmber 2013 MFK TA DESAPROBÁ SPEKULASHON DEN INVESTIGASHON DI KASO PARLAMENTARIO WIELS. Movementu Futuro Kòrsou ta tumando nota di deklarashonnan insistente den prensa ku ta purba involukrá nos movementu den e asesinato tristu di defuntu Parlamentario Sr. Helmin Wiels. Movementu Futuro Kòrsou ta lamentá ku, sin ku tin ningun prueba pa supstansiá tal ponensianan, e medionan aki ta insinuá envolvimentu di nos movementu den e akto kontra defuntu Parlamentario Sr.Helmien Wiels. Movementu Futuro Kòrsou pa medio di e komunikado aki, kier sigurá kada unu di nos votadónan i simpatisadónan ku a depositá nan konfiansa den MFK i henter nos pueblo, ku nos a i ta desaprobá kategorikamente e asesinato repudiabel aki. Manera henter pueblo, MFK tambe ta sklama pa bin klaridat den e krímen aki i e kulpabelnan mas lihé posibel enfrentá hustisia. Nos ta konsiente ku algun periodista i tambe mandatario den e kaso aki tin interesnan partidario pa mancha e bon nòmber i reputashon di Movementu Futuro Kòrsou. Sinembargo Movementu Futuro Kòrsou ta konvensí ku pueblo di Kòrsou ta inteligente i bon konsiente di e manipulashon aki. E atakenan infundá aki, netamente ta motivá i stimulá nos movementu pa sigui enkaminá un proseso di REFORMA, pa yega na stabilidat, pas i trankilidat real den hinter nos komunidat. Movementu Futuro Kòrsou un biaha mas ta suprayá i tambe enfatisá ku nos tin nos konsenshi limpi i nos lo usa nos energia i nos tempu valioso pa sigui traha na bienestar i adelanto di pueblo di Kòrsou. Atentamente, Na nòmber di MFK Amerigó Thodé Presidente Cell.: (5999) 5620616
Posted on: Wed, 25 Sep 2013 01:46:48 +0000
Trending Topics
Recently Viewed Topics
© 2015