Xatırlayırsınızmı ki, cəmisi 3-4 il bundan qabaq ölkənin, xüsusilə gəncliyin gündəmində əsasən şou-biznes, əyləncə və idman xəbərləri idi? O zamanlar gündəmi hökumətin nəzarətində olan televiziyalar müəyyənləşdirirdi. Hökumət də məqsədyönlü fəaliyyətlə ictimai-siyasi mövzuların qeyri-populyar olmasına nail olmuşdu. 2011-ci ildən vəziyyət müsbətə doğru dəyişməyə, ıctimai-siyasi mövzular populyarlaşmağa başladı. Lakin onda da (hakimiyyətin də köməkliyi ilə) müxtəlif istiqamətli müxalifətdaxili qarşıdurmalar gündəmdən düşməməyə başladı. Demokratik düşərgə daxilində mübahisələr, ziddiyyətlər bir çox hallarda hətta gündəmin əsas məsələsinə çevrilirdi. Bir gün ateist-islamçı qarşıdurması, o biri gün ənənəvi müxalifətlə gənc siyasətçilər arasındakı mübahisələr, sonrakı gün Əbülfəz Elçıbəy komandasında olmuşlarla vaxtilə Heydər Əliyev komandasında olmuşlar arasındakı deyişmələr gündəmin əsas mövzusuna çevrilirdi. Bəzən də hansısa çoxbilmişlər tapılırdı ki, ziyalılarla, QHT fəalları ilə, yazarlarla, hüquqşünaslarla siyasi partiyaların arasından "Çin səddi" çəkməyə çalışırdılar. Müxalifətin vahid namizədi haqda isə danışmaq belə çox çətin idi... İndi bunların hamısı arxada qalıb. Ateistlər və inanclılar, vaxtilə H.Əliyev komandasında olmuşlarla Ə. Elçibəyin komandasında olanlar, ənənəvi müxalifət liderləri və gənc siyasətçilər, ziyalılar, QHT rəhbərləri, hüquqşünaslar, yazarlar və siyasətçilər hamısı Milli Şurada birləşib prezidentliyə vahid namizəd olaraq Rüstəm İbrahimbəyovu dəstəkləyirlər. Müxalifətin indiki vəziyyətini əvvəlki illərlə ona görə müqayisə etdim ki, hazırda müxalifətin olduqca əlverişli durumda olduğunu, çox ciddi təkmilləşmə mərhələsi keçdiyini qiymətləndirək. Bir çox insanlar əllərində olan imkanların qədrini itirdikdən sonra bilirlər. Çalışmaq lazımdır ki, bu geniş yayılmış səhvi biz də etməyək. İndiki birlik məqamının qiymətini bilək. Ölkənin demokratik qüvvələrinin Milli Şurada birləşməsi əlbəttə ki, bütün problemləri həll etmək iqtidarında olan sehrli çubuq deyil. Birləşmək avtomatik olaraq bütün problemləri həll etməyəcək. Hələ çox işləməliyik. Amma birlik bizim bu problemləri həll etmək imkanımızı dəfələrlə artırır, bizi gücləndirir, onun qədrini bilib, qorumaq lazımdır.
Posted on: Mon, 22 Jul 2013 18:24:24 +0000
Trending Topics
Recently Viewed Topics
© 2015