ZAM Thupuak :: 03 August 2014 3 AUGUST 2014 BY ADMIN LEAVE A COMMENT ZAM Thupuak ZAM :: Zomi Association of Malaysia Rev. Dr. Do Suan Mung (GZA Secretary) tawh holimna kinei khawm July 26, 2014 in geelna teng ih biak Pasian in hong tangtung sak a Zomi zumpi (ZAM) sungah Dr. Do Suan Mung tawh tawl khat sung holimna kinei thei hi. Nitaak lam ciangin Chinese Assembly Hall ah Malaysia a om khua kipawlna makai te, pawlpi siate leh Zomi a lunglut makai tingteng mimal 70 val kihel khawm thei hi. Hun kipat madeuh in ZAM lam panin mipi theih dinga kilawm UN vai hita leh Insurance vai hi taleh zaksakna limci tak kinei phot hi. Sun nai 2:00pm hong sat lian ciangin a ziakai ngeilo Rev. Dr. Do Suan Mungleh a nungzui teng Hall sung hong lut uh a, kipatna la dingin“How Great Thou Art”pah ziahziah hi. Rev. Thang Do Khen in hunap thungetna hong neih khit ciangin Chairman asem Sia Kam Mung in maithak muakna hong neih khit ciangin, a kizomin siapipa thungen hong kipan pahin“Kei pen a tamzawin youtube pan ka thugenna leh group mail sunga ka laigelhte tung pan bek nong thei ding uh hi”-in amah leh amah hong kigen masa hi. Hiciang dinmun a tun theihna ding hamsatna tuihual nawkna a tuak khak teng atom ziau a hong gen zong pen a thuak baih ding hi peuhmah lo hi. India ah LST sang akah lian loh hangin USA ah sangkah theih ding hunlem ngak in kum khat val mah na om veve a. A sawtlo in a nungta Pasian in lampi honsakin 1981 kumin San Francisco khuapi sunga LST sinna sang hoih penah hong kahto thei hi. Tuahun lai-in USA ah Zokam zatpih ding gen loh Zomi mahmah zong muh ding hamsa mahmah hi. Kum 4 sung sitset USA gamah sang akah khit ciangin pahtawina laidalpi tawh ih Zogam hong ciah kik a, Laisiangtho sang hong kipanto in ama sang pan a khangkhia mipil honpi khat om ta hi. Minam leh gam it ing ci-in awng awng se takei leh minam a veina leh Zogam a itna kilang manin Dr. Chin Do Kham in mual hong liamsan khit ciangin ama dinmun ah GZA makaipi te’n koih ngam giap hi. A thungenna ah“Zomi na hihna zumpih kei in, Zomi a na pian khasia kei in”ci ngiat hi. Zomi hi ingh aci khempeuh Zomi hipah lel a, amau tenna peuh Zogam hipah lel hi. Zomi te gam 30 valah tenna munkip nei ta hi hang. Nikhat ni ciangin Israelte bangin ih gamah ih ciah kik hun hong tung dinga tuani ciangin Zogam ah pau leh ham, pilna siamna a kicingin om ding ahihman in gamdangmi ten ei gam Zogam ah pau-leh-ham bek hilo pilna siamna cihte hong sin ding uh hi. Zomi te hizah a gam tampi ah kikhen thaang a ih om pen lam khat panin thupha hizaw kha ding hi. Bang hang hiam cihleh USA leh gam thupite pen ei Zomi te a tamzaw in eima pilna leh siamna tawh a tungzo dingte hi peuhmah lo hihang. Zomi te kawl kumpi hong ciaptehna ah laithei lo pen leh a zawng pen minam himah talehang ei nungah hong khangkik ding khangthakte dinmun ka et ciangin ei khangah Zomi te sunni (Zo Sunni) hong taan nai kei mah taleh khangsawntetua Zo Sunni nuaiah nuam takin na khawsa ta ding uh hi cih pen ka mukhol thei ta hi ci hi. Pasian in ei Zomi te aa dingin ih tel zawh ahi lo geelna lianpi nei hi cih kitel khin hi. Tulaitak ih hamsat hun hi mah taseleh lungkia lo in mainawt ni. Mi pawlkhat ten tulaitak a UNHCR huhna tawh gamdang tungte zuauthu tawh a tung uh hi ci uh hi, ahizongin kei muhna ahi “hi khinlo hi, ih gam ki ukna pen ahoihlo himah hi”ngiat hi. Ahi mah ahihi. Ih Kawlgam pen tuni ciang dong biakna vai tawh kidodo lai uh a, mualtungmi thautawite tawh akidona uh zong khawlsan nai tuan lo uh hi. Democracy hun sungah kilut ta hi ih cih pong hangin khuahun leh thupiangte ih et ciangin Democracy tawh kigamla semsem lehang kilawm zaw hi. Mi tampite’n“kei mi mawkmawk hilel ingh, Zogam leh Zomi ka vei hangin ka sep theih bangmah om tuan kei”-in dinkhawl thei uh hi. Tua bang ding hi lo hi. Zogam leh Zomi aa dingin na sep theih khat om veve hi, tua pen“Thu nanget simin na minam Zomi leh na leitang Zogam hong mangngilh ken”hi. GZA tawh kisai thu kidong a dawnna ah“GZA pen Pasian longal midang hi lo ding hi. GZA in kipawlna dangte bangin membership a lak loh zenzen hangin member a nei lo hi lo hi. Zomi a kici khempeuh koimun koikuam ah om ta leh bang biakna bang pawlpi zui taleh GZA member hipah hi. GZA ih cihpen tanglai Israel te Siampite’n a makaih mah bangin Pasian nasem Siampite makaihna hi a, Party leh politics tawh kisai lo hi. Minam aa ding nasem a hi uh hi” ci hi. Tutung Census tawh kisai thu kidong pen hibangin dawng hi“ 914:ZOMI tawh kisai sepna bawlna ah sum-leh-pai tawh tha hong pia no Malaysia gam a om Zomi te tungah lungdamna kong pulaak hi. No nong khak uh pen Tulza Sawmnih val ahihi”acih khit ciangin a thugen hibangin hong zomto leuleu hi, “ZCD Party in ih minam ZOMI in Code neiloih hihmanin Code dang 914 tawh ih minam ZOMI dinpih suak ni hong cihna uhtawh kizuiin ZCD Party tawh mapang in na akisem khawm hi a, 914 ah Zomi gelh ding cih Zomi khempeuh theih dingin a pulaak khia ahihi. GZA makai lutangpi teng thukimna ahihman in makaipi teng lakah Zomi gelh lo khat zong om in um keng. ZOMI pen ih pu ih pa te kilawhna ih minam min hi. Ih tenna Zogam hong siik masa mangkangte leh Missionary te gelhna laibu sungah zong ei pen Zomi mah ci a hong ciapteh uh ih hihi” ci hi. Tua ahihman in ih minam ZOMI pen zanmah a hong piang hi lo hi. Kawlte leh hong tello pawlkhat te bekin CHIN hong ci uh hi bek hi. Zomi na hih zumpih ken la, Zomi a napian sese angtang zaw in. Zomi a kici nuamlo Zomi honkhat te zong a sawtlo in hong ciah kik lua lel ding uh hi. Napau Zopau/Zokam zumpih ken la namdangte lakah pau ziahziah ngam in. Na Zomi ngeina kan inla a hoihna tel sawm in. Bang hang hiam cihleh minam picing na hih a kilatna a hihi. Zomi te pen ih maisuah sangin ih sunglam hoihzaw pek hi. Ih mipil masate minuai ah na om lo uh hi. Mipil zah mahin napil uh a, misiam zah mah nasiam uh a, mi theih zah mah na thei uh hi. Zomi tampi tak mi namdang mipilte tungah tuang ta uh hi. Zomi te pen Pasian amuang minam ih hihna hang limlim in zong Pasian a nusia namdangte sangin ih mailam ding enhuai zaw ta hi cih mangngilh kei ni ci hi. Thudong nuam tam semsem a, ahi zongin hun kicinlahna hang leh a dawng ding Rev. Dr. Do Suan Mung gim leh tawl ding khualna tawh hun a kihial bawl suak hi. Amah pen 28-30 July sung EBC Crusade bawl ding a hong zin hizaw hi. Ahun manpha tampi hong hawp zawh mipi kilungdam pha mahmah hi. Numeite kikep dan ding: (Misiam te genna hi) 1. Numei khat a innah a ciah ciangin Lift (Datlikar) sungah a meltheih ahilo pasal dang khat tawh a tuan khop khak zenzen ciang a lunglau pian leh bangci kikep ding? Gentehna in tua numeinu omna inn dawlpen 13 na ahih leh manlah takin dawl khatna pan dawl sawm-leh-thumna ciang dong a meekte meek gai pah in hileh lauhuai nawn lo hi. Bang hang hiam cileh tua pasal pa in hong suam nuam hong buan nuam ahih phial leh zong na tuanna Lift(Datlikar) pen dawlsim ah khawl toto dinga, kongkhak kihong toto lel ding ahihman in hunlem om man lo ding cihna hi. 2. Na inn sungah nang bek na om laitakin mi dang khat hong lut in buan hong sawm leh bangci kikep ding? Na inn sungah nangbek na om laitakin mi dang khat hong lut in buan hong sawm leh manlang takin na anhuanbuuk sungah lut pah inla na mat theih khempeuh man inla denna pah in. Zasanvui/aisanvui na muh masak pen leh tua tawh amai theh pah in. Temta,pakaan, belneu belpi cih bangin na muh bangbang tawh deng pah inla na thaneihzah in awng pah ziahziah in. Na anbuuk sunga nisim na vanzat te pen nang hong hung thei galhiam hoih suak thei hi cih mangngilh ken. Tuabanah hih banga mi nawngkaisak nuamte deih loh penpen in‘Thawm’ahi hi. Agin ngaih thei bang pen in thawm bawl lecin na buaina teng veng ziau thei hi! 3. Zankim laitakin Taxi nazat leh bangci kikep ding? Na Taxi zat sungah na lut madiak in bawlpen leh laidal tawh na Taxi numbat ciamteh pah in. Tua khit ciangin Taxi sung panin na handphone tawh na innkuanpihte/lawmte na vai teng kitel takin Taxi hawlpa zaak ding leh telsiam ding ngiat in zasak pah in. Gentehna in na hopihte’n Phone ana lak kei zenzen uleh zong a hopih na kineih theih veve ding kisam pen hi. Tua bangin hoih takin hih setset lecin na gaalpa pen na lawmhoih suak thei hi. Bang hang hiam cileh na omna mun leh na taxi numbat khempeuh kicing takin na innlamte zasak khin na hihlam Taxi hawlpa in thei ta ahihman in hong nawngkai sak ngam nawn lo dinga, na tunnopna mun ah nuam takin hong khak ding ama mawhpuak hi ta hi. 4. Na Taxi hawlpa in lampi tuam azuih a na lunghimawh pian leh bangci kikep ding? Na Taxi hawlpa in lampi tuam azuih a na lunghimawh pian leh na thungkuahgui man pah tiuteu inla Taxi hawlpa nung lam panin a ngawngah vial inla deih tak lehkaih pah in. Thungkuah leh a dang bangmah na tawi kei lehzong Taxi hawlpa puan-ak ngawng nunglam panin deih tak lehkaih tiuteu lel lecin na thu hong mang pah dinga, lampi maan hong zuih pih pah lengleng ding hi cih mangngilh ken. 5. Zankim na vaak laitakin na nungah hong zuizui a om zenzen leh bangci kikep ding? Zankim na vaak laitak na nungah hong zuizui a om zenzen leh na tuah masak pen sai khatpeuh sungah lut ziau lel in. Sai a kihon nawn kei leh zong sumthohna (ATM box) te sungah lut lecin vai siang pen hi. Bang hang hiam cihleh ATM box pen a cing Security-guard a om den banahCCTV kithuah gai hi. Nang hong zuipa in a meel mite tel ding deih lo ahihman in hong zui nawnlo lel ding hi. Bangbang ih cizongin mikim ih pilvaang den ding kisam masa penpen hi. Theihding: ZAM zumpi panin Zolai tawh a kilet khia hi. UNHCR-IAD tawh meeting kinei July 30 ni-in REMEDI Insurance vai tawh kisai UNHCR Conference Hall ah nitak nai 2:00pm in kinei kik hi. Hih Insurance a leinuam Zomi khempeuh in ZAM zumpi ah min sazian nong piak na dingun deih sakna lianpi tawh kong zasak uh hi. Tzu Chi Foundation leh ZEC-M&T Tzu Chi Foundation vaihawmna tawh August 1 ni-in Taiwan panin lengla 30 valtawh ZEC-M&T siamsin naupangte zingsang nai 8:00am pan 12:00pm ciang khantohna ding kimawlna tuamtuam bawlpih thei hi. Selayang Zatopi napai leh na UN copy pua in Selayang Zatopi na pai ding a leh UN card copy pua hamtang in. Napuak kei a leh discount ngahlo ding hi teh. Taxi WHL 780 zuihloh ding Khua sung vak taxi kawm ding peuhpeuh in hih taxi WHL 780 zuih khak hetloh ding. Tukal Palaai te buaipih diak teng Niang Sian Hau (Heilei) te nuta August 1 ni-in USA visa tawh kisai sisit pih. Vial Nem Cing (Mualbem) August 1 ni-in Tung Shin zato ah ki buaipih. Pau Van Muang (Tungzang) Jinjang lockup ah kibuai pih. Dal Muan (Kawlpi) IPR ah ki buaipih. UN Card Kimu Thang Sian Khup UN card kimu in ZAM zumah hong ki ap ahih manin aneipa in ZAM zum hong lale teh. Nang Card lo zatsawm kei-in Zoto paina, nasepna, mat le hen khat peuhpeuh ah na card zanglo a mi dang card na zatsak a ahih leh zum pan hong kibuai pih zolo ding hi. Tua ahih manin na paipaina ah na card puak ding mangngilh ngei kei in. Thongkia laidalpi ngah man kizaih nailo te ZAM zum hong zasak un Zomi thongkia a suakte leh laidalpi tawi a man kizaih nailo khempeuh in ZAM zumpi ah hong zasak un. UN zumah man kizaih dingin hong ki paipih ding hi. Navak ciang RM50 pua hamtang in Khua sung navak ciangin a tawmpen RM 50 or RM100 pua hamtangin. Deih loh pen tuahsiatna tuak le teh nang adingin hong honkhia zo ding hi. Hehpihna tawh hongkan pih un Sanggam nu Lia Dim Sian Nuam (Sim Suangzang) July 15, 2014 ni-in a thong tanna pan suakta in khua sung hong tun ciangin a dawn dingte tawh kimu theilo in tuni ciang contact kingahlo. Athei kha na om uh leh ZAM zumpi ahih kei leh hih phone tawh hong contact un. Muanpi Ph. 018 220 1456 ZAM Hall ki kawmthei ZAM Hall pen Session khat (nai 4 sung) RM200 ki lading a, nai 4 khitciang azatbehtoh nopleh naikhat RM50 ki lading hi. Aki zangthei vanteng: Aircon, Tutphah 150, Sound System, Drum Set 1, Wired Mic 1, Wireless Mic 2, Usher Counter leh adang tuamtuam. Note: Guihtheih khamtheih zat ki phallo hi. ZAM ah Ngeina puan leh vante kingah ZAM zumpi ah ih ngeina Zopuan leh vante ki leithei hi. Aki ngahthei van te: Zopuan: a bantawng leh a bansau (pasal), Zoniik nam tuamtuam (numei), Puandum, Zodial, Zodial naikhau (silk), Puanlaisan, Tanghciin, Khephiau, Zokhi, Zo Lukhu, Zo thungkuah etc. Dotbehnop aom leh ~ Ngai Hau 010-823 0571 ZAM Palai sungpan kua tawh kizomding Kimat kihen natuahkhakleh: Sia Tuangpu : 016 254 4093 Sia Thaa Mung : 016 646 5375 Tanzung (Embassy vai) Sia Joseph Mangsen : 016 374 9423 Zato vai kisapna aomleh: Sia Kep Lian : 014 369 4897 Sia Kam Mung : 016 995 6231 Sianu Ngaih Hau : 010 823 0571 Nasep vai: Sia Mangpu : 019 510 6413 ZEC Sangvai: Sia Khoi Tuang : 010 286 6189 Laigelh sakvai: Sia Francis Lamthang : 014 225 9458 ZAM Card bawlna Sianu Cii Cing : 011 1282 8482 ZSM/Genvai Sia Kam Mung : 016 995 6231 ZAM Card tawi Zomi te ading nasep UNHCR-EST nasep zonsakna pan Cafe a sem ding mangpau or malay pau thei kideih. Khasum pen sialo ding hi. UNHCR-EST pan mahin Johor Bahru KFC sai a sem dingin Zomi citak mi kideih behlai hi. A lunglut khempeuh ZAM zumpi ah na min sazian uh hong piapia un. Setzung a sem ding pasal citak 20 kideih hi. Omna pia, an pialo. Nipi nisim off. Alunglutte kizopna ding: Mangpu 018 377 9858 UN Sisitna mun IOM MHD Malaysia 2nd Floor/Level 3 KPJ Healthcare No. 1, Jalan Pahang, 53000 Kuala Lumpur, Malaysia, General Line : 03-9235 5400 USA lengding te tentan kahna F&B Business Park 18 Jalan Metro Pudu 2, Fraser Business Park Jalan Pudu, 55100 KL (Near LRT Chan Sow Lin) Australia lengding te tentan kahna A 14-6, Menara Atlas Plaza Pantai Jalan Pantai, Rharu 59200 KL, Ph. 03 9235 5431 ZAM Zumpi Address 155A, Jalan Maharajalela, 50150 Kuala Lumpur Office Tel: 03 2142 6659/03 9226 1926 Hotline: 016-293 9027 Lungdam kohna Zomi Catholic (ZCCM, St. Joseph Church, Sentul) pan tukal Thupuak bawlna ding RM50 hong piakhia leuleu uh ahih manin lungdam ihko hi. ZCCM Pawlpi tawh na kizop nop leh: Francis Khampi 016 269 1351. Myanmar Believers Fellowship (MBF) Sunway pawlpi panin Thupuak bawlna ding RM50 tawh ma hongpang leuleu ahih manin lungdam ihko hi. Pa Biak Lam Tuang (Lamzang) in ZSM huhna dingin phal takin RM 20 a sum tang sitset in hong pia ahihman in kilungdam mahmah hi. Gamsung gampua leitung muntuamtuam pan ZAM nasepna te tha napiak nopleh lungdamtak in hongkisang ding hi. Address: 155A Jalan Maharajalela, 50150 Kuala Lumpur Office Tel: 03-2142 6659 Hotline: 016-293 9027 Email: zomiassociationmls@gmail
Posted on: Sun, 03 Aug 2014 07:06:56 +0000
Trending Topics
Recently Viewed Topics
© 2015