ZRO in Press Release suah LAMKA, March 30: Ministry of Information and Public Relations, Zomi Re-unification Organisation [ZRO], GHQ a pan Press Release kimu in a taklatdan in, March 29, 2014 nitak a Friends of the North East kichi Assam Rifles pawl in Apollo Veng, Churanchandpur ah a gial uh suahkhe nawn uh hin taklang hi. Zomi Revolutionary Army [ZRA] nuai a Anti-drug Cell pawl in damdawi khamtheih a sumdawngte om chih thuguk a ngah in, thil omdan enkhe ding in ZRA cadre bangzahhiam sawl hi ua, himahleh India malsuahbial mite lawm chih a om Assam Rifles pawl in thil omdan bangmah kan masalou in a galvante uh ana zatkhum uhi. Hiai thiltung ah cadre 2 naktak in liam ua, kapliam a om cadre 1 leh liamlou a mat a om cadre 1 tu in Assam Rifle custody ah omlel uhi. Suspension of Operation [SoO] nuai a om ZRA cadre-te tung a hiai bang a gamtatna pen thil deihhuailoutak ahihban ah hiai thiltung in mi vantangte lak a dipkuatna tun hin taklang hi. Pawlpi tuamtuam in khamtheih douna a pan nasaktak a, a laklai a Assam Rifles pawl in khamtheih a sumdawngte humbit a, a nasep pen a khawlsan hun mahmahta hin leng tallang hi. ZRA cadre-ten khamtheih dou a, a lawm uh India malsuah bialmite lawm kichite mai a hangsantak a nna a seplai ua, hiai bang a Assam Rifle-te gamtatna in khopi sung a khamtheih zuak leh hihte humbit uh ahihdan langsak hi. Churachandpur mipite a bik in nupi pawlten inn nna tamtak taisan a khamtheih douna a pan a laklai un, Assam Rifle-ten bel khamtheih a sumdawngte humbit leh veng uh hin Press Release in taklang hi. Zenhang Lamka V/A in mohpaihthu puang LAMKA, March 31: Zenhang Lamka V/A chairman/chief in tuni a thusuah a bawlna ah, a paita March 29, 2014 nitak a Zenhang Lamka huamsung a om Apollo Veng a Assam Rifle-te gamtatna naktak a mawhpaih ahihdan taklang hi. Hiai thiltung a AR-ten mawhna neilou mi 2 leh Zomi Revoutionary Army [ZRA] cadre 2 a matte uh kintak a khahkhe ding a ngen kawm in Churachandpur mipiten khamtheih naktak a dal ahihdan leh security force kuaman khamtheih a sumdawngte humbitna dia thuneihna neilou uh hin taklang hi. Tua banah ZRA in Churachandpur a kipan khamtheih beisakna ding a pan a lakna uh gum leh tawsawn zel ding ahihdan taklang kawm in security personel-ten hiai bang a khamtheih douna hihbuai nawnlou ding in ngen hi. Tua banah India Malsuahbial mite lawm kichiten a gamtatdan uh khek a, a minlel hilou a, ahihnatak uh langsakzaw ding inleng ngen hi. - See more at: zogamonline/news/lamka-post/item/1164-the-lamka-post-|-april-01-2014.html#sthash.90Ykqpyw.dpuf - See more at: zogamonline/news/lamka-post/item/1160-the-lamka-post-|-march-31-2014.html#sthash.vmG5KiQ2.dpuf
Posted on: Tue, 01 Apr 2014 14:18:07 +0000
Trending Topics
Recently Viewed Topics
© 2015