źinsa wót župnego pśedsedarstwa wobzamknjone. Stojnišćo župy Dolna Łužyca z.t. k drugemu nacerjenju brunicowego plana wugloweje jamy Wjelcej-pódpołdnjo, delejwjeźenje do rumowego źělnego wótrězka II Domowina-župa Dolna Łužyca z.t. (w dalšnem: Domowina) pokažo na swóje doněntejšne stojnišća w toś tom planowańskem procesu: 1. Stojnišćo w pśigótowanju scoping-termina za strategiske wobswětowe pśepytowanje, dnja 24.06.2009; 2. Stojnišćo dnja 17.10.2011 k prědnemu nacerjenju brunicowego plana za wuglowu jamu Wjelcej-pódpołdnjo a 3. Zjawne słyšanje pó wugódnośenju 4857 stojnišćow k planoju, dnja 13.09.2012. Wóne stojnišća su se diskutěrowali a legitiměrowali we wótpowědnych gremijach našeje župy a płaśe až do źinsajšnego. Wustawkam našogo towaristwa wótpowědujucy, wobkšuśujomy ako zastupnica zajmow serbskego luda našo wótpokazanje dewastěrowanja dalšnych jsow w sedleńskem rumje Serbow. Wónje stoje pód wósebnym šćitom kraja Bramborskeje a su unikatne a ireparabelne mozaikowe kamuški w zgromadnosći jadneje awtochtoneje mjeńšyny, kótaraž ma se šćitaś a spěchowaś. Mimo togo pokažomy na wobzamknjenje našogo župnego pśedsedarstwa z lěta 2007. Pó napšašowanju našych towaristwow a kupkow jo se tegdy wugroniła wjelika wětšyna našych cłonkow za to, až njedejali se pśizwóliś žedne nowe wuglowe jamy we Łužycy. W nastupanju pozicije Domowiny su wuwjeźenja brunicowego plana w zaměrje 17 na bokoma 57 a 58 pśeśiwjate, a to togodla, dokulaž su se wezeli wšake źěle ze stojnišća, mimo togo, až jo se glědało na jich zwiski. Wopacna interpretacija našogo stojnišća wugronijo samo, až pódpěrujomy jadno pśesedlenje a až se zaběramy w prědnem rěźe z ramikowymi wuměnjenjami za pśesedlenje, a to w zwisku z pósuźenim Serbskego instituta. W tśeśem wótrězku na boce 58 sugerěrujo se samo, až žycymy se ze serbskego wida jadno pśesedlenje, dokulaž by wóna Prožymarjam pomogała, swóje serbske kórjenje wukšuśowaś. To njejo na žeden pad našo měnjenje. Južo w prědnem stojnišću k brunicowemu planoju smy k tomu jadno jasne a zasadne wugronjenje wótedali: „Dejałej Bramborske kněžarstwo a krajny sejm pśeśiwo wšym wócakowanjam pśigłosowaś póžedanjam Vattenfalla, akle pótom naraźijo pśedsedarstwo Domowiny-župa Dolna Łužyca slědujuce napšawy, aby se wuchowali serbske wósebnosći.“ Dnja 09. Měrca 2000 jo se wuznała tegdy hyšći samostatna gmejna Prožym we wobzamknjenju gmejnskeje rady za to, až pśislušajo sedleńskemu rumoju serbskego luda. Wóny status płaśi teke źinsa hyšći ako měsćański źěl Wjelceje. Artikel 25 Bramborskeje wustawy a Serbska kazń stajijotej woplěwanje a spěchowanje kultury a serbskeje rěcy pód šćitom kraja Bramborskeje. To wósebne jo, až stoj teke serbski sedleński rum pód šćitom kraja Bramborskeje. Art. 25, wótstwak 1, sada 1 krajneje wustawy wopśimjejo: „Pšawo serbskego luda na šćit, zdźarźanje a woplěwanje swójeje narodneje identity a swójogo starodawnego sedleńskego ruma se zarucyjo.“ Bramborske wustawowe sudnistwo jo wugroniło w lěśe 1998 w tak pomjenjonej Rogojskej kazni měnjenje, až jadna se pśi tom wó Statny zaměr pśesegajucego wuznama, wósebnje za šćit zwisowatych městnosćow. Wustawowe sudnistwo jo póstajiło, až ma se pśewjasć wobšyrny a konkretny proces wótwažowanja mjazy jadnotliwymi šćitanja gódnymi dobytkami krajneje wustawy Bramborskeje, dejali se dalšne jsy starodawnego serbskego sedleńskego ruma dewastěrowaś. (glej wusud w jadnanju wó pšosbje kontrolěrowanja normow wót boka wótpósłańcow krajnego sejma Bramborskeje b. 67 sl.). „Za tym su se póstajili kaznidawarjeju wuske granicy pśi pśesajźenju a wugótowanju šćitnych winowatosćow z artikla 25 … Kaznidawaŕ jo napominany, aktiwnje wustupowaś za statkowny a pśiměrjony šćit serbskego sedleńskego ruma a jo napominany wónym zajmam wjeliku wažnosć pśiśpiwaś pśi kaznidawarskich rozsuźenjach.“ Wopyt pśewjeźenja wótwažowańskego procesa w pśedlažecem brunicowem planje njewótpowědujo razka w swójich zachopkach pominanjam a směrnicam wustawowego sudnistwa. Móžo se wót togo wuchadaś, až pśewažyju zajmy górnistwa we formje klawsule za zawěsćenje surowiznow abo dla strukturnego spěchowanja (art. 44 krajneje wustawy). W toś tom paźe ma se wšo wjelgin kradosćiwje mjazysobu wótwažowaś, tak až jadno zbande gódnośenje wobstanjo teke pśi pśespytowanju pśez sudnistwo. Zakład zašćitowanja Prožyma njejo jano jogo pśisłušnosć starodawnemu sedleńskemu rumoju Serbow, ale teke ten samy fakt, až stoj pśi wudobywanju brunice eficienca w srjejźišću. Klawsula socialnego stata wopśimjejo kazń za šćit słabšego w towarišnosći. Pśisłušnosć jadnej pśipóznatej narodnej mjeńšynje dopołnijo wóne wuměnjenje, dokulaž njeby mógał serbski lud mimo pódpěry stata pśez dlejšy cas pśežywiś. How njejadna se wó formalne, pšawniske rownostajenje, ale wó identitu dawajuce napšawy we wšyknych wobcerkach žywjenja. Ako pśikłady mógu se how w źinsajšnem casu mjenowaś struktura wobydlarstwa a sedleńskego ruma, kubłaństwo a modality w zjawnej słužbje. Mamy w toś tom zwisku za trěbne, až se pśepytujo, w kótarej měrje ma se glědaś w kaznidawarskem póstupowanju brunicowego plana na mjazynarodne zawězki mjeńšynowego šćita, kótarež jo ZR Nimska na se brała. Tak jo ratificěrowała ZR Nimska na pśikład Europsku Chartu regionalnych a mjeńšynowych rěcow a ramikowe dojadnanje Europskeje rady za šćit narodnych mjeńšynow. Wóne wobšyrne směrnicy a zawězki glědajucy na šćit serbskego luda maju se w narodnem pšawje zwopšawdniś. Nazgónjenja Serbskeje rady su, až stajijo se kazń w takich nastupnosćach jano późělnje do statka abo až se docełego njeglěda na kazniske směrnicy zwězkoweje kazni. We wobłuku se wótměwajucego procesa monitoringa pśez Europsku radu jo se kritizěrował kraj Bramborska cesćej dla swójogo pózwjeršnego a wlacatego wobchadanja ze zwězkowymi kaznjami, glědajucy na zapśěgnjenje do narodneje pšawniskeje struktury zwězkowych krajow. Z pśedlažecym pósudkom wót DIW Barliń stajaju se nowe pšašanja glědajucy na energijowu strategiju krajnego kněžarstwa, a to wósebnje pód glědanišćom energijoweje změny w Nimskej. Rownocasnje pak pósudk na pšašanje wótegronijo, kak by se mógało z nastanymi problemami wobchadaś. We wěrjobnej a logiskej argumentaciji se rozkładujo, až njejo notne wuglowu jamu Wjelej-pódpołdnjo dalej wjasć, a to póbrachujuceje energijowopolitiskeje trěbnosći dla. Twarźenje w nacerjonem planje, až mógali nastaś až do lěta 2030 brachy w zastaranju z energiju jo łagodne a połne rizika. Z tym bywa plan skerjej snowanje lobbyistow brunice a jeje profitěrow. Wustawowy nadawk w ramiku energijoweje strategije kraja Bramborskeje, pomina se zastaranje z wěsteju energiju, kótaruž móžo kuždy zapłaśiś. Wóny nadawk njenamakajo se w teksće wustawy, ale wótwóźujo se z principa socialnego stata a ze šćita dostojnosći cłowjeka (glej b. 24 w nacerjenju plana) a dej se něnto zazdaśim z brunicowym planom dopołniś. To pak pomina pó našom měnjenju , až ma se zachopinaś z jadnym ze zagronitosću wjeźonym procesom wótwažowanja (ako górjejce naspomnjone). Facit: Nowa kwalita słyšanja k planoju w slědnem lěśe, Hirschhausen-pósudk, cwiblowanja wobswětowego ministarstwa glědajucy na dłujkodobne dalejwjeźenje wudobywanja brunice a pśiběrajuce woboranje nic jano ze stron pótrjefjonych pśeśiwo wótwórjenju nowych wuglowych jamow su jasny wuraz za to, až se wóna wuglowa jama za wšym zdaśim njepśizwólijo. Pśewjele dypkow powědajo pśeśiwo njej. Ze zachopinanim z energijoweju změnu popušćujo akceptanca za brunicu, pśedewšym wobswětowych a klimapolitiskich pśicyn dla. Pśez pśiběrajuce wužywanje se wobnowjecych energijow, jo pśecej mjenjej brunice trěbne a połne wužywanje wuglowych milinarnjow wóteběrajo njewótchylnje. Argument, až jo Łužyska brunica njewuzbytna za stabilne zastaranje z milinu ma se pśecej wěcej do pšašanja stajiś. Togodla wugronijo se Domowina za rědowany a planowany wótstup wót brunice, což pomina se rownocasnje malsne pśeźěłanje brunicowego plana za jamu Wjelcej-pódpołdnjo, a z tym njedalejrozšyrjenje jamy na źělny wótrězk 2. Pśedlažece nacerjenje plana njejo dało žedno pśeznanjece wótegrono na pšašanje, lěc jo wudobywanje brunice w jamje Wjelcej-pódpołdnjo II z energijowopolitiskego wida za zawěsćenje zastaranja z energiju napšawdu njewobinjece, wósebnje pśed slězynu energijoweje změny. Plan se togodla z našogo boka wótpokažo. Wuraznje comy pśipóznaś a pódpěraś wopěranje a jasnu poziciju Wjelcańskich měsćańskich wótpósłańcow, wětšyny Prožymskich wobydlarjow a wjelesych drugich relewantnych mócow towarišnosći, kótarež se stajaju pśeśiwo nanuzowanemu pśesedlenjeju a wótwórjenju noweje jamy. Njeby dejało se na to zabyś, až jo se how woprowało za gigantizm brunicoweje industrije južo 16 jsow, z cymž jo se jadno bogatstwo našogo regiona njewrośnje pśepaliło.
Posted on: Wed, 21 Aug 2013 19:53:31 +0000
Trending Topics
Recently Viewed Topics
© 2015