Енді Варгол (Andy Warhol, Andrew Warhola, Андрій Варгола; 6. авґуста 1928, Піттсбург — 22. фебруара 1987, Ню Йорк) — америцькый малярь, ґрафік, філмовый автор і ведуча особность америцького руху поп арт. Быв то Русин, котрый ся став світознамым умелцём. Дїтачі рокы і ранна карьєра: Andrew Warhola ся народив в америцькім Піттсбурґу русиньскым іміґрантам, котры походжінём были з Ракусько-Угорьского села Микова (днесь часть северовыходного Словеньска). Точне дата ёго народжіня не є цілком ясне. В жрідлах годен найти дакілько даных, котры одказують на рокы 1928-1931. Наконець Варгол сам твердив, же ёго родный лист з року 1930 є лем фалзіфікат. Найчастїше ся як дата ёго народжіня споминать акурат 6. авґуст 1928. Варголів отець, Андрій Варгола, робив в угольных банях і на будовах в Пенсілванії. Енді мав іщі двох старшых братів, Джона (Яна) ай Паула (Павла). Вшыткы вєдно жыли на піттсурзькій 55. уліцї Білен. Родина была ґрекокатолицькой віры. Як дїтина ся Енді трираз нервово зосыпав; першыраз, як мав вісем, а потім іщі двараз бігом слїдуючіх двох років. Варголовы умелецькы схылы ся проявили уж скоро. Енді штудовав область комерчной дізайновой творчости на Карнеґіго технолоґічнім інштітутї (Carnegie Institute of Technology) в Піттсбурґу, де ся стрїтив з такыма особностями, як быв наприклад Філіп Перлштеін, знамый малярь експресівных актів. Завершінём штудія здобыв тітул бакаларь образотворчого уменя (Bachelor of Fine Arts). По абсолуторію ся в роцї 1949 переселив до Ню Йорку і гев зачав успішну карьєру ілустратора рекламных часописів і дізайнера рекламных матеріалів. Бігом 60. років ся Варгол выпрацовав - з автора інзератів ся став єдным з найславнїшых умелцїв своёй добы. Із своїма сполупрацовниками дефіновав основны терміны той декады. Зачав малёвати знамы америцькы продукты, як наприклад бляшанкы Кемпбеловой поливкы од компанії Campbell Soup Company. Тыж ся занимав творчостёв портретів такых знамых особностей, якыма были наприклад Мерілін Монро, Елвіс Преслі, Мугаммад Алі, Троі Донагу або Елізабет Тейлор. Окрем іншого дізайновав днесь уж преславну фляшку на Кока-Колу. В тій добі Варгол основав умелецьке штудіо „The Factory“ („Фабрика“), в котрім ся обколесив шыроков шкалов умелцїв, писателїв, музикантів і андерґроундовых целебріт. В авґустї зачав Варгол з масовов продукціов сїтодруку. Намагав ся так вытворити уменя нелем з масовых продуктів, але і в масовім чіслї. Метода ґумяного штумпля му зразу зачала припадати „барз домашня“. Проголосив: „Єм незвычайно пасівный. Беру річі так, як суть. Лем ся на них смотрю, позорую світ.“ Тым, же в добі творчого процесу мінімалізовав погляд на дїло, роспутав умелецьку револуцію - ёго роботы ся стали дуже швыдко нелем контроверзны, але і популарны. Дїла, якы выникли в тім часї, были споєны передовшыткым з америцьков поп-културов. Варгол зображав різным способом доларовы банковкы, целебріты, значковы продукты і образчікы з новиновых фраґментів. Тоты предметы ся стали на першый погляд на полотнї роспознательны і часто мають силный ефект на масы. Тот факт Варгола фасціновав найвеце, а зато є зъєдинюючім елементом вшыткой ёго творчости 60. років.
Posted on: Thu, 30 Jan 2014 18:18:52 +0000
Trending Topics
Recently Viewed Topics
© 2015