أول مرة أشوف الشكل ده من الناس .. في البداية قطعوا الشجر و خلعوا طوب الرصيف علشان يقفلوا الطريق و مايعدوش العربيات و أنا و أخويا واقفين مستغربين من اللي بيعملوه , أصلك بتخرب في المكان اللي انت بتمشي فيه و بعد كده يكسروا زجاج العربيات ... شفتهم كان جوه واحد فيهم غل غريب لدرجة انه كل واحد يقدر يشيل حجر من حجارة الرصيف لوحده من كتر الكراهيه اللي جواه ... بعد كده شفتهم جريوا علي الجمعيه و يقولوا لبعض "تعالوا .. و يهتفوا ضد المسيحيين " فتلاقي كام واحد غشيم و يزقوا في الباب الحديد اللي ماخدشي منهم اكتر من دقيقتين و اتفتح ... اتفتح باب جمعيتي ليكشف عن "ثورة جياع" , دخلوا اخدوا كل حاجة تقريبا لحد صناديق البيبسي الفاضية و كنت فاكرة ان ده أخر التعدي و هايمشوا بعدها لكن بعد كده سمعت صوت عالي أوي ليكشف لي عن بعد جديد مشوفتوش بعيني قبل كده , صوت بيقول"تكبييييييييييييير" و كلهم يردوا "الله أكبر" "الله أكبر" و فجأة وقفت و انا بتفرج على المكان اللي اتربيت فيه بيتحرق ... بيتحرق ؟؟؟ !!! ....... و ولعوافي الكنب اللي كان في أوضة الإستقبال و حطوه وسط الشارع .. مش قادرة أوصفلوكوا أد ايه كان الغيظ واصل جواهم لدرجة انهم زي ما يكونوا عايزين ياكلوا حيطان الجمعية بتاعت "الكفرة " زي ما هما بيقولوا ...كنت في الأول حزينة جدا و بعيط و مش عارفة أقول ايه والا ايه والا اتصل بمين والا مين ؟؟؟ ... طب هاقولهم ايه ؟؟؟ "الجمعيه بتتحرق " ؟؟؟ !!!! لكن وسط ده كله كنت متقويه و فيه ثقة غريبة بتقولي "احنا لسة مكملين " "احنا لسة موجودين " و يمكن ابتسمت على تفاهتهم و قلت ابليس في المكاان ده بالذات يااما عمل بس رضه احنا مكملين و هانبني فيكي يا جمعية مش بس أفكار , هنبني فيكي من أول الحجارة اللي هي أسهل الخساير ... و مش احنا بس اللي هانبنها , احنا و كل الجيران المسلمين اللي كانوا متربيين معانا في لطف الله و اللي كانوا من أول الناس اللي وصلوا و قعدوا يطفوا في النار .. احنا عارفين مين ((((( قلب الحكاية ))))) احنا وسطيها .. وواثقين فيه .. و ادينا بنجرب و نشوف و نتقوى .. صدقوني أنا اتقويت أكتر من إني خفت و بكيت ... هبه سرور
Posted on: Thu, 15 Aug 2013 01:53:42 +0000