إلى كل صاحب مبادئ إلى كل أهلي وأصحابي متخليش اعتراضك عالاخوان أو كرهك ليهم يخليك تتنازل عن مبادئك أو حتى تسكت عن حاجات أنت شايفها جريمة في حق بلدك ونفسك متخليش ده يخليك تسكت على فرض العسكر رأيهم عليك وأنت كنت بتنادي قبل الانتخابات وتقول يسقط حكم العسكر متخليش ده يخليك فرحان في مصريين بيتقتلوا أو بيعتقلوا من دون وجه حق ومن غير لا إذن نيابة ولا بتاع زي أيام قانون الطوارئ وأهلهم ميعرفلهمش طريق وأنت كنت بتنادي قبل الثورة وفي الثورة ياحرية فينك فينك الطوارئ بينا وبينك متخليش اعتراضك عالاخوان يخليك تشمت في اخواتك المصريين اللي ماتوا واللي ممكن كان يكون فيهم واحد من قرايبك وانت زعلت على قتل الشيخ عماد عفت وسحل المصريين في أحداث الوزرا ومحمد محمود واللي اتفقعت عنيهم زي حرارة لو لسه فاكرينه ماتخليش اعتراضك عالاخوان يخليك تتهم النساء الشريفات العفيفات في الميدان واللي أنت مشوفتش بعينك منهم أي جريمة أخلاقية وتقعد تهلل وتقول نكاح مش عارفة ايه وقرف متخليش كرهك للاخوان ينسيك قضيتنا الاصلية تحرير المسجد الاقصى وتخلي الاعلام يخليك تقول يستاهلوا واحنا نساعدهم ليه فاكر لما كنا طلبة ايام حسني مبارك في 2000 وبعدها لما قامت الانتفاضة الفلسطينية وكنا بنهتف خيبر خيبر يا يهود جيش محمد سوف يعود ولا هي هتاف وخلاص مدعيتش أبدا ولا والدك دعا قدامك وقال اللهم ارزقنا صلاة في المسجد الاقصى أو شهادة على أبوابه متخليش الاعلام يصورلك ان كل اللي نازلين دلوقتي مؤيدين للاخوان ولا لسياساتهم ولا لمرسي وإدارته للبلد في الفترة اللي فاتت اللي نازلين نازلين لانهم مخلوش عدم اتفاقهم مع الاخوان ينسيهم مبادئهم أغلب اللي في الميادين ناس زهقت من التيارات والاحزاب والجماعات ونزلت بس عشان حريتها وكرامتها واحترام صوتها وآدميتها عشان تعيش في بلد نظيفة وولادهم وولادك يبقالهم حق في حياة كريمة زي ما كلنا بنحلم ولو لسه مش مصدقيني أنا عازماكم بكره عندي عالفطار وهنزلكم بنفسي تشوفوا بعينكم لكن لو أنت اتخليت عن مبادئك بسبب كرهك لجماعة وشخص أنا مش عايزة أتكلم معاك وحزينة على الصداقة والاخوة والصلة اللي كانت بيننا وهفضل أدعيلك في صلاتي وفي إفطاري أن ربنا ينقي قلبك ويرشدك لطريق الصح والخير
Posted on: Mon, 15 Jul 2013 01:22:14 +0000
Trending Topics
Recently Viewed Topics
© 2015