اليوم الثالث بدون تدخين اليوم الاول والثانى مفيش بينهم اختلاف كبير نفس الصداع والرغبة الشديدة جداً جداً للتدخين اللى انا مش لاقى لها فى اللغة العربية اسم غير كلمة عامية اسماها (خرمان فحت) فحت=جداً ، المهم اليومين دول عدوا على خير بدون سجاير بفضل الله اولاً وبمساعدة شوية حاجات كدة .هقول لكوا عليها لو حد بيفكر يجرب اولا : البعدعن المدخنين وعدم مشاهدة التدخين ولو حتى فى صوره واخفاء جميع متعلقات التدخين ( الولاعة،الطفاية، ورق البفرة ، الخ) ثانياً : القراءة المستمرة لاضرار التدخين واثاره المدمرة وخصوصاً فى اوقات ضعف العزيمة والتفكير فى السجاير (لو حسيت انك هتنخ)التفكير الدرامى فى الناس اللى مسئولين منك ومصيرهم لو حصلك حاجة لا قدر الله (حين ميسرة هيعمل شغل عالى) ثالثاً : عدم فعل العادات اللى كانت مصاحبة للتدخين ، على سبيل المثال انا كنت متعود اشرب قهوة وسجارة برة فى وقت الراحة بين الحصص دلوقت مبطلعش برة الفصل وبشرب اى حاجه غير القهوه ، الموضوع ده مهم جداً لأنه مرتبط نفسياً بالتدخين وبعدك مؤقتاً عن العاده المصاحبة هيساعدك كتيير ، رابعاً : اشغال الوقت بالكامل فى شئ يشد انتباهك خامساً : وده الاهم ، كلنا عارفين ان نقطة ضعف المدخن المقلع وقتين (بعد الاكل ووقت النرفزة) بعد الاكل: لازم تغير المكان اللى بتقعد فيه تشرب كباية الشاى مع السجارة وتحاول تعمل اى حاجة تشغل ايديك فيها خصوصا الربع ساعة اللى بعد الاكل على طول ( اقعد اغسل فى سنانك ،خد دش ) النرفزة: ديه بقى امرها سهل بس محتاجة مشاركة ، لازم المدام تكون بتشجعك و حاسة ومقدرة الحالة النفسية والعصبية اللى بتمر بيها وانت بتبطل وانت برده تحاول متحتكش فالحوار كتير معاها ، او تطلقها وتنتبه لصحتك وتبقى ترودها بعد ما تبطل احسن اليوم الثالث النهاردة احساس الرغبة والصداع قلوا شوية او ممكن اكون انا الى اتعودت عليهم مش متأكد بس الاكيد ان انا كنت متوتر وبتنرفز بسرعة جداً بالمقارنة بالعادى بتاعى. ماكنتش طايق حد يكلمنى فى الشغل واول ماوصلت البيت هموت واشرب سيجارة ، جتنى فكرة انى اشغل نفسى واكتب التجربة دية وكل اللى بحس بيه على الفيس افيد بيه حد او حد يفيدني ، اترددت شوية وقلت اية الهبل ده ، بعد تفكير لقيت ان لو انا كتبته والناس عرفوا انى ببطل وخصوصاً اصحابى المدخنين(اصحابى كلهم يعنى) هسمع احلى ألش وأكيد ده فى حد ذاته هيكون عامل محفز لي لا تراجع ولا استسلام واليكم المستجدات أولا بأول.....
Posted on: Thu, 26 Sep 2013 14:17:48 +0000
Trending Topics
Recently Viewed Topics
© 2015