انا مش عارفة هاقدر اوصل رأيى ولا لأ بس هحاول. انا عاوزة اقول انى لو كنت مكان البرادعى كنت غالبا هعمل زيه و فى نفس ذات الوقت، انا مع وحدة البلد و مؤسساتها و اننا كلنا لازم نأكد للعالم ان الاخوان اعداء للدولة و ارهابيين و محتلين و انهم ماكنوش معتصمين سلميين و الحاجات دى كلها. لكن مش شرط مع كل ده نقول البرادعى غلطان. الراجل متسق مع نفسه و طول معرفتنا بيه بتأكد انه شايف ان التمسك بالمبادئ افضل طرق الوصول للهدف و هو كان ضد فض الاعتصام بالقوة و احنا عارفين ده و عارفين كمان انه هدد بالاستقالة فى حالة فض الاعتصام بالقوة و عارفين أكيد انه وعد كل المسؤليين الدوليين اللى قابلهم ان الاعتصام مش هيتفض بالقوة و انه لو اتفض هيستقيل، و اديه أهو بيوفى بوعده، مش معنى ان الراجل عارف قدراته و حدوده و امكانياته انه غلطان. هما ماسمعوش كلامه و اتصرفوا من دماغهم من غير ما ياخده برأيه، يبقى من حقه يستقيل. هو بكل بساطة مش هايعرف يشتغل تانى لأنه مش هايقدر يدافع قدام العالم عن اللى وعد بعكسه و فى نفس الوقت لو الصحافة العالمية حبت تصطاد فى المية العكرة، هو مش هيسمحلهم و هيأكد على وحدة البلد بحكومتها و جيشها و شعبها و على خيانة الاخوان و تهدديدهم للأمن القومى. غلطته الوحيدة معانا انه نسى يكلمنا احنا و يقولنا ايه البدايل السلمية اللى قال انها كانت مطروحة و مقبولة. البرادعى دلوقتى و لا بيحرجنا قدام العالم و لا حاجة. العالم كده كده مش فاهم حاجة و اللى فاهميين و ناويين على حاجة، مش استقالة البرادعى هى اللى هتشجعهم او لأ. بالعكس اصلا، رجوع البرادعى للمعارضة تانى و تأكيده من صفوف المعارضة طول الوقت على اجرام الاخوان، ده اصلا ممكن يكون اكبر مصلحة و احسن بكتير من انه يفقد مصداقيته، ده حتى كارت كويس لو كان فيه اى محاولات للكلام مع الاخوان، هيبقى عندنا شيخ الازهر و البرادعى يقدروا يفتحوا بقهم تانى و يقولوا انهم ماوافقوش على فض الاعتصام بالقوة. و كده كده قوتنا فى عددنا ووحدتنا و ايماننا بحقنا فى الدفاع عن بلدنا و دورنا فى وحدتنا ورا مؤسساته حتى لو ماكنتش عاجبانا او حتى لو فيها فساد و علينا و على محاولات الاصلاح من الداخل مش من الميدان التالت.
Posted on: Wed, 14 Aug 2013 18:57:32 +0000
Trending Topics
Recently Viewed Topics
© 2015