صحة شريبتكم جميعا قرأت ما جاء في تصريحات وزير الداخلية حول إغتيال المرحوم، الشهيد بإذن الله محمد البراهمي التصريحات صراحة لم تفاجئني، هاذي حكومة متع شجاعة و رجولية؟ من وقتاش؟ كان جاء فالح راو م البارح -بإستثناء الجهلة، الكل يعلم أنه الإغتيالات من عند التكفيريين تسبقها فتوة و تكفير للضحية، و فتوى موش سرية : تشرح أسباب تكفيره و الدليل الشرعي، موش لعبة! و فتوى موش من عند الي يجي! بدون وجود الفتوى : حتى بعد ديني ماهو موجود في القضية، و يصبح وصف القاتل بالمتشدد الديني، خارج عن الموضوع! شد عندك يا بن جدو : السيد مكشخ زادة! فاش تصلح المعلومة؟ في حتى شيء! كيفها كيف متشدد ديني في غياب الواعز الديني للإغتيال -سؤال بالله، كيفاه عرفوه القاتل؟ بصماته على سلاح الجريمة؟ لا سلاح الجريمة ماهوش عندهم! تعرف عليه شاهد عيان؟ ما شافو حد! تي إمالة؟ جاهم الوحي؟ أه نفس السلاح الي قتل بلعيد : خاطر عند بن جدو لا يجوز شرعا إنك تعطي سلاحك لحد آخر و إلا أكيد القضقاضي الي عنده توة 5 شهر محاصر في جندوبة، بعث حمامة زاجلة لبن جدو و إعترف -باهي، هالتكفيري أكيد عنده جماعة تكفيريين يخدمو في تونزيانا باش تقصت الإتصالات نهار إغتيال بلعيد، و جماعة تكفيريين في البلدية باش قص الضو في الشارع الي يسكن فيه بلعيد، و جماعة تكفيريين يعسولو على البراهمي و يتجسسو على تاليفونو باش عرفو إلي ماهوش في المجلس على عكس النواب الأخرين الكل! برشة تكفيريين في الحكاية يا بن جدو! تي هاك كفرت الدولة العميقة الكل! -ثم هالأطنان متع السلاح الي زعمة دخلوها من ليبيا الكل، و يستعملو نفس السلاح؟ هكة سخفو عليك ما حبوهاش تصعاب باش تربط بسهولة مع قتل بلعيد! توة موش قلت جايبين برشة سلاح؟ و بهايم لدرجة إنهم يستعملو القديم، باش الشبهات تنحصر فيهم و تلقاها إنت فيسع! ياخي يحبو يتشدو هاذم؟ تره كان إستعملو سلاح آخر، إش كنت بش تحكي اليوم؟ تي إستنى، حتى أنا ما أصغر عقلي، نجاوب فيك بالمنطق، علي الحرزي في سوريآ و أبو بكر الحكيم في سجون فرنسا مروان بالحاج صالح أستشهد في سوريا أما موش مشكل، حكاية التيار المتشدد باهية، إتداعب المعتقدات الراسخة و تعجب جماعة الدولة العميقة! ما نستغربش ملي صدق الي الحكومة تنجم تسترجل، ملي صدق الي السبسي ديمقراطي، الي صدق إنه حلان المجلس و حطان حافظ السبسي يحكم و جوهر بن مبارك وزير الجال و ألفة يوسف وزيرة رفع التحديات باش يمنع جماعة المتشدد من الإغتيال من إنهم يصدقو إلي واحد ميت في سوريا، جاء قتل بلا فتوى و لا سبب و بنفس السلاح المرحوم البراهمي! على كل، هاو بش نزيد السيد الوزير معلومة سرية للغاية : الي قام بالإغتيال لابس نفس هاك المريول الأزرق متع نبيل السعداوي! الي يبعثلك في سلام محرحر المهم، هاو نتيجة التكفيري المتشدد فمة مبادرة لسحب قانون تحصين الثورة، هاو طلع عندك الحق : القاتل طلع تكفيري متشدد جدا : تكفيري بالديمقراطية أكيد الولية عندها يد! خاطر سبحان الله، الباجي يقول لن يمر القانون، و أذنابه تربط وقف الإرهاب التكفيري المتشدد بسحب القانون : الولية تستجيب و تهبط واحد ميت و تخرج واحد من حبس فرنسا باش يعملو الإغتيال و يصبح ممكنا طرح "الموضوع" الغريب إنه الي يضحكو على من قال سيدنا جبريل في ميدان رابعة، يدافع و شاد صحيح في حكاية الميت في سوريا مشارك في الإغتيال المهم، هالتكفيري المتشدد نجح في توحيد اليسار التونسي، بعد إغتيال بلعيد و البراهمي : تحلت مشكلة الزعمات و بقى حمى الزعيم الأوحد : ما فشلو فيه توة 50 عام! بركاتك يا تكفيري متشدد باهي، و توة سؤال للي صدقو الي هو من باب ديني، مزلتو إتطالبو بحل التأسيسي و حمة و بن نتيشة و منيف يحكمو؟ إش مدخل التأسيسي؟ حسب سفسطتكم حل التأسيسي قال شنوة النهضة متواطئة، إيه و تو! ماهو أرساو على بر : يا تكفيري متشدد و سيبو التأسيسي، يا التأسيسي و إرخيكم من ريق متشدد في الأخير : المنطق السياسي و الجنائي، المنطق فقط : الوحيد المستفيد، الوحيد الي عنده مصلحة إذا خذينا في الحسبان التوقيت و الطريقة و الربط مع بلعيد : هوما الجبهة و النداء و تمرد(نفس العباد) أصر على إتهامي ليهم بأنهم الوحيدين الي لهم مصلحة في الإغتيال! و أنهم من التيار التكفيري المتشدد بالديمقراطية أه قبل ما ننسى، قلك 42 نايب بش ينسحبو! ردو بالكم ما يغموكمش : بش ينسحبو موش يستقيلو، كان صارت حاجة هانهم يوليو أبطال، قعد المجلس : شهرياتهم تمشي! و تحيا الغمة و شكون قتل شكري بلعيد؟ شكون قتل محمد البراهمي؟
Posted on: Fri, 26 Jul 2013 21:12:53 +0000
Trending Topics
Recently Viewed Topics
© 2015