طيب الرفاق حائرون في موقفي: - انت عايز ايه بالظبط؟ - انا ؟!! انا عايز عيش وحرية وكرامة وعدالة اجتماعية و القصاص - طيب وعندك حل غير اللي احنا ماشيين فيه ده يحققلك الحاجات دي ؟ - والله ياجدعان انا معنديش حلول مؤكدة.. انا - وغيري كتير - كان عندنا "تصورات" معينة لتحقيق الحاجات دي.. منها اني اهاجر كندا ... لكن لو اصريت قوي علي اني احقق ده في مصر .. فشفت الحل في اني شاركت في ثورة ٢٥ يناير اللي بتوع ثورة ٣٠-٦ العسكرية المجيدة بيقولوا عليها "احداث ٢٥ يناير" .. وكانت تصورات الثورة عن تحقيق هذه الاهداف هي : ١. اسقاط النظام الفاسد الفاشي الديكتاتوري ٢. اقالة النائب العام ٣. تطهير الشرطة الفاسدة ٤. تطهير القضاء الفاسد ٥. تطهير الاعلام الفاسد ومحاكمة صبيان الرقصات الصحفيين والاعلاميين ٦. عمل دستور جديد يضمن العدالة الاجتماعية و يحد من صلاحيات الرئيس ونفوذ العسكر اللي دولة داخل دولة.. و يسمح لاغلبية البرلمان بتشكيل الحكومة. ٧. القصاص ومحاكمة كل من تسبب في قتل متظاهرين سواء شرطة او بلطجية او تعذيبهم داخل السجون او فتح السجون ٨. تمكين الشباب من المناصب الحكومية الخدمية زي المحليات والمحافظات و ياسلام لو الوزرات كمان. ٩. محاكمة كل الفاسدين سياسيا و ماليا امثال احمد عز ومبارك وعلاء وجمال .. الخ ١٠. وطبعا طبعا طبعا الحرية بقاااااا ... - طيب يعني اكيد انت كنت معارض للاخوان؟ - طبعا ! واسباب معارضتي كانت هي هي اسباب معارضتي لمبارك بالاضافة عليها لكدب الاخوان .. الاعلان الدستوري الديكتاتوري .. الدستور اللي ماحققليش اي حاجة من اللي كنت عايزها... لا طهروا القضاء ولا الشرطة ولا عملوا قصاص و حتى النظام اللي انا اسقطته مش هما .. بدآ يرجع تاني .. والحرية اللي انا انتزعتها بنفسي من بق العسكر ومبارك .. بقيت كل ما استخدمها واقول رآيي يتقال عليا ضد الدين او فلول او كافر او علماني ليبرالي ماسوني متحول. زود علي كده ان الاخوان فاشلين مهنيا و احترافيا في ادارة البلد بشكل جعل الشعب كله ضدهم و جعلهم يبرروا ده بالاعلام الفاسد .. اللي بالمناسبة مرسي لم يفشل في تطهيره .. مرسي ماحاولش اصلا .. الاخوان عينوا وزير "تعالي وانا اقولك فين" في تطويع الاعلام الحكومي و عملوا قنوات ليهم لشيطنة الاعلام الخاص وبث الاكاذيب باسم الدين. بالاضافة لتآجيل انتخابات البرلمان سواء بمزاجهم او بحكم قضائى فهما فشلوا في ده .. زود كمان الخروج الامن للعسكر و الكذب والتدليس علي اي واحد يعارضهم و التحجج بان المعارضة كلها علي شاكلة حمدين و موسي. يعني من الاخر ال١٠ نقاط اللي انا نزلت عشانهم ماتحققش منهم غير اقالة النائب العام اللي هو اصلا كان فاضله شهور ومدته تخلص.. وكمان قرار اقالته جاء بحركة غبية ديكتاتورية. والحمد لله كنت واقفلهم بالمرصاد طول الفترة دي و ضد كل افعالهم و اتحدى حد يجيبلي كلمة شكر في اي حد اخواني اثناء السنة ونص بتوع العسكر و سنة مرسي.. و كنت مع اني اديهم فرصة واول مرة قلت يسقط حكم المرشد كان يوم ما استشهد شباب في الاتحادية وبعديها المقطم علي يد شبيحة الاخوان. - قشطة . يعني انت مؤيد لثورة ٣٠-٦ المجيدة اللي قضت علي حكم الاخوان؟ - اولا. ماسمهاش ثورة... افتح اي قاموس عربي انجليزي او معجم عربي او ويكيبيديا و دور علي كلمة انقلاب .. هتلاقيها بالحرف تنطبق علي اللي حصل. ثانيا. دي لا مجيدة و لا بتاع.. دي عبارة عن كرنفال احتفالي يضم جميع فئات الشعب الكنبي والفلولي والثوري و العسكري والشرطي ولا تتضمن اي فعل ثوري حقيقي. ده غير انها لم تحقق لي اي حاجة من ال١٠ حاجات اللي انا عايزهم. بالعكس الاعلام بقا احقر و النائب العام رجع رغم ان مدته خلصت. - الله الله الله .. انت عامل زيهم وبتقول ده انقلاب .. انت ماشفتش الناس اللي كانت في الشوارع؟ -حضرتك شفتهم وكنت معاهم والله . ده لا ينفي ان عدلي منصور طرطور وان العسكر هما اللي ماسكين. - وانت عايز مرسي يرجع تاني ؟ - لاء مش عايزه . بس مش عايز العسكر برضه ومشاكلي معاهم كبيرة وفي دم وشرف وعرض بيني وبينهم. -اه يبقي انت من بتوع الشرعية وبتاع ؟ - شرعية مرسي بالنسبالي سقطت يوم ما عمل الاعلان الدستوري اصلا و ملوش شرعية عندي . - عسكر السيسي غير عسكر طنطاوي علي فكرة. - لا ياراجل. و لميس دلوقتي غير لميس ايام الثورة . و خيري دلوقتي غير خيري ايام الثورة. ده اسمه اي كلام . وطول العمر العسكر عسكر. - طب انت بتشكك في وطنية الجيش المصري يعني ولا ايه؟ - حضرتك الجيش المصري زيه زي مصلحة السجل المدني زي اي مؤسسة في الدولة.. كتيانة و مليانة فساد و بيسترزقوا من تآجير قاعات الافراح.. ده غير انهم دولة داخل دولة و لهم صلاحيات تتعارض مع "العدالة الاجتماعية" اللي انا بزعم اني بنادي بيها. - طب انت شايف الحل ايه بدل ماتقعد تلت وتعجن كده.. احنا خلاص فوضنا الجيش يتعامل مع الارهاب. - الجيش مش محتاج تفويض يقوم بعمله.. الجيش محتاج غطاء شعبي يقوم بجرايم حرب و افعال استثنائية غير قانونية بحجة حماية البلد من الارهاب. - سبحان الله ياجدع! انت بتدافع عن الارهاب المسلح؟ شكلك اخوان والله.. البلد في ظروف محتاجة ان السيسي يضرب بعنف. - سبحان الله ياجدع انت.. انا مش موافق علي اي اجراء استثنائي يعطي صلاحيات ديكتاتورية شمولية للعسكر . لان هكذا تبدآ الديكتاتورية. هتلر برضه فرض الحكم العسكري بحجة ان بلاده في خطر .. ومبارك برضه قعدنا ٣٠ سنة تحت قانون الطوارئ بحجة مكافحة الارهابيين. افوضه في ايه ؟ انا شفت كمية دم و مذابح في عهد العسكر استحالة انساها. - انت عايز ايه يعني برضه؟ - انا عايز ال١٠ حاجات اللي قلتلك عليهم في الاول ودلوقتي دول سبب معارضتي للعسكر بفجره باعلامه القذر بفلوله بعبيده بمشجعيه.. ودول اللي مابقوش سبب خلاف بيني وبين الاخوان لانهم خلاص بقوا معارضة زي زيهم مفيش في ايديهم حاجة. دايما مطالبي دي سبب معارضتي للنظام. وبسم الله ماشاء الله لو مش واخد بالك يعني الفلول رجعوا زي الاول واكتر .. ده ياراجل في وزرا اتعينوا كانوا حرامية ورجعوا اللي سرقوه. الشرطة بتنزل ترقص في الشوارع وعند اول بادرة عنف بيجروا يستخبوا ويسيبوا الشعب طايح في بعضه... الوضع اسوآ من ايام الاخوان بكتير ... الاعلام بيقول ان الاخوان هما سبب فتح السجون وموقع الجمل والمذابح كلها و الاحتباس الحراري و فشل الدولة.. في حين ان الكهربا و البنزين و الحياة رجعت فل من يوم ٢٩-٦ .. سبحان الله .. هي اقدام . وكآن اللي كان مانع البنزين مرسي . الاكاذيب الهبلة زي ان غزة كانت بتشفط البنزين و ان حماس كانت مش عارف ايه .. اي سيرش يبين ان استهلاك غزة من البنزين اقل من استهلاك مدينة نصر يعني. الترويج والتسويق في الاعلام لضرورة محاكمة مرسي بتهمة التخابر دون الاشارة الي ضرورة محاكمته بتهمة قتل المتظاهرين عشان القضية دي هايتلط فيها مديرين امن و شرطة من حبابيب النظام العسكري الحالي. الخلاصة اني ضد العسكر حاليا اكتر من الاخوان ... زي مانا كنت ضد الاخوان وهما في السلطة اكتر من العسكر... وقرفان وبيجيلي رغبة في القئ المستمر من محاولة الفكر الناصري الحمضان الترويج للسيسي علي انه ناصر جديد .. وشتان مابين ده وده .. ده غير اني اصلا مابحبش عبدالناصر. بالاضافة الي اني حزين فعلا اني شايف ناس بيستحمدوا قتل المتظاهرين في رابعة بحجة ان في ارهابين في سينا وثوار بيعملوا شير لصور مؤيدي مرسي ماسكين عصيان وشوم و مكتوب تحتها العثور علي اسلحة آلي وثقيلة وار بي جيه مع الاخوان.. وبقت مصدر معلوماتهم نفس الاعلاميين القذرين اللي كانوا بيشتمونا ايام الثورة.. ضيف علي كده كذب الاخوان برضه وتدليسهم بالشكل اللي مايسمحلكش بالتعاطف معاهم. لكن انت واقف تدافع عن مبادئك مش واقف معاهم . واخيرا بقا مش معقول كم الأفوره واللحس اللي الناس بتلحسه لعبد الفتاح السيسي
Posted on: Sat, 27 Jul 2013 02:39:48 +0000
Trending Topics
Recently Viewed Topics
© 2015