كان في بنت قلبها بيوجعها، مش بيوجعها بالظبط.. بس كانت حاسة إن في فراشات بترفرف جواه طول الوقت.. راحت البنت اللي عندها فراشات بترفرف في قلبها طول الوقت.. لساحرة مشهورة بين البنات اللي قلوبهم بتوجعهم لأسباب مختلفة، الساحرة مطلبتش منها ورد ولا رجل معزة ولا عملتلها حجاب يخلي حبيبها يموت فيها، الساحرة طلبت من البنت تمد إيدها.. مش للسلام، ولا للدفا. طلبت منها تمد إيدها جوه قلبها المليان بفراشات بترفرف طول الوقت عشان تعرف حقيقة اللي جواه، البنت اتخضت! وخافت..، ازاي هتمد إيدها جوه قلبها! قالت للساحرة إن القلوب هشّة وخفيفة.. متستحملش لمسة قاسية! الساحرة قالتلها إن كل البنات بتقول كده، وكل البنات قلوبها حزينة، شجعتها تمد إيدها جوه قلبها تطلع اللي جواه وتعرف بنفسها إيه حكاية الفراشات اللي بترفرف طول الوقت وبتوجع قلبها دي.. طمنتها إنها لو جرحت قلبها بإيدها.. فهتكون مستنياها بحجاب يطبب الجرح ورقية سحرية تنسيها اللي كان.. البنت اتجرأت.. مدت إيديها لقلبها وهي قلقانة قوي ... واحدة واحدة كملت، قالت لنفسها إنه بشوييييش وكل حاجة هتبقى واضحة وبسيطة لما نعرف الحقيقة. قالت كمان إننا مش مهم نستحمل شوية وجع عشان نفهم، المعرفة مش ببلاش! افتكرت إنها لو اتوجعت بإيدها الساحرة هتداويها، وحتى لو مكانش عندها دوا.. دي إيديها هي وقلبها هي، مين هيبقى أرحم وأحن عليها منها؟ ولو حصل الوحش.. هتبقى عارفة _عالأقل_ السبب. وصلت.. لمست الفراشات اللي بترفرف، محستهاش فراشات! استغربت!! طلعت ايديها تشوف.. لقت ايديها منورة زي شمس صغيرة! استغربت! عينيها وسعت من المفاجأة..، وكل ما توسع عيونها كان النور بيكبر فهمت كل حاجة دلوقتي. مدت إيديها للسما وابتسمت :) قلوب البنات شموس.
Posted on: Tue, 27 Aug 2013 11:11:52 +0000
Trending Topics
Recently Viewed Topics
© 2015