لو كان عندى شك 1% فى قوة سلاح الاعلام فامبارح اتأكدت مليون % من ان الاعلام بجد سلاح ذو حدين ,,, الحد الاول : فى برنامج خيرى شلبى كان موجود واتكلم على التليفون عدد من ملاك القنوات الفضائية وأكدوا كلهم ان القنوات الفضائية غير مربحة خالص وانها بتصرف اكتر ما بتكسب فكان الاستنتاج المنطقى لاقبال الملاك عليها وخاصة ان معظمهم رجال اعمال ليهم أعمال ومصالح اخرى هو #الابتزاز ...يعنى البديل الارخص لرشوة المسئولين فى الدولة بأنهم يسلطوا قنواتهم عليهم لو مسهلولهمش مصالحهم .. ضيف عليها دلوقتى الاغراض السياسية وده الحد الأول وهو حقارة الاعلام . الحد التانى : بعدها بدقايق على قناة mbcمصر اتكلم على التليفون مواطن سودانى محتجز فى مستشفى الهرم بقاله 7 شهور .. مكتوبله خروج من 4 شهور وعشان عليه فاتورة بعشرين الف جنيه مش راضيين يخرجوه وطبعاً واقفين العلاج والاكل من يومها ومقعدينه فى اوضة صيانة حقيرة لغاية لما يسدد اللى عليه ..اهل المواطن مش قادرين يسددوا المبلغ وحتى السفارة السودانية امتنعت عن تسديد المبلغ.. وبالصدفة القناة كانت موجودة من كام يوم فى حادثة قطار دهشور وقابلهم الراجل واخد النمرة وكلمهم امبارح .... بعدها بعشر دقايق بالظبط اتصلت وزيرة الصحة وقالت ان الدولة هتتكفل بالمبلغ وانه هيخرج بكرة ... تأثير الاعلام هنا كان فى عشر دقايق ..عشر دقايق عمل فيهم اللى مقدرش الاجراءات الرسمية تعمله فى اربع شهور .. وهو ده الحد التانى او الوجه الآخر للاعلام .. وهو كشف التقصير وفضح المسؤلين فعلاً وسرعة حل المشكلة .
Posted on: Sat, 23 Nov 2013 07:19:04 +0000
Trending Topics
Recently Viewed Topics
© 2015