مساء النور على أصدقائي السكندريين ... موضوع الأطفال بلا مأوى تحول دلوقتي لظاهرة منتشرة جداً وبشدة في اسكندرية .. على خطوط الترام .. الاشارات .. جنب المولات .. احنا بنتعامل مع الموضوع ده بشكل فردي من قبيل اننا نديهم فلوس أو نشتري منهم حاجات الخ الخ . في واقع الامر كلها حاجات بنعملها بحسن نية بس هي مبتحسنش الوضع على الاطلاق بل بالعكس . لذا برفقة مجموعة من الصديقات النهاردة عملنا زي جولة ميدانية فيما يتعلق بالموضوع ده . أرجو منكم فعلاً الاهتمام لأن المشكلة دي قابلة للحل والله لو احنا كثفنا جهودنا وركزنا عليها وزودنا الوعي بالقدر الكافي للفت انتباه مؤسسات الدولة على أمل يعني . في ف اسكندرية حالياً مؤسستين الأولى أطفال قد الحياة ودي موجودة في كامب شيزار ودي مخصصة للأطفال الولاد الذكور فقط من سن 5 لسن 16 فما فوق كمان .. دي بيطلق عليها استقبال نهاري فقط بمعنى انها بتوفر للولاد وجبات غذائية وحصص تعليمية وجلسات نفسية وبعدين الأطفال بيروحوا سواء لبيوتهم أو للشارع الى أن يأخذ الطفل قراره بالاستمرار في المؤسسة دي فبيبعتوه القاهرة لأن القاهرة بس هي اللي فيها مبيت .. مأوى للأطفال . أطفال قد الحياة تبع جمعية رسالة لكنهم في حاجة شديدة لمتطوعين ولو بأقل وقت ممكن في الأسبوع . المؤسسة التانية وأرجو الاهتمام بدي جداً بالذات هي جمعية قرية الأمل ودي مخصصة للبنات بلا مأوى بداية من عمر يوم واحد وحتى 18 سنة . دي لحسن الحظ بتوفرلهم المبيت والاكل والشرب والتعليم والمتابعة النفسية .. المكان موجود في سابا باشا على البحر . جماعة احنا رحنا قرية الأمل دي .. هناك موجود بنات صغيرين جداً تعرضوا لاعتداءات جسدية وجنسية .. اعتداءات جنسية من أبهات البنات ونتج عنها أطفال بالفعل والأطفال دول بلا أي نوع من أنواع أوراق الثبوتية أو أي أوراق رسمية . أنا بحاول أكتب البوست بشكل موضوعي ومعلوماتي أكتر منه انساني أو عاطفي لأن دول مش محتاجين شفقتنا ولا عطفنا . احنا واجبنا نساهم في اصلاح المشكلة دي بأي شكل من الأشكال . تبرعات مادية أو عينية .. وقت أو مجهود .. قدرة على تعليم حرفة أو مهارة .. قدرة على متابعة الأطفال دول . أنا مش هقدر أوصف أي حاجة حسيتها النهاردة . أنا أتمنى انكم تروحوا تزوروا الأماكن دي ولو مرة واحدة بس .. الأماكن دي موجودة وحوالينا احنا اللي مبنشوفهاش أو مش في اهتمامتنا الرئيسية ... البنات اللي بنشوفهم على الاشارات دول لا يعلم الا الله اللي بيمروا بيه كل يوم ! أنا هكتب العناوين ونمر التليفونات في أول تعليق . وأرجوكم فعلاً ولو على الأقل نشر الموضوع والفكرة . دول مش أطفال شوارع دول بني آدمين بنشوفهم كل يوم وبنغض النظر عن مآساتهم . وبنتعامل معاهم على انهم مصدر ازعاج في الاشارات . احنا قادرين على التغيير .. أنا شفت النهاردة بنت عندها 14 سنة مخلفة ولد من والدها اللي استمر 5 سنين في اغتصابها بمساعدة والدتها !!! هنا وفي اسكندرية وفي الشارع وبنقابلهم من لحم ودم .. مش في جرنان الاهرام ولا في برنامج صبايا . دي نواة المجتمع اللي بنقول عليه جاهل وأمي وبلطجي . احنا اللي بنخلق المجتمع ده ! آسفة على الاطالة وأرجو الاهتمام ...
Posted on: Wed, 23 Oct 2013 20:09:35 +0000
Trending Topics
Recently Viewed Topics
© 2015