معلش يعني .... اصلي لسة مش مصدقة ومش مستوعبة انهم يقبضوا علي واحد زي حاتم خاطر. الناس اللي بتقول ماهي تحريات وتحقيقات ولو بريء هتثبت براءته والصحافة فورا تكتب وتدعي انه اخواني يبقي دة كدة أوفر أوفر ودي إهانة حقيقية لأي مواطن مصري انه يتاخد كدة و بعد كدة يتقالوا أتفضل مع السلامة وكمان من غير ما يعتذروا عن الإزعاج. واضح من اللي بيحصل والإشاعات اللي عمالة تطلع علي كل جمعية خيرية او شخص صاحب نشاط مجتمعي انه اخواني دة نفس نهج عبد الناصر والبوليس السياسي في أضعاف اي حد ممكن يبقي عنده نفوذ من اي نوع الا مراكز القوي. ( ياريت الناصريين ما ينطوش في البوست ويبقي الموضوع عبد الناصراللي عايز إثبتله يبقي يفتح معايا نقاش بعدين وعندي الأدلة الشخصية كمان علي كدة). دة مش موضوعنا. لما يطلع علي جمعية الاورمان وحسام القباني انه اخوان وهو أصلا روتاري وقريب اصدقاء روتاريين يبقي بردوا أوفر. ولما يمدوا أيديهم أصلا علي جرس باب حاتم خاطر يبقي ستين أوفر. الاخوان زفت ونيلة وفكر منحرف وفاكر نفسه صح مش قصتي بردوا إنما اللي عايز يفهمني ان مؤسسات الدولة المصرية دي ناس شربات وسكرة وعداهم العيب ما بيغلطوش يبقي يا اما مش عايش في البلد دي يا مش عارفة بصراحة أقول عليه ايه. ساعتها مش يقولولي ان فيه شباب بتقبض من الاخوان لا ساعتها أنا هاسالهم أنتوا بقي مين اللي بيقبضكم ولا بتستفيدوا ازاي. لما داخليتك أولوياتها تبقي الجري ورا عيال بطوب ولحد النهاردة معرفناش بجد مين اللي فجر كنيسة القديسين بعد ٣ سنين ولا سمعنا عن واحد من اللي اعتدوا علي اي كنيسة من ال ٤٥ واحدة يبقي مفيش غير حاجتين يا أما فشلة وهو غير مستبعد علي الإطلاق معشرينكم ٣٠ سنة واللي بتتسرق منه حاجة بيروح يدور عليها بنفسه ( اللي مش مصدق بردوا يبقي يناقشني بعدين دي مواقف أيضاً شخصية) يا أما انه متواطيء. اصل التجارة بالدين مش بس اني اضحك عليك باسمه إنما كمان اني العب علي مشاعر العقيدة بتاعتك باي طريقة. قدامكم حل واحد يا تتفضلوا تجيبوا مرتكبي العمليات الإرهابية وتحاكموهم محاكمة سريعة وتعرضوا الأدلة وتعدموهم في ميدان عام يا تنقطونا بسكاتكم وتخرسوا المطبلتية الإعلاميين والصحفيين بتوعكم اللي بيلعبوا بدماغ الناس.
Posted on: Wed, 23 Oct 2013 05:44:07 +0000