من زمان .. كنت بحضر الأفلام والكليبات واتخيل دائماً .. حبيبتي تكون هيك البنت الحنونة بنت البلد الأصيلة الوفية الطيوبة وكنا بالمدرسة والحارة دائماً .. بنحط عينا ع بنوتة صغيورة بتكون متلنا بريئة متلنا نلعب معها .. ونحاول نورجيها اديش نحنا لعيبة بلكي اذا شافتني لعيب بتصير تحبني أكتر ^_^ ههههه كنا مجانين لما كنت بوقف حارس وتمرق هديك البنوتة كنت بشلف حالي عالأرض واتجروح عالزفت .. إنو يعني شوفيني .. شو إني مميز ^_^ كان أبي دائماً بيقلي بكرا بس تكبر .. ويصير عندك شهادة وبتصير حدا مهم بالبلد هي البنوتة رح يطير عقلها فيك كبرت .. وكبرت البنوتة تفوقت بمدرستي جمعت علامات عالية بصف التاسع هيييك , لـ صرت بالجامعة والبنوتة .. كمان بالجامعة أبي فخور فيني أمي عم تدعيلي يمكن بعد شوي .. شوية وقت رح يصير فيني واتزوجها كل يوم كنت بعزمها عالكافتيريا نفطر ونتغدى ونتعشى سوا ندرس سوا ونسمع لبعض لازقين ببعض .. :) .... .. ولما بلشت قول .. يا رب وأموري بلشت تنحل وعلى بعد كم شبر من الحلم صار الي صار مات الي مات انظلم الي انظلم اتهجر الي اتهجر سوريا الجامعة .. ليست سوريا صف التاسع ما عاد قدرت اعزمها عالفطور والغدا والعشا صارت كاسة نسكافيه الصبح بتكفي وما عاد قدرت حاكيها كل يوم الوحدات غليوا ومافيني روح شوفها كل يومين كل شي صار نار .. نار وكل شي صار بيخوف أنا الي كنت بمسك ايدها لما نقطع الشارع صرت امسك ايدها لنقطع الهاون .. :) انتبهي حبيبتي .. هون في موت ارفعي اجرك .. في قزاز ودم امشي بسرعة .. هالمنطقة مهددة صوت طيران .. شكلها علقت خلص خلينا نرجع عالبيت وينتهي المشوار .. قبل ما يبلش متل مشوار حلمي الي خلص .. قبل يتحقق بـ شوي ما عاد في شي اسمو مستقبل وكيف فيني اشتري ذهب ولك بلا ما اضحك ع حالي فضة فضة .. كيف فيني اشتريلك فضة ومن وين بجبلك بيت ؟ بالإيجار ؟ الله يعين النازحين .. بتلزمن البيوت أكتر هالجامعة بهالبلد .. شبه فاضية لازم روح دور ع فرصة حياتي اليونان , استراليا , لبنان , مصر ما بتفرق المهم روح اشتغل مممم والبنوتة .. يلي رميت حالي كتير عالزفت كرمالها الله بعتلا نصيبها .. :) روحي يا عمري .. أنا شب سوري مع وقف التنفيذ :) شوفي الي يسعدك والي يعيشك عيشة آمنة أنا يا دوبني بساعد أهلي الحق عليك يا أبي لما قلتلي بكرا يصير عندك شهادة ما قلتلي انو ممكن ببلدي الاستشهاد بياخد مطرح الشهادات وما قلتلي انو الهجرة هي الحل وما قلتلي انو هالبلد .. رح تصير فقيرة متل دمعتك بابا متل مرضك ماما متل الي مسك وردة , قام استنشق كيماوي متلي الي كان حر بـ دينو , قام انقطع راسو خبيت عليي كتير با أبي .. خبيت كتير رح اقطع تيكيت .. ذهاب واياب الذهاب هلأ .. والإياب بس الله يفرجها على هالوطن المعتر يا صغر الفرح في قلبي , ويا كبر الألم والآه تغرب في زمانها الناس , و زود ظلمهم بلواه _______________________ يا صغر الفرح لـ يسر دولي
Posted on: Mon, 21 Oct 2013 19:28:58 +0000
Trending Topics
Recently Viewed Topics
© 2015