FOOTBALL CROWD VIOLENCE LEH LUANGMUAL FC HREMNA : (A sei lo thei lo, a chhiar peihte tan) Kan hriat angin football hi khawvela infiamna ropui ber leh mi te ngaihsan ber a ni a, khawvelah hian football khelh ngaih lohna ram hi a awm lovang tih theih a ni. Kum zabi 21-na football leh a chhehvel sumdawnna phei chuan ‘Global Economy’ a nghawng pha ta hial mai. Chutiang taka infiamna ropui a nih avang chuan khawvelah hian football kheltu, ngainatu leh atchilhtu hi mi chhiarsen loh an awm a, chung zingah chuan keini Mizote pawh kan tel. Khelmual tha kan neih hnuah Mizo football hian nasa takin hma a sawn a, Mizoram premier League din a nih hnuah phei chuan football-a kan hmasawnna hi a zuanin a zuang mai pawh a ni lo va, a thlawhin a thlawk a ni ber. Hemi kawngah hian Mizoram sawrkar, MFA hruaitute leh football tuichilha football club dintute, enkawltute leh Zonet cable tv-te hian fak an phu takzet a ni. Mizo footballer, state pawna khelte chu sawi lovah dah ta ila; tualchhung (MPL Club) club-a khel, footballer-te pawhin thlakip hlawh neiin football hi eizawn nan an hmang chho ta mek a. Tun aia nasa zawkin Mizo football hian hma a sawn zel dawn a, football boruak pawh hi a lian telh telh ang. Tin, club inrelbawlna pawh a changtlungin tun ai hian club inelna pawh a nasa chho zel dawn tih hi a chiang reng. Hetih rual hian football vanga tharum thawhna leh buaina (Football crowd violence) pawh hi a lian chho ve zel dawn a, kan tawng tam telh telh bawk ang. Tunah ngei pawh kan tawng chho tan chu a nih hi. Football pianchhuahna ram, England-ah chuan kum 1880 chho vel atang khan football vanga buaina hi an lo tawng tan tawh a, kum 1885-a Preston leh Blackburn Rovers inkhelh tuma buaina chhuak kha English football-a Hooliganism thleng hmasa bera ngaih a ni. Kan hmuh leh hriat angin football leh a chhehvela tharum thawhna hi eng ang pawhin nuaibo tum mahse khawvela football an khelh chhung chuan a awm reng dawn a. Chutih rualin ‘football crowd violence’ hi do theih leh khapbeh theih a ni a, ruahmanna fel tak nena tan lak erawh a ngai ang. Football hi khawvela infiamna ropui ber a nih ang bawkin buaipuiawm ber a ni bawk a. Mi tam takin an thih phah tawh a, an la thih phah zel dawn ni pawhin a lang. A khelh dan phungah tharum a tel avangin football game chheh vela tharum thawhna pawh hi chuti maia a reh a rinawm loh. Chuvang chuan ‘football culture’ hi kan hriat chian a pawimawh takzet a, chumi thlir chunga ‘football crowd violence’ lak a kan inven hi a tul tak meuh a ni. Mizote hi football lawm hnam leh khel nasa kan ni a; veng leh veng, khua leh khua chu sawi loh, kohhran thalai sport football match mai maiah pawh tan lutuk avangin kan insual duh mai. Hei hi kan sual vang leh buaina kan cho chhuah chak vang lam ni lovin football culture mihringte nuna a rawn lan chhuahna mai a ni. Chutih rual chuan hetiang thil pumpelh tur hian rilru thianghlim leh zau tak kan neih a pawimawh hle a, chutiang rilru (rui lo rilru) kan neih chuan football crowd violence hi engemaw chen kan pumpelh thei ang. Tun hma atang tawh khan Mizote hi football hooliganism-ah hian kan fihlim bik lo va, kan football standard-te chu la sang lem lo mah se football game in a ken tel, tharum thawhna standard erawh chuan football fans-te hi min hrut rual vek a. Football in kan thinlunga hmun a luah len leh tet dan a zirin kan lan chhuah tir dan a inang lo mai chauh a ni. Central YMA, inter village football tournament, high school leh college football tournament-a hooliganism thleng tawh zat hi chhiar tham fe chu a ni ve tawh ang. Mizoram Premier League awm hnuah pawh football vanga buaina hi kan tawng chho ta zeuh zeuh a, fans khawsak dan dik lo avanga club hrem te pawh an awm tawh a, MPL player, mi kut tuar te pawh an awm ta hial mai. Mizoram Premier League season 2 second leg final-ah Luangmual fans, referee thutlukna a lungawilo ten inkhel tikhaihlakin ground chhungah thil chi hrang hrang an vawm lut a, chu mai duh tawk lovin lammuala thutna an tichhe bawk a nih kha. Kan khelmual neih that ve ber, football fans te ngeiin duhtawka an han sawisa kha a pawi takzet a, tun hnua a thlen tawh lohna turin kan FA te hian hma la se, football fans-te pawhin khatiang thil kha kan hnualsuat ngam tur a ni bawk. MPL 2 final match-a Luangmual fans-te pawi khawih avangin MFA chuan Luangmual FC chu MPL season khat inlan thei lo turin an hrem ta chu a ni a. A tuartu tan chuan a na hle in a rinawm. Hetih rual hian kha thil thlenna chhan leh vang hi kan ngaihtuah tel tur a ni. A hmasa berah chuan referee thutlukna dik tawk loh vang kan ti lo thei lo, hei hi chu neutral mit atang pawhin a chiang. A dawt lehah chuan security duty ten an tih tur an tih loh vang leh, MFA in ‘tight security’ a ngaihthah vang a tih theih ang. Ram pum emaw, mipui kaihhnawih thil emaw huaihawttu chuan an thil buatsaih nghawng leh pawi thleng thei thilah, pawi khawihtute hremna mai ni lovin, pawi thleng tur venna mumal tak a ruahman tel tur a ni. Khatiang zan inkhel boruak sosangah chuan security a khawng hle tur a ni a, stand (Goal hnunga thutna bik hi chu End tih tur) tin kha police leh security duty mi 20-30 vel zelin an vil tur a nih laiin inkhel en in an lo ding ve mai mai a. Luangmual fans ten thutthleng an tihchhiat lai pawhin han man chu sawi loh, ground atangin an lo uipui tuilian thlir ringawt anih kha. Khatiang anih chuan engtin nge lammual chair-te kha a chhiat loh tehlul ang. MFA leh police hotute lam atangin order a awm bawk si lo. Luangmual fans ten bottle an rawn vawm luh tan tirh khan MFA khan hlawh neia security duty tura a rawihte kha stand-ah tlan chhova han man hmak hmak turin thu pe se, chair khati zat kha a chhe lovang. Tin, inkhelh hma khan thutthleng tha tawk lo leh nghet tawk lo awm te kha en chiangin lo chhinchhiah se Luangmual FC an hremna pawh hi hei ai hian a nep ngei ang. Kei chuan hman zan crowd violence kha MFA-in tight security a ngaihthah vanga thlengah ka ngai a, MFA pawhin security an ruahman dan a tha tawk lo tih hi an pawm ngei ka ring. Tin, ka mimal ngaihdanah chuan Luangmual FC an hremna hi na ka ti a, ‘The beautiful game’ tih bawrhbanna lam chi - match fixing emaw, inthamna leh politics thil tha lo emaw chu ni se thuhran, security that loh nghawng thil thleng thei leh a venna tur ruahmanna that tawk loh avanga fans te thil tihchhiat (Vandalism) vanga season khat han inhrem ngawt hi chu a awm ang lo deuh chu a ni. Luangmual FC hian hremna an tawrh hi appeal ngei se ka ti a, MFA lam pawhin thil awmdan chiang zawkin an han zir anga, Luangmual FC an hremna hi an tihnep ngei ka ring a, thil kalphung pawh a ni reng bawk a. Local football a thih lai ber pawh a foreign players-te la a football club nung tak ni reng thei, Luangmual FC hi MFA hian a zah ve tur a ni tih hi ka mimal ngaihdan a ni bawk. Tin, Luangmual FC players-te hmakhua hi a ngai bawk tur a ni. Khawtlang ram sawrkar leh football khelh uarna ram football association-te khu chuan ‘football crowd violence’ hi engtiklai pawha chhuak theih reng a ni tih hriain - ‘zana football khelh khap’ lam ni lovin, buaina a chhuah loh dan tur leh buaina a chhuah palh pawha buaina siamtute hremna leh a hmehmih dan tur, security tha tak siam hi an ngaipawimawh em em a. Heti lam kaihhnawih dan khauh tak tak hi FA leh sawrkar tangkawpin an lo siam tawh thin. Kum 1985-a Haysel stadium-a Liverpool supporters ten Juventus fans, mi 39 an chil hlum hnu phei kha chuan Council of Europe chuan European union ramte hman tur, ‘European convention on spectator violence and misbehaviour at sports event and in particular football match’ tih dan a duang ta hial a nih kha. 2000 Euro-a Belgium khaw pakhat, Charleroi-a England-in Germany an hneh tum khan English hooligans-ten buaina an siam avangin UEFA chuan England sawrkar chu vauin, hooligans dona kawnga dan khauh zawk siam turin a nawr lui a. Dan khauh tak an siam loh chuan UEFA member an nihna hlih sakah an vau a ni. Khatih laia England Prime Minister, Tony Blair chuan British Parliament-ah dan pu lut nghalin, ‘Football Disorder Act 2000’ chu British Parliament chuan chawpchilh takin a pass ta a. He Act-ah hian British mi tu pawh court-in an passport a hren sak theihna dante thlengin a tel. Mizoram Football Association leh Mizoram sawrkar pawh hian ‘Crowd Control Act’ hi an siam thei a. Chu dan an siam chu Sports Minister emaw, opposition MLA emaw pawh ni rawh se - Legislative Assembley-ah an pu lut anga, kan legislator ten inthurual takin an pass anga, awlsam takin ‘Mizoram Football Violence Act’ hi kan nei thei reng a ni. Hetiang hi mipui sahimna tur thil anih avangin ram changkang zawk sawrkar leh FA te chuan an ngaipawimawh em em a, MFA leh kan sawrkar pawh hian hetiang dan hi siam se kan thatpui khawp ang. MFA in club hremna leh technical lam a chang anga, sawrkarin kawhmawh bawl te hremna lam a buaipui ve thung ang. Thil har leh buaithlak a ni lova, a nachang kan hriat loh avang chauh a ni. Hetiang dan tha kan neih phawt chuan football-a tharum thawhna thleng tur tam tak hi kan pumpelh theih ngei ka ring tlat a ni. MLTP Act mah kan nei thei a lawm le. Mizo football hi a la thang zel dawn a, referee thutlukna dik lo avanga fans-te lungawi lohna leh buaina pawh hi a la chhuak zel anga, club inhal bik pawh an la awm ang; ground chhunga thihna hial pawh thleng thei a ni. Lo thleng palh ta se, event organise tu MFA hi a mawhphurtu tur a ni. Chuvang chuan chutiang harsatna lian tham kan tawh hma ngei a ‘Crowd Control Act’ kan neih hi a ngai. Fans lam te pawhin referee thutlukna a kan lungawi lo a nih pawhin a pawikhawih zawng leh buaina siam lo zawnga awm tum tawh ila. Tin, lammual bungrua tihchhe zawnga khawsak phei chu tun hnuah kan ti tawh tur a ni lo. A tawp nana kan sawi leh duh chu - close circuit television (CCTV) hi a ni. Khawvel hmun dangah pawh an hman nasatzia kan hria. MFA emaw, sawrkar emaw hian lammual end leh stand tinah CCTV hi dah se, referee leh players-te vawmtu, ground chhunga tui bottle vawm luttu leh chair tichhetu kha an thur nalh nalh thei tawh anga, ‘Football Violence Act’ hmangin an hrem tawh mai dawn a ni. CCTV hi football crowd violence dona hmanraw tha tak, United Kingdom Police, Football Section-te pawhin an hman tangkai em em, thil man to tak leh hautak si lo a ni a, MFA hian heti lamte hi han ngaihtuah se a duhawm ngawt mai.
Posted on: Sun, 25 May 2014 09:39:19 +0000
Trending Topics
Recently Viewed Topics
© 2015