I Nunin Lalpa Chawimawi Rawh Mahatma Gandhi chuan, “Kristian- te hian Baibula Isua zirtirna hi zawmin nunpui se chuan; India ram hi Kristian ram ani tawh ang,” tiin a lo sawi tawh a. Ngaihtuah a tithui khawp mai! I sawi te Nun pui rawh : Kristian lo tam tak ten Kristian nih an duhlohna chhan fo chu - Kristian Nun an en a, danglamna leh an nuna entawntlak an hmuh loh thin vang a ni. Thu tha tak tak kan sawite kan nunpui thin loh avang hian Kristian nihte, kohhrana in hman te an chak lo fo thin. Mizo zingah pawh kan sawi fo thin, “Kan thenawm kohhran upa hi vanram a kai chuan kei chu chhawng sarihnaah ka awm ang,” inkhawm ngai miah lo pawhin a ti bawng bawng ngam tlat. Kan Biak In nun leh kan tual zal nun a danglam tlat thin. Mihlim nu pakhat, inkhawm leh lam peih em em mai chu, an pa zurui reng mai chuan, “Kan nu hi Biak Inah hian pem mai se a tha ang. Biak Inah hian a hlimin, a lam reng thei a, inah erawh a phunin a ang reng mai a; thinrimna tur ringawt a zawng a,” tiin. Kristian tha/Ringtu tha nih hi, kan inkhawm tamah leh kan thawhlawm thawh tamah te a innghat mai lova. Kohhran committee peng hrang hranga kan tel tamah leh, sande sikul kan kai hnemah te a in nghat ber lo. Keini ringtute hi kan nunin belhchian a dawl tur a ni a, belhchian ngam kan ni bawk tur a ni. Inkhawm peih em em si, kohhran thiltiha a kula-taia in hmang si te nunah hian miin engengmaw kawng tala danglamna leh ei tur an hmuh loh chuan kan Ringtu Nun hi kan fiah ngam tur ani ang. Kan testimony hi, kan chenpui, kan hnathawhpui ten sawi rawh se! Thlarau Hruai Ringtu : Thlarau hruai han tih avang hian, lam bing bi let a, inlarna te hmu chuaih chuaih lam ani ngawt lova. Tawnghriatlohva tawng a, pulpit tlang atanga thu tha tak tak sawi a ni ngawt lova. Lal Isua nei tawh tak tak chu nitinin thlarau hruai a ni nghal phawt a. Chuvang chuan a hnathawhnaah — ringlomite zingah pawh rinawm takin Krista Nun mawi alan chhuahtir tawh mai a. A rinawm a, a nelawm a, a insumthei a, a dawhthei a — Thlarau rah Galatia Bung 5-a kan hmuh kha a nunah Lapa tanpuinain alo lang chhuak mai thin. Kristian tak tak leh tak tak lo chu, ‘a rahah’ kan hre mai ani. Nunin Hril Zawk se : Scottish thusawitu ropui, Alexander Mc Laren chuan, “ Bible an chhiar ngun aiin kan nun hi an chhiar ngun zawk,” a lo ti. Kan chetzia leh kan nitin nun te, ringtu ni ve loten min thlir reng avangin kan nun kan ulukin kan fimkhur tur a ni.Tirhkoh Petera pawh khan a ngai pawimawh hle a: I Peter Bung 2:11-ah chuan, “Jentailte, ringlo mite zinga in chetzia chu mawi tak ni rawh se, chutichuan thil tisualtute anga an sawichhiat che u kawngah chuan in thil tihthat an hmuhte avangin fanin an awm hunah chuan Pathian an chawimawi thei ang.” Kan nitin nunah Krista Nun mawi kan lan chhuahtir chuan, ringlomite pawn Chhandamna hial pawh an lo chhang thei dawn a ni. Missionary pakhat chu thingtlangah; hnam pakhat zingah missionary tura tirh a ni a. Kum 10 hnuah pawh an tawngin Pathian thu a sawi thei lova. Tumah Kristianah a siam lo. Sum leh paia chhawmtu leh thawnchhuaktu pawl te chuan, Missionary hlawhchham tiin an kokir a. A aia lehkhathiam zawk an tir leh ta a. Ani chuan an tawngte pawh kum 2 chhungin a thiam thuai a. Zan khat chu, Isua film an khaw tual zawlah a chhuah a. Khua ami zawng zawng chuan ngun takin an en a. “He film-a in hmuh Isua hi, in PATHIAN, Lal leh CHHANDAMTU atana in pawm duh a nih chuan in thut hmunah khan lo ding chhuak r’u,” tiin sawmna a siam ta a. An zavai chuan an ding ta vek mai a! Missionary chuan awih har a ti kher mai. Missionary awm hmasa zawk khan kum 10 chhung pawhin Kristianah pakhat mah a siam thei lo kha a ni si a. Mipui lo pungkhawm hnenah chuan, “Zanina in thutlukna siam hi a pawimawh ania, ngun takin ngaihtuah rawh u khai,” a ti nawn leh a. Mipuiho chuan, “Zanina LAL ISUA, film a kan hmuh hi, kum 10 chhung kan zingah a lo cheng tawh thin alawm,” tiin an chhang a . Missionary hlawhchham nia mite’n an ngaih thawhrah kha a seng ve chauh zawk a lo ni ! An tawngin Isua chanchin hrilh thei lo mahse, a NUNIN Lal Isua Chanchin Tha chu ril takin a lo puang a ni si a. Hawh u, Keini ringtute hian; kan hnathawhna hmunahte, kan lehkha zirna hmunah te, sumdawnna hmunah te - Thua Lal Isua hming kan sawi thei lo a nih pawhin; kan NUN-in i chawmawi zel ang u. I nunin Lalpa a chawimawi em le ?
Posted on: Sun, 04 Aug 2013 02:32:00 +0000
Trending Topics
Recently Viewed Topics
© 2015