KI Editorial, 14 June 2013. Bwanaan te Beeba i aon ana tangi n nano Ann.... Tiaki ai tibwa aio te rongorongo ae toka iaon KI ni kaineti ma te onaoraki, ao bon ara kantaninga bwa a teimatoa ni wareware te Minitita man ana taan mwakuri, ao riki ara Beretitenti. Kanga e a riki bwa ai teuana mwanewen kunaia te botanaomata n aron naba kunan natin Terotiata are e “ngaa te taokita e na buoka kainanou” e bane raraana man ikoakina ao akea te taokita. N te tai aei ao Nei Ann e aitara ma te aekaki ni kangaanga teuana ae kamimi ae e okoro ma are e riki nakon natin Terotiata bwa iai taokita ma akea te bwai ae e karaoia. Ngaira aika ti wareware, tera ara namakin ngke arona bwa e riki naba aio nakon kainabara, tarira, natira, tinara ke tamara? Bon anne te namakin ae e teimatoa n tiku inanoia Ann ma natina ao ana utu ni karokoa te bong aei. E aera ngkai akea te karaunano, akea te kabwarabwara ma te kamataata nakoina ngke e moan rin ma kainabana mairouia taokita? A aera ara taokita, a kabi n taetae ni Kiribati, ke tao a bon aki kan tabe ma te aomata? Tera raoi ae riki nakon kainabana, ae e aki ataia Nei Ann? Bukin tera ngkai akea ana bwainaoraki, e a bon aki kona n reke buokana ke kanga? Akea inaomatan Nei Ann n ataia bwa iai buokan kainabana ke akea? Aikai titiraki aika a rio man warekan te rongorongo aio, ao bon nakon naba Ann. A riki aikai ibukina bwa akea te reitaki ae tamaroa imarenaia taokita ma ana utu te aoraki ao bon anne ae karika te kangaanga. Tiaki ti anne ma e anga naba te tamnei ae kaangai bwa “a aki tabe” irouia aomata, ke a bon aoria, a bon kawangaia ni ngure ma ti aki tabe irouia. Te bwai ae tangiria Nei Ann bon moan te uarereke bwa ti te kamataata bwa bukin tera ngkai e aki anganaki te bwainaoraki kainabana, ao ngkana tao akea te bwainaoraki ibukin kainabana, antai tabena anne bwa e na kabwarabwara nakon Ann? Ke tao a un taokita iroun Ann bwa tao iai anuana ae aki kukurei iai ngaia ae a bon katukua naba n arona anne ma kainabana? Bon anne naba teuana kanoan ami berita ngkami taokita ngke kam butimwaea te tibwanga aio? E a tia ni motirawa kainaban Ann, ma e bon aki kona ni bua uringan te mwakuri ae karaoaki nakoina ae e aki kakukurei ibukina bwa bon te aomata naba ngaia n ai arora ae ti bane ni kakawaki. Ti rangi ni kan ongora ana kaeka Dr Baba ma te kananokawaki bwa ngaia e a manga bua ana folder te aoraki are a kawakinaki iai rongorongona. E aera ngkai e aki anganaki te bwainaoraki, ao e kanga ni bua ana folder e bon riaon te kanakonano. N ana koaua KI ao e aki kona n ataa bukina ma bon ti teuana te tabo ae e kona ni kaongoira bwa bukin tera ngkai e aki bwainaorakiaki kainaban Ann ao e aera ngkai e bua ana folder bwa bon ti te Kabowi.
Posted on: Wed, 19 Jun 2013 21:32:35 +0000
Trending Topics
Recently Viewed Topics
© 2015