“Ko e Ngaahi ‘Aho ke fakamanatu ai e ngaahi ‘Aho Mālōlō Faka-Pule’anga” PULE’ANGA TONGA ONGOONGO TUKUATU “Ko e Ngaahi ‘Aho ke fakamanatu ai e ngaahi ‘Aho Mālōlō Faka-Pule’anga” (21 Nōvema 2013) ‘I he tu’unga mei he lahi ‘o e ngaahi faka’eke’eke ‘oku ma’u mei he kakai ‘o e fonua fekau’aki moe ngaahi ‘aho totonu ke fakamanatu ai e ngaahi ‘Aho Mālōlō Faka-Pule’anga ‘o Tonga – ‘o hange koia ko e ‘aho 4 ‘o Tisema- ‘ai ‘oku fakamanatu he ta’u kotoa ko e ‘Aho ‘o Kingi Tupou I. ‘I he ta’u ni ‘e hoko ‘a e ‘aho Mālōlō koeni ‘i he ‘aho Pulelulu, pea ‘i he’ene pehe ‘e fakamanatua leva e ‘Aho Mālōlō koeni ia he ‘Aho Mōnite koia ‘o e kamata’anga ‘o e Uike koia ‘e hoko ai ‘a e ‘aho mālōlō ni, ‘ai ia koe ‘aho Mōnite 2 Tisema 2013. ‘Oku fakatatau eni ki he Lao (Fakatonutonu) ki he Ngaahi ‘Aho Mālōlō Faka-Pule’anga 2010 ‘a ia ‘oku fakalea ‘o pehe kapau ‘oku ‘i ai ha ngaahi ‘aho ‘o e ngaahi ‘aho mālōlō faka-Pule’anga ‘e hoko ‘i he ‘aho Tu’apulelulu, Falaite, Tokonaki pe Sāpate, ko e ‘aho mālōlō faka-Pule’anga ko ia kuo pau ke fakamanatu ia ‘i he ‘aho Mōnite ‘oku hoko mai ki he ‘aho ko ia - pea kapau kuo hoko ‘i ha ‘aho Tūsite pe Pulelulu, ko e ‘aho mālōlō faka-Pule’anga ko ia kuo pau ke fakamanatu ia ‘i he Mōnite ki mu’a ‘o e ‘aho totonu ‘o e ‘aho Mālōlō faka-Pule’anga.” Ko e founga pe ke fakafaingofua’aki hono tala pe ko e fē e ‘aho totonu ke fakamanatu ai ha ‘Aho Mālōlō Faka-Pule’anga - ko hono vakai pe ko e ‘Aho Mālōlō ‘e hoko he konga ki mui ‘o e uike; ‘ai ia ‘e fakamanatu leva ia he Mōnite ‘o e uike hoko mai, pea kapau ‘e hoko ’a e ‘Aho Mālōlō he kamata’anga ‘o e uike pea ‘e mahino leva, ‘e fakamanatu ia he Mōnite ‘o e kamata’anga ‘o e uike koia. ‘Oku ‘i ai foki ‘a e ngaahi ‘Aho Mālōlō Faka-Pule’anga pau ‘e tolu ‘oku ‘ikai toe liliu ‘oku fakamanatua he ta’u kotoa ‘a ia ko e ‘Aho ‘o e Tau’atāina (4 Sune); ‘Aho Konisitūtone (4 Novema) pea moe ‘Aho ‘o Tupou I (4 Tisema). Ko e ngaahi ‘aho totonu ke fakamanatua ai ‘a e ngaahi ‘aho koeni ‘e fakatatau ia ki he tu’utu’uni ‘o e Lao (Fakatonutonu) ki he Ngaahi ‘Aho Mālōlō Faka-Pule’anga 2010 ‘a ia ne lave kiai ki mu’a. Ko e ngaahi ‘Aho Mālōlō Faka-Pule’anga hange koe ngaahi ‘Aho Mālōlō Faka-Tu’apule’anga kau kiai ‘a e ‘Uluaki ‘Aho ‘o e Ta’u (1 Sanuali)‘Aho Kilisimasi (25 Tisema), ‘Aho Boxing (26 Tisema), ‘Aho Falaite Lelei, ‘Aho Monite ‘o e Toetu’u, kae’uma’a ‘a e ‘Aho ANZAC (25 ‘Epeleli)- ‘oku ‘ikai ke nau muimui ki he Lao ‘o e 2010, ka ‘oku fakamanatua pe e ngaahi Aho Mālōlō koeni ia he ngaahi ‘aho totonu ‘oku hoko ai. Ko e founga tatau pe ki hono fakamanatua ‘o e ‘Aho ‘Alo’i ‘o e ‘Ene ‘Afio ko e Tu’i ‘o Tonga, ‘oku lolotonga Pule pea mo e ‘Aho ‘Alo’i ‘o e ‘Ea ki he Kalauni ‘o Tonga – e fakamanatua ia ‘i he ‘aho totonu ‘e hoko ai, tukukehe ka hoko ‘a e ongo ‘Aho ‘Alo’i ni ( Ko‘Ene ‘Afio Tupou VI – 4 Siulai) moe (Pilinisi Kalauni Tupouto’a-‘Ulukalala – 17 Sepitema) ‘i ha ‘aho Sāpate pea kuo pau leva ke toki fakamanatu ia ‘i he ‘aho Mōnite hoko mai. ‘Oku fakatatau eni ki he Lao (Fakatonutonu) ‘o e Ngaahi ‘Aho Mālōlō Faka-Pule’anga 2013. NGATA’ANGA Tukuatu mei he: ‘Ofisi ‘o e Palemia, Pule’anga Tonga, Nuku’alofa. Tel: +676 24 644 Fax: +676 23 888 Email: [email protected]
Posted on: Fri, 22 Nov 2013 04:24:50 +0000
Trending Topics
Recently Viewed Topics
© 2015