Komunikado 25 di sèptèmber 2013 Di nuebe reportahe semi anual Cft Kòrsou & Sint Maarten: Logra un posishon finansiero sano ta un reto grandi tantu pa Kòrsou komo pa Sint Maarten Willemstad - Kolegio di supervishon finansiero Kòrsou & Sint Maarten (Cft) ta konstatá den su reportahe semi anual di e promé seis lunanan di e aña aki, ku tantu Kòrsou komo Sint Maarten ta konfrontá retonan grandi pa trese balansa struktural den nan finansa públiko. Pa logra esaki Kòrsou a implementá medidanan supstansial. Na Sint Maarten finalmente no a implementá e medidanan ku lo mester sòru pa un oumento di entrada, loke a pone ku den e promé mitar di aña no a realisá un presupuesto 2013 balansá. No solamente Sint Maarten, pero Kòrsou tambe ainda ta faya den traha i aprobá dokumentonan di presupuesto na tempu, i raportá na tempu na Parlamento (Staten) tokante e finansa públiko. Pues e maneho finansiero na ámbos pais tin mester di mehorashon. E presupuesto di mas aña ta demonstrá ku ámbos pais mester hasi hopi esfuerso pa por brinda un bista kompletu. E echo ku den e añanan tras di lomba tabatin défisitnan i ku mester kompensá esakinan, ta hasi e tarea aki un reto mas grandi ainda. E Kolegio tin hopi apresio pa e echo ku e gobièrnu di Kòrsou a tuma pasonan nesesario pa strukturalmente reforsá e presupuesto, dor di implementá diferente medida ku ta doloroso. E apresio aki a keda tradusí tambe den un evaluashon positivo di e petishon pa fiansa. Sint Maarten mester a tuma medidanan pa ku nan entrada, pa por kubri e nivel di gastunan deseá riba término di mas aña, na un manera struktural. Pasó no a implementá e medidanan pa oumentá e entradanan, loke si tabata e intenshon, na Sint Maarten no por a papia mas di un presupuesto balansá. Na komienso di sèptèmber Cft a dirigí su mes na Konseho di Minister di Reino ku e konseho pa duna un instrukshon na Sint Maarten, ku e meta pa mas lihé posibel realisá un presupuesto 2013 ku ta aprobá. Riba 16 di sèptèmber Gobernador di Sint Maarten a aprobá e presupuesto di 2013. Algun dia despues a presentá e presupuesto aprobá aki na Cft pa risibí konseho riba dje. Mas lihé posibel, pa mas tardá denter di dos siman, Cft lo duna un konseho mas aleu. E Kolegio ta preokupá pa loke ta trata trahamentu di e dokumentonan di presupuesto na tempu. Tur dos e paisnan a kuminsá 2013 sin un presupuesto aprobá i Sint Maarten te asta te riba 16 di sèptèmber 2013 tabatin un presupuesto aprobá di 2013. Banda di esaki e sifranan anual di 2010, 2011 i 2012 i e adaptashonnan riba presupuesto for di 10 di òktober 2010 te ainda no a keda aprobá, i esaki un biaha mas ta mustra kla ku e maneho finansiero den ámbos pais tin mester di mehorashon. Esaki ta resultá for di e inventarisashon di e estado di maneho finansiero ku e Kolegio a hasi konhunto ku ámbos pais den e temporada tras di lomba. No solamente ta difísil pa hasi un ehekushon di maneho sin sifranan anual i presupuesto aprobá, pero esaki tin konsekuensia tambe pa e derecho di presupuesto di Parlamento. [Final di Komunikado] Teksto pa foto: E Kolegio ta preokupá pa loke ta trata trahamentu di e dokumentonan di presupuesto na tempu. Nota pa redakshon – no pa publikashon Splikashon: E Kolegio di supervishon finansiero pa Kòrsou & Sint Maarten (College financieel toezicht voor Curaçao & Sint Maarten - Cft) ta raportá tokante su tareanan na e Konseho di Minister di Reino (Raad van Ministers van het Koninkrijk - RMR), e gobièrnunan di ámbos pais, ámbos kambernan di Staten-Generaal i e Parlamento di ámbos pais, un biaha kada mitar aña por eskrito. Dia 5 di ougùstùs 2013 e Kolegio a entregá e di nuebe reportahe semi anual di Kòrsou & Sint Maarten serka e minister di Asuntunan Interno i Relashonnan di Reino (Binnenlandse Zaken en Koninkrijksrelaties - BZK), ku e petishon pa pasa esaki na e partidonan ariba menshoná, konforme artíkulo 4 inisio 2 di e lei di konsenso di Reino supervishon finansiero Kòrsou & Sint Maarten (consensus-Rijkswet financieel toezicht Curaçao & Sint Maarten. Persona di kontakto di Cft: Sekretariado Kolegio supervishon finansiero (Cft) Kees van Nieuwamerongen - Sekretario Telefòn (09) 461-9081 / (09) 461-9082 / (09) 461-9084 E-mail [email protected] Internet cft.cw Kontakto ku prensa: Jefka Martha-Alberto Telefòn (09) 512-6861
Posted on: Thu, 26 Sep 2013 12:00:43 +0000
Trending Topics
Recently Viewed Topics
© 2015