NOTIS I GO LONG: Ol Jif, ol Woman Lida, ol Yut Lida, ol Jioj Lida, ol Eria Sekretri, ol memba blong Komuniti raon long Vanuatu KONSALTESEN WETEM MINISTA BLONG LANDS LONG SAED BLONG OL PROPOS JENIS LONG OL LOA BLONG GRAON Long stat blong yia ia mi, Ralph Regenvanu, Minista blong Lands, mi bin apoentem wan Hae Level Working Grup blong advaesem mi long ol jenis we bae Gavman i nid blong mekem long ol loa blong graon blong save implimentem ol resolusen blong Nasonal Land Samit we i bin sidaon long Port Vila long 2006. Hae Level Working Grup ia i gat insaed tufala Daerekta Jenerol blong ol Ministri blong Lands mo Jastis, ol reprisentetiv blong praevet sekta mo Jemba blong Komes, wan lokol ril estet ejent, ol praevet loya mo ol ligol reprisentetiv blong Stet Lo Ofis, mo ol reprisentetiv blong ol woman mo ol yut. Naoia wok blong Hae Level Working Grup i kolosap finis, mo mi wantem karem ol niufala loa ia i go long Palamen long manis Novemba blong pasem. Ol niufala loa ia bae i save mekem olgeta samting ia: • Mekem wan niufala proses o rod blong mekem wan lis, thru long ol jenis long paoa blong Minista anda long Land Reform Act; • Spidimap proses blong apruvum ol dil long ol graon long taon (urban) [evri diling we i no sabdivisen o jenis long kaen (type) blong lis]; • Wan niufala Customary Land Management Act blong jenisim o riplesem Customary Land Tribunal Act we i stap finis. Niufala loa ia bae i mekem se bae yumi save stretem ol dispyut long graon long level blong nasara o nakamal nomo; • Protektem ol graon blong Gavman (state land); • Mekem se Malvatumari i mas gat moa raet blong toktok long ol isiu blong graon. Naoia mi stap mekem ol aweanes mo konsaltesen raon long Vanuatu long ol niufala loa blong graon ia, blong karem tingting blong ol pipol long ol niufala loa ia. Konsaltesen ia bae i gohed long evri 6 Provins mo tu long tufala taon blong yumi. Mo tu, bambae mi hostem wan Nasonal Land Loa Samit long Port Vila long 15-16 Oktoba, mo yu wetem ol Kaonsela blong yu oli welkam blong kam long hem. Mi stap raet long yu olsem ol jif mo ol lida insaed long ol difren komuniti blong yufala i patisipet long wan miting wetem mi blong mi save tokbaot ol niufala loa ia wetem yufala. Bae mi glad tu blong harem tingting blong yufala long saed blong ol loa ia. Mi askem yufala blong kam long konsaltesen miting long eni ples long list andanit we i kolosap long yu: 10th Septemba 2013 – VNPF conference rum, EFATE – 9:00am – 3:00pm 12th Septemba 2013 – Sarede Vilej, Saot SANTO – 2:00pm – 4:00pm 13th Septemba 2013 – Jif Nakamal, Luganville, SANTO – 9:00am – 3:00pm 14th Septemba 2013 – Natamata, Malo, MALO – 9:00am – 12:00pm 14th Septemba 2013 – Vunatari, Malo, MALO – 2:00pm – 5:00pm 16th Septemba 2013 – Nimbaur, Lakatoro, MALAKULA – 9:00am – 3:00pm 17th September 2013 – Akhamb Aelan, MALAKULA - 2:00pm – 4:00pm 18th Septemba 2013 – Farun Skul, Farun, MALAKULA – 9:00am -3:00pm 19th Septemba 2013 – Lamap, MALAKULA – 9:00am - 2:00pm 21st Septemba 2013 – Abatuntora, PENTIKOS – 9:00am – 3:00pm 22nd Septemba 2013 – Lovonda, AMBAE – 2:00pm – 5:00pm 23rd Septemba 2013 – Navonda, AMBAE – 8:00am – 10:00am 24th September 2013 – Hog Habour, SANTO – 9:00am – 3:00pm 25th Septemba 2013 – Sola, VANUA LAVA – 2:00pm – 5:00pm 26th September 2013 – Ngerenuman, MOTA LAVA – 9:00am – 3:00pm 30th Septemba 2013 – Tafea Kaljoral Senta, Lenakel, TANNA – 9:00am – 3:00pm 1st October 2013 – Lakaio, Not TANNA – 9:00am - 3:00pm 2nd October 2013 – Lowipeng, Whitesands, EAST TANNA – 9:00am – 3:00pm 8th October – Rovo Bay, EPI – 9:00am – 3:00pm Plis konfem patisipesen blong yu o askem eni kwestin we yu gat long 1st Politikol Advaesa blong mi John Salong long [email protected] o wetem Sekretri blong mi Emmeline Lulu long 23105. Mi luk fowod blong mitim yu i no long taem, mo harem ol tingting blong yu long ol jenis blong lo blong graon ia. Tankyu mo saen, Ralph Regenvanu Minista blong Land
Posted on: Wed, 04 Sep 2013 20:31:56 +0000
Trending Topics
Recently Viewed Topics
© 2015