Nifa Pathian Bia No(151) Ṭahnak Vampang - (Wailing Wall or Western Wall) Ṭahnak Vampang cu Jerusalem Temple i nithlak lei kulhnak vampang a si i, Western Wall ti zong a si i, Hebru in Kotel ti zong a si. Cu vampang ahcun Judahmi hna nih Pathian sinah rak kan khamh law rak kan bawmh tuah tiah thlacam in an va ṭah tawn. Cucaah Ṭahnak Vampang - Wailing Wall ti zongin auh a si. Pathian nih David sinah na fapa Solomon nih ka inn cu a sak lai (2Sam7:23) tiah a ti bantukin siangpahrang Solomon nih Jerusalem ah Pathian inn Temple cu a rak sak. Hi Temple a saknak hmun hi Abraham nih a fapa Isak kha Pathian sinah raithawinak dingah a rak timhtuahnak hmun (Gen 22:2) Moriah tlang kha a si i, Jakob nih a mang ah vancungmi hna hlei in an ṭumkainak lio (Gen 28:22) a hmuhnak hmun zong a si. Hi hmun cu Judahmi hna nih Hmun Thiang Hlim tiah an timi a si. Siangpahrang Solomon nih 950 BC hrawngah a rak sakmi Jerusalem Temple le Jerusalem khua chung inn vialte kha Babylon siangpahrang Nebuchadnezzar nih a rak khangh hna i a rak hrawh dih hna (2Siang 25:9). Cun an thah lomi hna Judahmi zong kha sal ah Babylon ah a rak hruai hna i, an lak i sifak bikmi hna tu kha misur ruang a zohkhanhtu le lo thlotu ah an chiah tak hna. Cuticun Babylon nawlngeihnak a tlak hnu 515 BC ah Persia siangpahrang nih Judahmi tlawmpal cu Temple remh ṭhan dingin a kirter hna i Jerusalem Temple cu an va remh ṭhan. Cu hnuah 19 BC hrawngah Herod The Great nih Jerusalem Temple cu a van kulhpiak ṭhan i, Cu Herod kulhmi vanpang pi cu atu ah Ṭahnak vampang kan timi cu a si. Cu hnuah AD 69 hrawngah Rom Empire nih Jerusalem Tample cu a hrawk ṭhan. Cu Temple an kulhnak vampang ahcun Judahmi hna nih Salm 79 chung kha an rel i Pathian sinah bawmhnak hal in ṭah buin thla an va cam lengmang tawn. Cuka hmun cu hmun thiang i ruahmi a si caah cu hmun i thlacam le Pathian sian bawmhhal kha an duh khun. Atu ahcun cu Ṭahnak Vampang ahcun anmah Judahmi lawng silloin vawleicung khuaza ramkip in va kal i va zoh a si. A pawng teah catlap le cafung an chiah i, ca an ṭialmi ca cu lungkarlak teah an tanh hna. Cu Ṭahnak Vampang cu a lai in an ṭhen i nu kalnak le pa kalnak in an tuah.Pa umnak cu kal duh tikah anmah Judahmi lukhuh fate i khuh hnu ah Vampang leiah cun va kal a si. Cu Ṭahnak Vampang ahcun nihin ni tiangah Judahmi pawl cu nichiar tein an kal i an va ṭap lengmang ko rih. Judahmi hna nihcun Jesuh cu Khamhtu le Bawi ah an cohlang duh lo i, phungchim cawnpiak thiam le profet pakhat bantuk sawhsawh ah an ruah. Cucaah Jesuh Khrih a chuahnak Judahmi an hlawh i a fak bikmi vailam cungah an thah. Bawi Jesuh chan lio i an rak hlawh le an zumh duh lo lawng siloin atu tiangah hrimrhim ah an zum duh hlei lo i, an hlawh peng ko rih. Cucaah atulio Israel ram ahcun minung 8 million hrawng an ummi lakah Khrihfami cu 2.1% hrawng lawng an si i, cu chung zongah cun anmah Judahmi nakin Arab mi tu an tam deuh. Bawi Jesuh cu Judahmi hna nih an hlawt i Ṭahnak vampang i an ṭah peng ko rih lioah Jentailmi hna nih Jesuh Khrih cu kan zumh i, Khamhtu le Bawipa kan cohlang hi cu a sunglawi tuk hringhran i zeitluk mi vanṭha dah kan si. Kan Bawipa Jesuh cu Kalvary vailam put in kai lio ah nu tlawmpal nih an ṭah buin an zulh. Jesuh nih a timi hna cu Jerusalem minu hna keimah caah ṭap hlah u! nanmah le nan fale ca tuah ṭap deuh u (Luka 23:28) tiah a rak ti hna. Hawidawt hna, Israelmi hna caah ṭah buin Pathian au hna usih law. Jerusalem daihnak caah thlacam ve hna usih. Sang Nawl Gospel Revival Ministries Email: gospelrevival2012@yahoo Facebook: Nitin Thlarau Rawl Phone : 0045 51 27 85 68
Posted on: Thu, 13 Nov 2014 12:56:46 +0000
Trending Topics
Recently Viewed Topics
© 2015