Thawhleh zan Pro Fight Title Fight thlirlawkna (A chhiar peih tan.... i thlir dan a ni ve kher lo mai thei ?) A hmawrbawk a ni dawn; Zoram hmun hrang hrang leh state pawn atanga hmingthan tuma pen chhuakte thlitfim fel ni tawhin, zan 32 chhung weight then hrang pangaa champion lai tum thei tur zawn a nih hnuin thawhleh zan hian Hawla Indoor Stadium, Republic Vengthlangah LPS Pro Fight vawi lina Title Fight buatsaih a ni ang. Champion lai zingah Anthony Lalduhawman lightweight title humhim turin inhnek a hmachhawn thei dawn lo va, Lalmuanpuia leh Lalrinawmaten title rochuntu nih an inchuh dawn. Pro Fight neih tan 2009 atanga tute mahin an la hneh lo Abel Lalawmawian hnuhma tha chhawm nung turin PC Lalmuankima a bei ve thung ang. 2010 atangin middleweight telh a ni a, champion hmasa ber Zarzolianan a kum lehah title humhimin Pro Fight-a a tumpui a la hneh vek. Sawleng boxer hian a vawi hnih nan kawnghren humhim turin championship kal meka mittlung leh rin kai tak HC Johnkenty Vanhlimpuia a hneh a ngai dawn a ni. Lightfly-a champion zawn hmasa ber nih tumin Laldinmawian boruak nei tak NT Lalbiakkima a bei dawn. Bantam champion Michael Zodinpuian Pro Fight-a a khelh hnuhnun ber Lalnunhlua bawk hmachhawn lehin title humhim a tum ang. Red corner-ah vek champion lai an awm dawn a, light-ah champion hlui Muanpuian red corner chang bawkin, Title Fight-ah hian a chak zawkin Rs 40,000 dawngin a chak lo hnenah Rs 10,000 hlan a ni dawn. Chief minister Lal Thanhawlan khuallian niin a hmanpui bakah Mara District Council CEM RT Zachono chu khualzahawm a ni dawn bawk. Dinmawia v Biakkima Champhai khaw kianga inbun, in 100 vel awmna Tuipui atangin 2011 khan naupang te ni chungin Dinmawian a vawi khat nan Pro Fight a hmachhawn a, harsatna lian tawk lovin thiamna tha tak a lantir tluan chhuak. Champion lai ZD Lalchhuanawma lakah chungnung takin a inlan a, title a chhuhsak bakah R Biakliana Trophy for Best Boxer lawmman a dawng tel. Kum 20 mi Tuipui boxer hi champion lai zinga title hum thei tura rin kai ber pawl ni mah se inhnek hautak leh hahthlak tak a hmachhawn ngei tura ngaih a ni. Dinmawia hian thahrui nei leh chawl lova round li hnek chhuak tluan thei kum 18 mi Biakkima a hneh a nih chuan Pro Fight chanchina lightfly title humhim hmasa ber a ni ang. Junior boxer a nih laia atanga India camp-a awm thin leh India aiawha inhnek tawh Dinmawia hian Mizoram SAI hostel-ah a thiamna tuai hriam mekin, champion lai zinga Pro Fight atana inbuatsaihna nei tha tak a ni a, Biakkima lakah inringtawk taka inlan thei turin 2012 Contender Fight final-ah a hneh tawh a ni. Mizo mipa boxer zinga hma lam hun beiseiawm ber pawla ngaih thin Dinmawia hian a tumpuite inhnaihchilhin a bei lem lo va, a ban phak chinah tanhmun siamin ngil leh dik takin a hnek chhuak a, rang taka vawi thum vel thleng a vai chhuah bak combination turu leh vawi tam tak hnek chhuak chi a ni hran lo. Final-ah Laldingliana nawr hnehin Biakkima a chak a, unau piang hmun ni lo mah se Dingan a u Dinmawia khelh dan a entawn hle tih a lang. H Laldinsanga leh ZD-aten an tihtheih loh lightfly title humhim turin Dinmawian fiahna a hmachhawn dawn a, Saiha boxer laka a nau tlawmna chhan let ngei a duh avangin chak duhna a nei nasa lehzual hle. Huaisen taka a tumpuite pan a, hnek char char thin Biakkiman Tuipui chhuanvawr pahnih tukzala title lak a tum ve thung a, Dinmawia hmaah hmabak hlen tur a nei tel bawk. Contender Fight-a a tlawmna rul turin atan hun tha a inher chhuak a, kum hnih kal ta aiin kawng hrang hrangah hma a sawn a, beiseina pawh a nei sang. Dinmawia nen an khelh dan a danglam hlak a, Dinga nen an inbeih tuma thil awm danin Dinmawia v Biakkima inhnek dan tur a hril thui viau ang. Kum 14 mi Dinga nuai hneh mah se, amah aia inchi 5-a sang Dinmawia thiamna khum thei khawpin Saiha boxer hian a tibuai zo ang em tih zawhna a awm mek ? Michael v Hlutea 2011 khan Hlutea kut atangin bantam title a laksak a, mahse, tunhnaiah Ramhlun Venglai boxer Michael-a thawm a reh a, a lakah rinhlelhna a awm phah. Kum 24 mi Michael hian a that vanglai anga nung taka a khel thei a nih chuan bantam title humhim hmasa ber ni turin hun tha erawh a nei. Bantam champion hmasa ber Vanlalhruaia kut atangin Chaltlang Lily Veng boxer Hlutean title a chhuhsak a, tun tumah a hneh loh tawh lak atanga la kir leh turin inrintawkna a nei sang a, derthawng takin kalkawng hautak leh hahthlak a paltlang a, sawiselna leh inhnialna karah rin kai ni chungin Title Fight a hmachhawn ang. Inveng taka khel thin leh remchanga hnek chhuak zauh zauh thin Kum 24 mi Hlutea hian final-a a tumpui James Laltlanmawia lakah hmasawnna lantirin, tum dang zawng aiin a bei ngawrh a, a hnek chhuak tam bawk. Fighter beiseiawm James-a hmaah mar tha takin a khel a, a tawpah slit decision-in a chak hram a, a chak danah inhnialna awm zuiin mi thenkhat mit a tlung tawk lo. Semifinal-ah pawh inhnek thunun hneh tawk lo chungin CH Lalmuanpuia a hneh hram a, sawiselna a awm viau bawk. Mizoram Police boxer hian thiamna chi hrang tam tak lantir lo mah se a ralthuam hlauhawm a kut vei lam hmanga rang leh na taka a dawng chhoh thin hmangin a dinhmun a siam thei zel. Ngil tha leh dik taka vawi eng emaw zat hnek chhuak chunga a tumpuite bei thin Michael-an an khelh thin dan tuaihnuma tlak fual nei lova round li a bei thei a nih chuan a tumpui tan chet a harsa viau dawn a, kum 26 mi Hlutea hneh hnuhnung ber a ni bawk. Mahse, eng emaw chen hruihrual chhungah a lut tawh lo va, a lakah zawhna tam tak a awm avangin rin a hlawh zo lo. Muanpuia v Rinawma 2009 champion Muanpuian rin kai zawk ni chungin light title tlahlang a chuh dawn a, tuan rang leh theihna chi hrang nei tha a nih avangin Reiek boxer Rinawma hmaah kawnghren la kir leh thei tura ngaih a ni. Chutih laiin Muanpuia hian round hnih chiah hruihrual chhungah lutin Title Fight a hmachhawn dawn a, champion lai ang maiin round li mar taka khel turin thahrui a nei tha tawk em tih zawhn amahah a awm a, a dinhmun pawt hniamtu a ni thei. Kum 24 mi Muanpuia hian Lalropuia leh Vanlalhruaia hneh nan round khat ve ve chiah a mamawh a, a lansarhna rang taka hnek hlir leh tuan tha a nihna erawh a entir. Title Fight-a vawi hnih a hneh loh zawn hman Anthony-a kut atang ngeia title laksak tumin inbuatsaihna a nei ngawrh a, a laka beiseina tihlawhtling turin a inringtawk. Kum 22 mi Rinawman mi pathum hnehin a vawi khat nan Title Fight a hmachhawn dawn a, chiai lova a khelh dan thin tha taka a lantir a nih chuan tawrhhlelhawm tham theihna a nei. A vawrtawp thleng zo lova uiawm taka tawp thin Reiek boxer hian hma a sawn a, champion-pui tham a ni em tih erawh a lang chiang dawn. A kutthlak a na a, chutih laiin inven lamah harsatna tawkin a khelh hnuhnun ber Andy Chuaua hmaah a talbuai chang a nei viau a, mar tha taka round li khel thei a ni tih erawh a lantir tawh. Zotea v Vana Middeweight title humhim turin kum 26 mi Zotea inringtawk mah se a hautak dawn tih a pha lo va, tawn hriat a neih tawh chhawr theih erawh a inbeisei tih sawiin : Theihpatawp chhuah a ngai dawn. Ka tumpui tur hi a tha ka ti hle. Mahse, kum lamah a la naupang a, hneh taka ka nuai thei a nih chuan a boruakah ka ngam zawk ang tih ka ring a, thleirawl tha za leh tha thona nena khel an la ni a, boruak sangah tawn hriat a pawimawh ka ring, a ti. Sawleng boxer hian 2011 khan Isak Rothangpuia lakah inhnek hautak zet hmachhawn tawhin a chak hram a, mittlung taka lehlam hneh taka a nawr thin dan a kalpui zo lo theuh hle. Kum 18 mi Johnkenty Vana hmaah a inlan hnuhnun ber aia tha zawka chet theih a inring. Inveng aia vawi tam tak hnek chhuak chunga khel thin Assam Regiment boxer leh Tuipui rawlthar inbei tur hi a hmuhnawm ngei a beiseiawm. Feet 5 leh inchi 11-a sang Vanan ban sei zawk a nihna tha taka a hmang leh thei a nih chuan Zotea tan chet a khirh hle dawn a ni. Abel-a v Muankima Abel-a hneh hmasa ber ni turin Muankiman rin a kai a, mahse, Saron Veng tlangval hian Pro Fight a vawi khat khelhna a ni a, a la tawn loh Title Fight hmachhawn turin boruak sang a hap zo ang em tih zawhna a awm. Kum 23 mi Muankima hian nung takin a khel nghal ngai lo va, round tirah che buai ziahin mi pathum a hneh tawhte lakah round hmasa ber a hloh vek. Insiam rem nan hun a mamawh a, boruak sang zawkah insiam thaa kawng dika kir leh turin a hmabak a hautak lehzual ngei ang. Theihna leh thiamna a neih a hmantlak tih erawh lightheavy champion lai Abel-a hmaah chiang takin a entir tawh a, inelna danga vawi hnih an insut tawhah a chak ve ve. Fighter pahnihte hi feet 5 leh inchi 8 ve ve niin kg 80 an tling lo ve ve a, tuan tha leh tharum nei zawkin hamthatna an tel hle dawn a ni. Pro Fight neih tawhah pa lian zinga chet zung zung awlsam a nih avangin kum 25 mi Abel-an a dinhmun a siam thei zel a, Muankima khelh dan chiang takin a hmu a, zirlai thar a zir chhuak a nih chuan a vawi thum nan title humhim turin hun tha a nei. Vawi hnih inhnek dun tawh mah se Muankiman Abela khelh dan a hre chiang tawk lo va, tunhnaiah a khel hmuh tur a awm bawk si loh avangin inbuatsaih a harsa tih a sawi. Rothangzuala Ralte a hneh tum khan inhnaihchilhah a vei lamin fuh tak takin a dawm a, ngil leh mar taka a hnek chhuah thin a chhawr bawk. Chutih laiin Muankiman rang takin a kut a chhuah zawn zung zung lo va, inveng takin a bei. Assamn Rifle boxer Abelan a tumpui aia hnek chhuak tam thin a nihna a chhawr fo va, thahrui tha tak nen a nuai hneh thei a nih chuan Muankima dinhmun a chep thei viau dawn.
Posted on: Tue, 30 Sep 2014 06:31:48 +0000
Trending Topics
Recently Viewed Topics
© 2015