ZAKAIA ISUA HMUH/NEIH DAN (Luka.19:1-10) Kan nuna Isua neiduh/ hmu duh tak tak kan nih chuan Zakaia nun atang hian zir tur kan nei teuh va,chungte atang lo chuan Isua hi a hmuh theih loh ti ila kan sawi sual lemin ka ring lo. Awle, zakaia nun atang eng nge kan zir ang le? A hmasa in Zakaia chanchin tlemte sawi ila, ani hi Jeriko a awm, Isua hunlai khan chhiahkhawn hotu hausa tak a ni a. A sang lem lo hle ni awm e. A hausa bawk si a,chhiahkhawntu mah nise tunlai din hmunah chuan Kohhran hruaitu ah kan dah hial ang le. Juda te hian chhiahkhawn, nawhchizuarte hi an lo hmusit em em a, mi sual hmuhin an lo hmu ve bawk a, tunlai ang thovin. Pharisai te khan Zakaia hi hmusit hle mahse an neih phak loh Isua a nei ta tlat thung a nih kha. Miten mi sual ber min ti mahse Isua neitu kan ni thei tih na a ni. Zakaia nun atanga kan zir tur chu... 1. Isua hmuh duhna rilru a nei(19:3) : Hei hi a pawimawh em em a, mi tu pawh kan hmuh duh miah loh chu eng ang pawn hmuh tir min tum mahse kan hmu duh ngai lo va. Kan hmuhduh erawh eng ang pawn hla hle mahse kan kal trang2 zel thin a, kan va hmu ngei ngei zel a nih kha. Chutiang bawkin Zakain Isua Jeriko ah a lo kal tih a hriat ve leh, Isua chu Mi eng ang nge tih hmuh duh in a kal ve nghal a. Kei ni pawh Isua neih kan duh chuan, Zakaia anga hmuh duhna rilru kan neih a ngai a. Chu rilru nei hmasa lovin Isua hmuh a theih loh. 2. A in ngaitlawm (vs4): Isua hmu tura akal hnu chuan, mipui an lo tam mai bakah a tawi ve em avangin theipui kungah Isua hmuh duh avangin alawn ta ringawt a ni. Hei hian eng nge a entir duh le? Kha ti khawpa hausa leh hotu U pawh ni mahse Isua a hmuh theihna a nih phawt chuan a hauhsakna leh hotu U a nihna pawh paihthla in, theipui kungah naupang ang maiin a lawn a nih kha. In ngaihtlawmna chikhat a ni. Nang leh kei hi Zakai a angin hausa ve ta ila, hotu U ni ve ta ila, kan ti ve duh a ngem? A teuh lo, motor nalh tak nen pawn kan hmu peih lo vang. Tu nge a nih bika tiin, inla takin mahni inah kan thu awl hem hem zawk ang chu. Mahse Isua hmu tur chuan mahni lama nihna sang kan neih zawng2te paihthlak a lo ngai a nih kha. Isua ngei pawn mi hausa tan vanram luh aiin sabengtung hriau benga luh a awl zawk a lo tih hial kha. Engvangin maw? An hauhsakna te leh an nihna te chuan Isua a hliah khuh thin vangin an hmu thei thin lo a nih kha. Isua kan hmu duh tak zet a nih chuan Zakaia anga in ngaihtlawmna nun a ngai a ni. 3. Isua tan a thinlung kawngkhar a hawng (Vs5): Zaikaia theipui kunga a lawn hnu chuan, Isua chu a rawn thleng a, Isua zawkin, Zakai lo chhuk thuai rawh, a ti a nih kha. Isua hmuh duhna lian tak nen a nihna sang zawng2 peihthlaa a awm meuh chuan, Isua zawkin a hmu hmasa in,a ko hmasa zawk a nih kha. Tah hian ti nge Zakaia berkher midang an tam teh reng nen? Zaikain a thinlung kawngkhar Isua tan alo hawn vang a ni.Thupuan.3:20 ah chuan, Isuan, Tupawhin ka aw hriaa kawng a hawn chuan a hnenah ka lut ang a, a hnenah zanriah ka ei ang, a lo tih kha. Kei ni pawh Isua hmuh/ neih kan duh chuan, atan kan thinlung kawngkhar Zakaia anga kan hawn ve a ngai a ni. 4. Mite sawisel nih a pawisa lo (vs.7): Isua Zakaia ina thleng tura a kal meuh chuan, miten Mi sual hnena thleng turin a luh tak saw, an lo ti a. Tah hian miten Mi sual tiin ko mahse Isua a neih theihna a nih phawt chuan, an sawiselna pawh chu a tuar ngam tlat a ni. Kei ni pawh kan nun beidawn avang te emaw Isua neih kan duh tawh takzet a nih chuan, miten min sawiselin, mi tha lo, mi sual kha min ti mahse Zakaia anga pawisa lo va, Isua chauh pan tu kan nih a pawimawh a ni. Isua chanchin tha kan hriat theihna tur a nih phawt chuan min sawichhiatna te kan pawisa tur a ni lo. 5. A in-ah Isua a thleng : Isua hmuh duhna rilru a neih mai bakah, a in ngaitlawma, Isua tan a thinlung a hawn meuh chuan thinlung lam en diktu Isua chu Zakaia in ah a thleng ta a nih kha. Kei ni pawh zakaia anga Isua tana in hawng kan nih chuan, kan thinlungah Isua a rawn lut/ thleng ve ngei dawn a ni. 6. Chhandamna an chang(vs 9):: Zakaia ina Isua a thlen hnu chuan, an inah chhandamna chu alo thleng ta a nih kha. Kei ni pawh Zakaia anga Isua hmuh duhna nena,in ngaitlawm taka kan thinlung kawngkhar kan hawng a nih chuan, Isua chu a rawn lut a nga, chatuana chhandamna chu kan chang ve dawn a ni. Isua hmuh duhna nei si lo va a thu vel buaipui na ngawtin Isua neih a theih loh va, Zakaia anga hmuh duhna nei a, in ngaitlawma, thinlung kawngkhar hawnga, mite sawiselna pawh pawisa lova Krista chanchin ngaihthlak duhna leh neih duhna kan neih phawt chuan, Krista chhandamna chu kan chang ngei ngei ang le! Lalpan malsawm che rawh se.
Posted on: Wed, 29 Jan 2014 09:19:18 +0000
Trending Topics
Recently Viewed Topics
© 2015